ເມືອບໍ່ດົນມານີ້, ທີ່ຫ້ອງການໂຄງການເກັບກູ້ລະເບີດ ປະຈໍາ ແຂວງຫຼວງພະບາງ ໄດ້ມີພິທີເປີດສູນຢ້ຽມຢາມ ໂຄງການເກັບກູ້ລະເບີດແຫ່ງຊາດຂຶ້ນໃຫ້ເປັນໜຶ່ງໃນສະຖານທີ່ລາຍການທີ່ນອນຢູ່ໃນລາຍການ(ແພັກເກດຈ໌) ທ່ອງທ່ຽວຢູ່ແຂວງຫຼວງພະບາງ ຂອງຫຼາຍບໍລິສັດທ່ອງທ່ຽວ, ໂດຍການເຂົ້າຮ່ວມຂອງທ່ານ ອານຸສັກ ພົງສາ ຜູ້ອຳນວຍການ ໂຄງການເກັບກູ້ລະເບີດແຫ່ງຊາດ.
ພາຍໃນສູນແຫ່ງນີ້ໄດ້ມີການຈັດວາງສະແດງຮາງລະເບີດລູກຫວ່ານ, ຮູບພາບ ແລະ ແຜ່ນແພ ທີ່ບອກເລົ່າເລື່ອງລາວ ຂອງຜູ້ທີ່ຖືກເຄາະຮ້າຍ ຈາກລະເບີດບໍ່ທັນແຕກ ທີ່ຕົກຄ້າງ ໂດຍຜ່ານການແກະສະລັກ ແລະ ການຕໍ່າແຜ່ນແພດ້ວຍຄວາມປານີດ ສະທ້ອນໃຫ້ເຫັນເຖິງຄວາມໂຫດຮ້າຍຂອງສົງຄາມ ແລະ ໄພຂົມຂູ່ ຈາກລະເບີດບໍ່ທັນແຕກທີ່ຕົກຄ້າງ ທີ່ປະຊາຊົນລາວບັນດາເຜົ່າຕ້ອງປະເຊີນ ເຖິງແມ່ນວ່າສົງຄາມຈະສິ້ນສຸດລົງ 50 ກວ່າປີແລ້ວກໍຕາມ, ການແກະສະຫຼັກແລະ ການຕ່ຳແຜນ ຍັງສະແດງໃຫ້ເຫັນສະພາບການດຳລົງຊີວິດ ຂອງປະຊາຊົນລາວ ໃນເຂດທີ່ມີລະເບີດບໍ່ທັນແຕກຕົກຄ້າງ ທີ່ຕົກຢູ່ໃນສະພາວະ ຄວາມຫຍຸ້ງຍາກ ຢ້ານກົວ ແລະ ໃນບາງກໍລະນີ ກໍ່ພົບກັບການສູນເສຍຕ່າງໆ (ກໍລະນີເກີດອຸປະຕິເຫດຈາກລະເບີດບໍ່ທັນແຕກທີ່ຕົກຄ້າງ).
ນອກຈາກນັ້ນ, ຍັງມີການວາງສະແດງບັນດາລູກລະເບີດເປົ່າ ທີ່ສາມາດທ້ອນໂຮມໄວ້ໄດ້ຈຳນວນໜຶ່ງເຊິ່ງເປັນລະເບີດທີ່ປອດໄພແລ້ວ ເພື່ອໃຫ້ບັນດາທ່ານໄດ້ເຫັນແຕ່ລະຊະນິດຂອງລະເບີດ ແລະ ສຳພະວຸດຕ່າງໆ ທີ່ຕົກຄ້າງຢູ່ ສປປ ລາວ. ພ້ອມກັນນັ້ນ, ຍັງໄດ້ມີການປັບປຸງຫ້ອງສາຍວີດີໂອ ເຊິ່ງຈະເປັນວີດີໂອທີ່ບອກເລົ່າເລື່ອງລາວ ກ່ຽວກັບ ປະຫວັດຂອງສົງຄາມອິນດູຈີນ ຄັ້ງທີ 2 ແລະ ຍັງມີວີດີໂອ ກ່ຽວກັບການເຄື່ອນໄຫວວຽກງານ ຂອງໂຄງການເກັບກູ້ລະເບີດແຫ່ງຊາດ.
ນອກຈາກນັ້ນ, ສູນຢ້ຽມຢາມແຫ່ງນີ້ ຍັງປະກອບສ່ວນສຳຄັນເຂົ້າໃນທຸລະກິດພາກການທ່ອງທ່ຽວ ແລະ ການບໍລິການ ຂອງ ສປປລາວ ເຊິ່ງນັບແຕ່ມື້ສ້າງຕັ້ງມາຮອດປະຈຸບັນ, ສູນຢ້ຽມຢາມແຫ່ງນີ້ໄດ້ຕ້ອນຮັບບັນດາຄະນະຜູ້ແທນ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດ ຈຳນວນທັງໝົດ 117,764 ຄົນ ສ່ວນໃຫຍ່ແມ່ນນັກທ່ອງທ່ຽວທີ່ມາແຕ່ບັນດາປະເທດໃນເຂດເອີຣົບ.
ຂ່າວ: ມີເດຍ
