ວິທະຍຸກະຈາຍສຽງຫວຽດນາມ ລາຍງານວ່າ: ວັນທີ 20 ສິງຫາ, ທ່ານ Hans Kluge ຜູ້ອຳນວຍການຮັບຜິດຊອບພາກພື້ນເອີຣົບ ຂອງອົງການອະນາໄມໂລກ ( WHO ) ໄດ້ຮຽກຮ້ອງໃຫ້ບັນດາປະເທດເອີຣົບ ແລະ ປະເທດອື່ນ ພ້ອມກັນສົມທົບບັນດາມາດຕະການເພື່ອສະກັດກັ້ນ, ຄວບຄຸມ ແລະ “ ລົບລ້າງ ” ພະຍາດໝາກສຸກລີງ ( mpox ) ໃນຂົງເຂດທົ່ວໂລກ.
ຕາມທ່ານ Hans Kluge ແລ້ວ, ເຖິງວ່າແມ່ນສາຍພັນໃໝ່ ຫຼື ເກົ່າກໍຕາມ, ພະຍາດໝາກສຸກລີງ ຈະບໍ່ຄ້າຍຄືກັນກັບບັນດາສິ່ງທີ່ໂລກຕ້ອງຜ່ານຜ່າ ເມື່ອຮັບມືກັບພະຍາດໂຄວິດ – 19, ຍ້ອນບັນດາອົງການສາທາລະນະສຸກບັນດາປະເທດໄດ້ຮູ້ວິທີເພື່ອຄວບຄຸມການແຜ່ລະບາດຂອງພະຍາດໂຄວິດ – 19 ແລ້ວ.
ສະນັ້ນ, ຖືວ່າເລື່ອງບັນດາປະເທດເລືອກເອົາວິທີຮ່ວມແຮງຮ່ວມໃຈສະກັດກັ້ນ ພະຍາດໝາກສຸກລີງໃນປັດຈຸບັນ ແລະ ໃນຊຸມປີຈະມາເຖິງ ຈະແມ່ນສິ່ງທົດຊອບສຳລັບທັງ ເອີຣົບ ເວົ້າສະເພາະ ແລະ ໂລກ ເວົ້າລວມກ່ຽວກັບກຳລັງຮັບມືກັບພະຍາດລະບາດ.
ວັນທີ 15 ສິງຫາ, ອົງການສາທາລະນະສຸກ ຊູແອັດ ຢັ້ງຢືນວ່າ: ໄດ້ກວດພົບກໍລະນີທຳອິດຕິດສາຍພັນໃໝ່ “ clade Ib ” ກໍ່ໃຫ້ເກີດພະຍາດໝາກສຸກລີງ ຢູ່ປະເທດເອີຣົບ ນີ້ແມ່ນກໍລະນີທໍາອິດຢູ່ນອກ ອາຟຣິກກາ ຕິດສາຍພັນໃໝ່ຂອງພະຍາດໝາກສຸກລີງ.
