ຂ່າວຊີອາໄອ ລາຍງານວ່າ: ອີງຕາມຕົວເລກຂໍ້ມູນທີ່ອົງການພາສີແຫ່ງຊາດຈີນ ເປີດເຜີຍໃນວັນທີ 18 ສິງຫານີ້ ສະແດງໃຫ້ເຫັນວ່າ: ເດືອນກໍລະກົດຜ່ານມາ ຄຽງຄູ່ກັບຈີນ ໄດ້ປະຕິບັດນະໂຍບາຍມະຫາພາກດ້ານຕ່າງໆແລ້ວ, ລາຍຮັບຈາກການຈຳໜ່າຍຂອງພາກສ່ວນຕ່າງໆໃນຕະຫຼາດຈີນ ໄດ້ຟື້ນຟູຄືນຢ່າງໜັກແໜ້ນ ແລະ ຫຼາຍຂົງເຂດ ໄດ້ປາກົດມີຈຸດພົ້ນເດັ່ນທີ່ຕັ້ງໜ້າ.
ຕົວເລກຂໍ້ມູນສະແດງໃຫ້ເຫັນວ່າ: ເດືອນກໍລະກົດ ເສດຖະກິດອຸດສາຫະກຳຂອງຈີນ ໄດ້ຟື້ນຟູຄືນຢ່າງໜັກແໜ້ນ, ລາຍຮັບຈາກການຈຳໜ່າຍຂອງວິສາຫະກິດອຸດສາຫະກຳ ໄດ້ເພີ່ມຂຶ້ນ 6% ເມື່ອທຽບໃສ່ເດືອນກໍລະກົດປີກາຍ ແລະ ໄດ້ເພີ່ມຂຶ້ນ 1,7% ເມື່ອທຽບໃສ່ຈັງຫວະການເຕີບໂຕຂອງໄຕມາດທີ 2 ປີນີ້.
ກຳລັງການຜະລິດໃນຄຸນນະພາບໃໝ່ໄດ້ເຕີບໂຕໄວຂຶ້ນ, ລາຍຮັບຈາກການຈຳໜ່າຍໃນຂົງເຂດອຸດສາຫະກຳເຕັກນິກທັນສະໄໝກ້າວໜ້າໄດ້ເພີ່ມຂຶ້ນ 13,3% ເມື່ອທຽບໃສ່ເດືອນກໍລະກົດປີກາຍ. ລາຍຮັບຈາກການຈຳໜ່າຍໃນຂົງເຂດອຸດສາຫະກຳຈະເລີນໃໝ່ທີ່ມີລັກສະນະຍຸດທະສາດຕ່າງໆ ເຊັ່ນ: ການຜະລິດອຸປະກອນເອເລັກໂຕຣນິກ ແລະ ໂທລະຄົມ, ການຜະລິດອຸປະກອນລົດໄຟ, ກຳປັ່ນ ແລະ ການບິນ, ການຜະລິດລົດໃຊ້ພະລັງງານໃໝ່ເປັນຕົ້ນ ລ້ວນແຕ່ໄດ້ຮັກສາຈັງຫວະເຕີບໂຕຫຼາຍກວ່າ 10%, ການປ່ຽນຖ່າຍເຄື່ອງຈັກອຸປະກອນ ແລະ ເຄື່ອງບໍລິໂພກເລີ່ມເຫັນຜົນຕົວຈິງ.
ເມື່ອສັງເກດຈາກພາກສ່ວນທຸລະກິດແລ້ວ, ນັບມາຮອດທ້າຍເດືອນກໍລະກົດຜ່ານມາ, ຈຳນວນຫົວໜ່ວຍທຸລະກິດທີ່ຂຶ້ນທະບຽນພາສີໃໝ່ໃນທົ່ວປະເທດ ໄດ້ເພີ່ມຂຶ້ນ 7,3%.
