ເສດຖະກິດມາເລເຊຍ ໄຕມາດ 2 ຂະຫຍາຍຕົວ 5,9% ຈາກໄລຍະດຽວກັນຂອງປີຜ່ານມາ ຫຼາຍກວ່າໄຕມາດທຳອິດທີ່ຂະຫຍາຍຕົວ 4,2%.
ເວັບໄຊນິກເຄອິ ອາຊີ ລາຍງານຂໍ້ມູນຈາກທະນາຄານກາງມາເລເຊຍ ເຖິງຕົວເລກລວມຍອດຜະລິດຕະພັນພາຍໃນ ຫຼື ຈີດີພີ ໃນໄຕມາດ 2 ຂະຫຍາຍຕົວຢ່າງເຂັ້ມແຂງທີ່ລະດັບ 5,9% ໂດຍໄດ້ແຮງຍູ້ຈາກການບໍລິໂພກພາຍໃນ ຈາກການລົງທຶນທີ່ເຂັ້ມແຂງຂອງພາກລັດ ແລະ ເອກະຊົນ.
ທ່ານ ອັບດຸລ ຣາຊິກກັບຟໍ ຜູ້ວ່າການທະນາຄານກາງມາເລເຊຍ ກ່າວວ່າ: ໃນພາບລວມຄາດວ່າເສດຖະກິດຈະຂະຫຍາຍຕົວ 4 – 5% ໃນປີນີ້ ແຕ່ທັງໝົດກໍຍັງຂຶ້ນຢູ່ກັບຄວາມສ່ຽງຈາກຂໍ້ຂັດແຍ່ງດ້ານພູມສາດການເມືອງໂລກ ແລະ ຜົນຜະລິດສິນຄ້າອຸປະໂພກ ຄາດວ່າຈະຕົກຕໍ່າ.
ການສົ່ງອອກຂອງມາເລເຊຍ ຂະຫຍາຍຕົວ 8,4% ຫຼັງຈາກຂະຫຍາຍຕົວ 5,2% ໃນໄຕມາດທຳອິດ ເນື່ອງຈາກປະເທດຍັງສືບຕໍ່ໄດ້ຜົນປະໂຫຍດຈາກທີ່ບໍລິສັດລະດັບໂລກປ່ຽນແປງຜູ້ສະໜອງ.
ສ່ວນການບໍລິໂພກພາກເອກະຊົນເພີ່ມຂຶ້ນຈາກ 4,7% ໃນໄຕມາດທຳອິດ ມາຢູ່ທີ່ 6,0% ໃນໄຕມາດ 2 ໂດຍໄດ້ແຮງຍູ້ຈາກເງື່ອນໄຂຕະຫຼາດແຮງງານດີ ມີນະໂຍບາຍສະໜັບສະໜູນຫຼາຍຂຶ້ນ; ສ່ວນອຸດສາຫະກຳພາກການຜະລິດກໍຂະຫຍາຍຕົວ 4,7% ຈາກ 1,9% ໃນໄຕມາດ ທຳອິດ.
ດ້ານພາກການກະສິກຳ ຂະຫຍາຍຕົວ 7,1% ຈາກ 1,7% ໃນໄຕມາດ 1 ໂດຍໄດ້ແຮງຍູ້ຈາກອຸດສາຫະກຳປາມນໍ້າມັນ.
ທະນາຄານກາງມາເລເຊຍ ຍັງຄາດການວ່າ: ລາຍໄດ້ຈາກການທ່ອງທ່ຽວປີນີ້ ຈະບັນລຸເຖິງ 22,4 ຕື້ຣິງກິດ ເພີ່ມຂຶ້ນຈາກ 21,4 ຕື້ຣິງກິດ ໃນປີ 2023. ສ່ວນຕົວເລກນັກທ່ອງທ່ຽວຄາດວ່າຈະສູງກວ່າລະດັບກ່ອນໂຄວິດລະບາດ ເຊິ່ງຄາດວ່າຈະມີເຖິງ 27,3 ລ້ານຄົນ.
ໃນເຄິ່ງປີທຳອິດ ເງິນຣິງກິດ ແຂງຄ່າຂຶ້ນເມື່ອທຽບກັບໂດລາສະຫະລັດ ເຖິງ 3,8% ທະລຸລະດັບສູງສຸດໃນຮອບ 16 ເດືອນ ເຊິ່ງສະແດງໃຫ້ເຫັນເຖິງທ່າອ່ຽງເສດຖະກິດເຕີບໂຕ.
