ການສ້າງເສດຖະກິດຄອບຄົວ ດ້ວຍການຜະລິດກະສິກຳ ປູກຝັງ-ລ້ຽງສັດ ເພື່ອເປັນສະບຽງອາຫານໄວ້ຮັບໃຊ້ແກ່ຄອບຄົວ ຊ່ວຍຫຼຸດຜ່ອນຄ່າໃຊ້ຈ່າຍທີ່ບໍ່ຈຳເປັນແລ້ວ ຍັງສາມາດສ້າງລາຍຮັບທີ່ດີຊ່ວຍໃຫ້ຫຼຸດພົ້ນອອກຈາກ ຄວາມທຸກຍາກ.
ບາງຄອບຄົວກໍຜະລິດໜ້ອຍເພື່ອບໍໂພກພາຍໃນຄອບຄົວເທົ່ານັ້ນ ແຕ່ກໍມີຫຼາຍຄອບຄົວທີ່ຜະລິດຫຼາຍຈົນກາຍເປັນສິນຄ້າອອກຈຳໜ່າຍ ສ້າງລາຍຮັບເພີ່ມໃຫ້ຄອບຄົວກາຍເປັນຕົ້ນແບບ ໃຫ້ຫຼາຍຄອບຄົວ ດັ່ງຄອບຄົວຂອງ ທ່ານ ໂພໄຊ ສີພອນແກ້ວປະເສີດ ອາຍຸ 40 ປີ ຢູ່ບ້ານໂພນທັນ ເມືອງໂພນໂຮງ ແຂວງວຽງຈັນ ທີ່ໄດ້ປະກອບອາຊີບປູກຝັງ-ລ້ຽງສັດແບບປະສົມປະສານ ແລະ ຮັບບໍລິການດ້ານກົນຈັກການກະເສດ ສາມາດສ້າງລາຍຮັບໃຫ້ຄອບຄົວໄດ້ 700-800 ລ້ານຕໍ່ປີ.
ທ່ານ ໂພໄຊ ສີພອນແກ້ວປະເສີດ ໃຫ້ຮູ້ວ່າ: ໃນຄອບຄົວມີສະມາຊິກທັງໝົດ 7 ຄົນ ໃນນີ້, ມີແຮງງານຫຼັກ 4 ຄົນ, ໄດ້ເລີ່ມປະກອບອາຊີບປູກ ຝັງ-ລ້ຽງສັດແບບປະສົມປະສານ ມາແຕ່ປີ 2007 ໂດຍເລີ່ມຈາກການປູກເຂົ້າ ທັງນາປີ – ນາແຊງ ໃນເນື້ອທີ່ 5 – 6 ເຮັກຕາ ສະມັດຖະພາບ 4 ໂຕນຕໍ່ເຮັກຕາ, ສວນໝາກແຕງ, ແຕງໂມ, ຖົ່ວ ແລະ ລ້ຽງງົວຂຸນ ເຊິ່ງເບື້ອງຕົ້ນມີງົວພຽງແຕ່ 8 ໂຕ; ໃນນີ້ ມີແມ່ພັນ 4 ໂຕ ລ້ຽງແບບຂາຍໄປນຳ ແລະ ຂະຫຍາຍແມ່ພັນໄປພ້ອມ (ນຳໃຊ້ລູກງົວຂອງເຮົາເອງມາຂຸນຂາຍ), ປັດຈຸບັນມີງົວທັງໝົດ 30 ໂຕ ໃນນີ້ ມີແມ່ພັນ 20 ໂຕ.
ຕໍ່ມາໄດ້ເຫັນຊ່ອງທາງການສ້າງລາຍຮັບໃໝ່ຄືການລ້ຽງໝູຂຸນ ຈຶ່ງໄດ້ສຶກສາຂໍ້ມູນຈາກສື່ອອນລາຍ ແລະ ຈາກຜູ້ທີ່ເຮັດມາກ່ອນ ທຳອິດໄດ້ເລີ່ມລ້ຽງ 1 ຄອກ (ໝູນ້ອຍ 10 ກວ່າໂຕ) ເກືອຫົວອາຫານສົດ ໂດຍໃຊ້ເວລາລ້ຽງ 4 ເດືອນກວ່າ ກໍສາມາດອອກຈຳໜ່າຍໄດ້ ເຫັນວ່າພໍມີກຳໄລ ກໍເລີຍລ້ຽງໝູແມ່ພັນ ເພື່ອຂະຫຍາຍລູກ ແລ້ວເອົາໄວ້ຂຸນເອງ ຈຳນວນ 2 ໂຕ ແລະ ຂະຫຍາຍເພີ່ມອີກ, ປັດຈຸບັນມີໝູແມ່ພັນ 6 ໂຕ ພ້ອມທັງຂະຫຍາຍຄອກໝູຂຸນຈາກ 1 ຄອກ ມາເປັນ 4 ຄອກ. ສຳລັບຕະຫຼາດ ແມ່ນຈຳໜ່າຍຢູ່ພາຍເມືອງໂພນໂຮງ ແລະ ຕ່າງແຂວງຈຳນວນໜຶ່ງ.
ນອກຈາກປູກຝັງ-ລ້ຽງສັດແລ້ວ ຕົນເອງຍັງໄດ້ຮັບບໍລິການລົດໄຖນາ ໄຖສວນ ຮັບບໍລິການກ່ຽວເຂົ້າດ້ວຍກົນຈັກຕາມລະດູການ. ສະເລ່ຍລາຍຮັບຈາກການຂາຍເຂົ້າ, ຂາຍເຄື່ອງສວນ, ໝູຂຸນ, ງົວຂຸນ ແລະ ບໍລິການລົດໄຖນາໄຖສວນ ຮັບບໍລິການກ່ຽວເຂົ້າດ້ວຍກົນຈັກ ໄດ້ປະມານ 700-800 ລ້ານກີບຕໍ່ປີ.
ຍ້ອນຄວາມດຸໝັ່ນຂະຫຍັນພຽນ ແລະ ເຮັດແທ້ທຳຈິງ ໃນການປະກອບອາຊີບກະສິກຳ ຄອບຄົວຕົນເອງ ໄດ້ເປັນຄອບຄົວຕົວແບບ ໃນປີ 2017 ຈົນເຖິງປັດຈຸບັນ.
ທ່ານ ໂພໄຊ ສີພອນແກ້ວປະເສີດ ກ່າວຕື່ມວ່າ: ສຳລັບແຜນການໃນຕໍ່ໜ້າຕົນເອງມີແຜນຢາກຈະຂະຫຍາຍການລ້ຽງໝູຂຸນ, ງົວຂຸນ ແລະ ຊື້ລົດກ່ຽວເຂົ້າອີກ 1 ຄັນ ເພື່ອໃຫ້ພຽງພໍກັບຄວາມຕ້ອງການຂອງລູກຄ້າໃນອະນາຄົດ.
