ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນໄພນໍ້າຖ້ວມຊຸ ແລະ ດິນເຈື່ອນ ປະຈຳວັນທີ 22 ສິງຫາ ເນື່ອງຈາກຮ່ອງຄວາມກົດດັນອາກາດຕໍ່າ ຫຼື ຮ່ອງຝົນ ໄດ້ພາດຜ່ານຢູ່ເຂດພາກເໜືອ ລົງຫາ ພາກກາງ ຂອງປະເທດລາວ, ສົມທົບກັບລົມມໍລະສຸມຕາເວັນຕົກສ່ຽງໃຕ້ ທີ່ມີກໍາລັງແຮງປານກາງພັດປົກຄຸມ ເຮັດໃຫ້ມີຝົນຕົກໜັກຕິດຕໍ່ກັນຫຼາຍວັນ ແລະ ຝົນຍັງຈະສືບຕໍ່ຕົກໃນລະດັບປານກາງ ຫາ ຕົກໜັກຢູ່ທົ່ວໄປໃນແຕ່ລະພາກ ໃນໄລຍະວັນທີ 22 – 24 ສິງຫາ 2024 ນີ້.
ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທ້ອງຖິ່ນຢູ່ບັນດາແຂວງພາກເໜືອ ເຊັ່ນ: ແຂວງ ຜົ້ງສາລີ, ບໍ່ແກ້ວ, ອຸດົມໄຊ, ຫຼວງນໍ້າທາ ແລະ ໄຊຍະບູລີ ຈົ່ງມີສະຕິລະມັດລະວັງຕໍ່ສະພາບຝົນຕົກໜັກທີ່ຈະເຮັດໃຫ້ມີດິນເຈື່ອນ, ຕົ້ນໄມ້ໃຫຍ່ຫັກລົ້ມ, ນໍ້າຖ້ວມ ຊຸ, ນໍ້າຖ້ວມຍື່ງ ແລະ ທາງສັນຈອນຂາດ ທີ່ຈະເກີດຂຶ້ນໄດ້ໃນໄລຍະນີ້. ຂໍໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.
ສ່ວນລະດັບແມ່ນໍ້າຂອງ ຍັງຈະສືບຕໍ່ເພີ່ມຂຶ້ນ ໂດຍໃນວັນທີ 22 ສິງຫາ ທີ່ນະຄອນຫຼວງວຽງຈັນ ແທກໄດ້ 10,06 ແມັດ ( ລະດັບເຕືອນໄພ 11,50 ແມັດ ) ເຊິ່ງຄາດວ່າລະດັບນໍ້າຈະເພີ່ມຂຶ້ນເປັນ 10,69 ແມັດ ໃນວັນທີ 24 ສິງຫາ; ຫຼວງພະບາງ ຢູ່ທີ່ 14,98 ແມັດ ( ລະ ດັບເຕືອນໄພ 17,50 ແມັດ ) ເຊິ່ງຄາດວ່າລະດັບນໍ້າຈະເພີ່ມຂຶ້ນເປັນ 15,50 ແມັດ ໃນວັນທີ 24 ສິງຫາ.
