ເຜືອກຫອມ ເປັນພືດລົ້ມລຸກ, ໃນຍາມຂາດອາຫານຈຳພວກແປ້ງ ເຮົາສາມາດກິນເຜືອກແທນເຂົ້າໄດ້ ແລະ ຍັງສາມາດນຳເອົາເຜືອກມາເຮັດເຂົ້າໜົມຫວານໄດ້ຫຼາຍຮູບແບບ, ຊາວກະສິກອນ ສາມາດປູກເປັນອາຊີບຫຼັກເພື່ອສ້າງລາຍໄດ້. ເນື່ອງຈາກເຜືອກຫອມຂາຍໄດ້ລາຄາດີ ຊາວກະສິກອນຈຶ່ງສົນໃຈປູກຫຼາຍກວ່າເຜືອກຊະນິດອື່ນໆ.
- ພື້ນທີ່ ແລະ ລະດູການປູກ:
ເຜືອກຫອມຈະເລີນເຕີບໂຕໄດ້ດີໃນດິນຜຸຜຸ່ຍປົນຊາຍທີ່ມີການລະບາຍນໍ້າໄດ້ດີບໍ່ຖ້ວມຂັງເມື່ອຝົນຕົກຫຼາຍ. ຖ້າປູກໃນດິນໜຽວຫົວຈະນ້ອຍຍາວບໍ່ອວບງາມ. ລະດູການປູກເຜືອກ: ຖ້າປູກເຜືອກຫອມຫຼັງຈາກການເຮັດນາ ຄວນປູກໃນເດືອນກຸມພາ ຫຼື ຊ້າ ກວ່ານີ້ເລັກໜ້ອຍກໍໄດ້.
- ແນວພັນເຜືອກ:
ເຜືອກທີ່ໃຊ້ສ່ວນໃຫຍ່ເປັນແນວພັນພື້ນບ້ານ.
- ວິທີຊໍາຕົ້ນເຜືອກ:
ເມື່ອໄດ້ຕົ້ນເຜືອກມາແລ້ວນໍາມາວາງເທິງດິນທີ່ປຽກຊຸ່ມໃນບ່ອນຮົ່ມ, ໃຫ້ວາງເປັນແຖວໆ ແລະ ໃຊ້ເຟືອງປົກຄຸມ, ຫົດນໍ້າໃຫ້ຊຸ່ມປະມານ 5-6 ວັນ ເຜືອກຈະເກີດເປັນໜໍ່ເຕີບໂຕເປັນຕົ້ນອ່ອນສູງປະມານ 10-20 ຊັງຕີແມັດ, ຖ້າຫົວເຜືອກແຕກໜໍ່ຫຼາຍຍອດ ຄວນເດັດໃຫ້ເຫຼືອພຽງຍອດດຽວແລ້ວຍ້າຍໄປປູກໄດ້.
- ການກຽມດິນແປງປູກ:
ຍົກຮ່ອງເຮັດແປງປູກ ກວ້າງປະມານ 5 ແມັດ ຍາວໄປຕາມພື້ນທີ່ດິນ, ໄລຍະຫ່າງຂອງຮ່ອງປະມານ 1-1/2 ແມັດ, ຂຸດຂຸມປູກກວ້າງ 50 ຊັງຕີແມັດ. ຫາກພື້ນທີ່ດິນມີສະພາບເປັນກົດສູງ ຄວນແກ້ໄຂດ້ວຍການໃສ່ປູນຂາວລົງໃນເວລາໄຖດິນໃສ່ປະມານໄຮ່ລະ 500 ກິໂລ ຫຼື ປະສົມປະມານ 1 ກະປ໋ອງນົມຂຸ້ນໃນຂຸມປູກຫາກປູກບໍ່ຫຼາຍສາມາດໃຊ້ຂີ້ເທົ່າແທນປູນຂາວໄດ້.
- ວິທີການປູກເຜືອກຫອມ:
ວາງຫົວເຜືອກລຽງເປັນແຖວເອົາຕາຂຶ້ນຂ້າງເທິງ, ຖົມດ້ວຍດິນລະອຽດພໍປົກຫົວເຜືອກ ແລ້ວປົກຄຸມດ້ວຍເຟືອງໜາປະມານ 2 – 5 ຊັງຕີແມັດ, ຫົດນໍ້າໃຫ້ຊຸ່ມທຸກວັນ ປະມານ 10 – 15 ວັນ ເມື່ອແຕກຍອດຍາວປະມານ 10-15 ຊັງຕີແມັດ. ໃຫ້ຍ້າຍລົງປູກໃນແປງທີ່ກຽມໄວ້ ປູກໂດຍວາງຫົວນ້ອຍໆ ຫຼື ຍອດຂອງຫົວລົງໃນຂຸມທີ່ກຽມໄວ້ເລິກປະມານ 10-15 ຊັງຕີແມັດ ຂຸມລະ 1-2 ຫົວ, ຖ້າປູກໃນນາຄວນໃຊ້ຍອດ ແລະ ປູກເລິກ 17-25 ຊັງຕີແມັດ ໂດຍທົ່ວໄປໄລຍະປູກ 60×60 ຊັງຕີແມັດ, ຈະຖີ່ ຫຼື ຫ່າງກວ່ານີ້ກໍໄດ້ເຊັ່ນ: ໄລຍະແຖວ 60-120 ຊັງຕີແມັດ. ໄລຍະຂຸມ 40-60 ຊັງຕີແມັດ.
- ການໃສ່ຝຸ່ນ:
ກ່ອນປູກໃຫ້ໃສ່ຝຸ່ນຄອກຮອງກົ້ນຂຸມ ຫຼື ປະສົມໃນຂຸມປູກຂຸມລະ 2-3 ກຳມື. ໃສ່ເດືອນລະ 1 ຄັ້ງ ຫຼັງຈາກປູກເຜືອກແລ້ວ ຄວນໃສ່ຝຸ່ນຄອກ ແລະ ຝຸ່ນວິທະຍາສາດ, ໃສ່ຕົ້ນລະ 1 ບ່ວງແກງ, ຝຸ່ນຄອກໃສ່ຕົ້ນລະ 1 ກຳມື ໂດຍປະສົມຝຸ່ນທັງສອງຊະນິດໃຫ້ເຂົ້າກັນ, ຂຸດຮ່ອງອ້ອມຕົ້ນໃຫ້ຫ່າງຕົ້ນລະ 1 ຝາມື, ໂຮຍຝຸ່ນໃສ່ລົງໄປຖົມດິນ ແລະ ຫົດນໍ້າໃຫ້ຊຸ່ມ.
ໃສ່ຝຸ່ນບຳລຸງຫົວທີ່ມີສ່ວນປະສົມຂອງທາດໂປແທສຊຽມ ເມື່ອເຜືອກອາຍຸໄດ້ 2-4 ເດືອນ. ໃຊ້ບຳລຸງຫົວ ໂຮຍໃສ່ອ້ອມຕົ້ນ, ຕົ້ນລະ 1 ບ່ວງແກງ ແລ້ວພູນດິນຖົມ ແລະ ຫົດນໍ້າໃຫ້ຊຸ່ມ.
- ການເກັບກ່ຽວເຜືອກຫອມ:
ເມື່ອເຜືອກອາຍຸໃກ້ຈະເກັບກ່ຽວໄດ້ ໃບຈະຄ່ອຍໆເປັນສີເຫຼືອງ ຕັ້ງແຕ່ໃບລຸ່ມຂຶ້ນໄປຈົນເຫຼືອແຕ່ສ່ວນຍອດ 2-3 ໃບ ສະແດງວ່າຫົວເຜືອກແກ່ຫຼາຍ ສາມາດຂຸດໄດ້ແລ້ວ, ນັບແຕ່ມື້ປູກຈົນເຖິງວັນເກັບກ່ຽວປະມານ 7 ເດືອນ.
- ວິທີຂຸດຫົວເຜືອກ:
ເຜືອກຫອມມີອາຍຸປະມານ 6 ເດືອນ ການເກັບໃຊ້ສຽມ ຫຼື ຈົກຂຸດ, ຂຸດຂຶ້ນມາແລ້ວຕັດໃບ ຫຼື ຮາກອອກເຫຼືອແຕ່ຫົວໄວ້, ລ້າງໃຫ້ສະອາດ ຫຼື ອາດສົ່ງຂາຍໃຫ້ຕະຫຼາດໄດ້ເລີຍ. ຖ້າຕ້ອງການເກັບຮັກສາຫົວເຜືອກໃຫ້ດົນບໍ່ຄວນຕັດຍອດຖິ້ມຈະຕ້ອງເກັບໃນບ່ອນທີ່ແຫ້ງ ອາກາດຖ່າຍເທສະດວກ, ອາດເກັບຮັກສາໄດ້ດົນ 4-6 ເດືອນ, ການເກັບໃນຫ້ອງເຢັນ 10 ອົງສາ ສາມາດເກັບໄດ້ດົນເຖິງ 6 ເດືອນ.
[ ຂໍ້ມູນ: ກົມສົ່ງເສີມເຕັກນິກ ແລະ ປຸງແຕ່ງກະສິກຳ ]
