ໝາກແຕງແຄນຕາລຸບ ຖືວ່າເປັນໝາກໄມ້ຊະນິດໜຶ່ງທີ່ຕະຫຼາດຕ້ອງການຫຼາຍທີ່ສຸດ ແລະ ໃນໄລຍະຜ່ານມາ ໝາກແຕງຊະນິດດັ່ງກ່າວນີ້ສ່ວນຫຼາຍແມ່ນນຳເຂົ້າມາຈາກປະເທດໃກ້ຄຽງ. ແຕ່ປັດຈຸບັນນີ້ຊາວສວນຄົນລາວເຮົາກໍໄດ້ຫັນມາສຶກສາ ແລະ ປູກເປັນສິນຄ້າປ້ອນຕະຫຼາດໄດ້ແລ້ວ.
ຈາກຂໍ້ມູນຊາວສວນບ້ານນາຄວາຍ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ: ສຳລັບການປູກໝາກແຕງແຄນຕາລຸບ ແມ່ນສາມາດປູກໄດ້ຕະຫຼອດປີ ເຊິ່ງໃນປີ 1 ສາມາດປູກໄດ້ເຖິງ 5 ຊຸດ ຂໍພຽງມີພື້ນທີ່ດິນມີນໍ້າກໍສາມາດປູກໄດ້ແລ້ວ, ສຳລັບຄອບຄົວຂອງຂ້າພະເຈົ້າແມ່ນເຮັດຢູ່ 1 ໄລ່ ເພາະການດູແລບົວລະບັດໝາກແຕງ 1 ໄລ່ຕ້ອງໃຊ້ຄົນຢ່າງໜ້ອຍ 2 ຄົນ ຈຶ່ງຈະຫຼ້ອນ.
ອຸປະກອນ: ແກ່ນໝາກແຕງກະປ໋ອງ, ໄມ້ຄ້າງ, ຜ້າຢາງປົກດິນ, ເຊືອກຝາກ, ຫຼວດ, ປຸ໋ຍຄອກ, ປຸ໋ຍເຄມີ, ຖົງຢາງເບົ້າ, ມີດຕັດກິ່ງຫງ່າ, ທໍ່ນໍ້າ.
ວິທີປູກໝາກແຕງແຄນຕາລຸບ: ກ່ອນອື່ນກໍແມ່ນໄຖຫຸດດິນ ແລ້ວຕາກດິນໄວ້ ປະມານ 1 ອາທິດ (7 ມື້) ເພື່ອຂ້າເຊື້ອຣາ ແລະ ວັດສະພືດໃນດິນ, ຈາກນັ້ນກໍນຳປຸ໋ຍຄອກກັບປຸ໋ຍເຄມີສູດ 15-15-15 ມາຮອງພື້ນແລ້ວກໍໄຖກົບອີກຄັ້ງ ແລ້ວຕີຄູໜານຂຶ້ນ ເຊິ່ງຄວາມຍາວແລ້ວແຕ່ພື້ນທີ່ດິນ, ສ່ວນໄລຍະຫ່າງຂອງແຕ່ລະຄູແມ່ນ 1 ແມັດ ຈາກນັ້ນກໍໃຊ້ຜ້າຢາງດຳທີ່ກຽມໄວ້ປົກຄຸມດິນໄວ້.
ຂັ້ນຕອນຕໍ່ມານຳແກ່ນ (ແກ່ນແນວພັນ) ເຊິ່ງໃຊ້ໂຕເປັນກະປ໋ອງສັ່ງຊື້ຈາກປະເທດໃກ້ຄຽງມາແຊ່ນໍ້າໄວ້ 1 ຄືນເພື່ອໃຫ້ຕົ້ນອ່ອນງອກ ແລ້ວຈາກນັ້ນກໍ່ນຳໄປເພາະໃສ່ເບົ້າທີ່ກຽມໄວ້ ຈາກນັ້ນຫົດນໍ້າປົກກະຕິ ພໍໄດ້ 4 ມື້ ກໍສາມາດນຳລົງມາປູກໃສ່ຄູ ຫຼື ໜານທີ່ກຽມໄວ້ ແລ້ວກໍຫົດນໍ້າ ເບື້ອງຕົ້ນກໍຈະໃຫ້ນໍ້າ 3 ຄັ້ງຕໍ່ 2 ອາທິດ, ພໍຕົ້ນໝາກແຕງເລີ່ມຍາວອອກເຄືອແລ້ວກໍເລີ່ມປັກຄ້າງ ເພື່ອໃຫ້ເຄືອໝາກແຕງເລືອ, ແລ້ວກໍເລີ່ມທຳການຕັດແໜງເຄືອໝາກແຕງອອກ ໃຫ້ຈົ່ງໄວ້ແໜງລະເຄືອເທົ່ານັ້ນ, ຈາກນັ້ນພໍໝາກແຕງເລີ່ມອອກດອກ, ອອກໝາກ 1 ເຄືອ ຈະມີຫຼາຍໜ່ວຍເຮົາກໍຈະຕັດໜ່ວຍອ່ອນອອກຂາຍ ແລະ ແຕ່ລະເຄືອຈະຈົ່ງໄວ້ 1 ໜ່ວຍ ສານອາຫານຈຶ່ງຈະພຽງພໍ ແລະ ໝາກແຕງກໍຈະໄດ້ໜ່ວຍໃຫຍ່ ແລະ ສົມບູນ. ຈາກນັ້ນພໍໝາກແຕງເລີ່ມໃຫຍ່ກໍນຳເຊືອກຟາງມາມັດຂວັ້ນມັນຈ່ອງກັບຄ້າງໄວ້ເພື່ອແບ່ງເບົາການຈ່ອງຂອງໝາກແຕງເວລາໃຫຍ່ເຕັມທີ່.
ໄລຍະເກັບກູ້ໝາກແຕງນັບແຕ່ມື້ປູກຈົນເຖິງມື້ເກັບໝາກ ແມ່ນໃຊ້ເວລາ 2 ເດືອນເຕັມ ກໍຄື 60 ມື້ ກໍສາມາດເກັບໝາກແຕງອອກຂາຍໄດ້ ເຊິ່ງກ່ອນຈະເຖິງ 2 ເດືອນ 1-2 ອາທິດສຸດທ້າຍແມ່ນເຮົາຈະຫຼຸດການໃຫ້ນໍ້າມາເປັນອາທິດລະເທື່ອເພື່ອໃຫ້ໝາກແຕງມີລົດຊາດທີ່ຫວານ ແລະ ດິນກໍແຫ້ງ ເວລາເກັບກ່ຽວກໍຈະສະດວກ.
ສຳລັບຈຳນວນຜົນຜະລິດທີ່ໄດ້ 1 ໄລ່ປະມານ 4,5 ໂຕນ ເຊິ່ງລາຄາໂຕນ 1 ກໍປະມານ 7-9 ລ້ານກີບ.
