ໃນວັນທີ 21 ສິງຫາ 2024 ນີ້, ທີ່ຫ້ອງວ່າການປົກຄອງແຂວງອັດຕະປື, ໄດ້ຈັດພິທີປະກາດການຈັດຕັ້ງຫົວໜ້າ ແລະ ຮອງຫົວໜ້າພາສີ ປະຈຳແຂວງອັດຕະປື ແລະ ຫົວໜ້າດ່ານພາສີສາກົນພູເກືອ; ໂດຍການເປັນປະທານຂອງທ່ານ ຄຳບຸນ ດວງພະບາງ ຄະນະປະຈຳພັກແຂວງ, ຮອງເລຂາພັກແຂວງ, ຜູ້ຊີ້ຂົງເຂດວຽກງານພັກ-ພະນັກງານ, ມີທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ, ຮອງຫົວໜ້າກົມພາສີ ກະຊວງການເງິນ, ຄະນະພັກ-ຄະນະພະແນກ ການ, ພະນັກງານວິຊາການກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.
ໃນພິທີທ່ານ ພູວັນ ໄຊຍະວົງ ຫົວໜ້າພະແນກ ຂອງກົມຈັດຕັ້ງ ແລະ ພະນັກງານ ໄດ້ຜ່ານຂໍ້ຕົກລົງຂອງລັດຖະມົນຕີກະຊວງການເງິນ ສະບັບເລກທີ 2930/ກງ, 19 ສິງຫາ 2024 ວ່າດ້ວຍການຍົກຍ້າຍ ແລະ ແຕ່ງຕັ້ງພະ ນັກງານຮັບໜ້າທີ່ໃໝ່ຢູ່ພາສີ ປະຈຳແຂວງອັດຕະປື, ລັດຖະມົນຕີກະຊວງການເງິນ: ຍົກຍ້າຍ ແລະ ແຕ່ງຕັ້ງ: ທ່ານ ແສງເພັດ ສີສຸລາດ ຫົວໜ້າພາສີ ປະຈຳແຂວງສາລະວັນ ເປັນຫົວໜ້າພາສີປະຈໍາແຂວງອັດຕະປື; ຍົກຍ້າຍ ແລະ ແຕ່ງຕັ້ງ: ທ່ານ ຄໍາໃບ ຈັນທະລັງສີ ຮອງຫົວໜ້າດ່ານພາສີສາກົນພູເກືອ ເປັນຮອງຫົວໜ້າພາສີ ປະຈໍາແຂວງອັດຕະປື; ດ່ານພາສີສາກົນພູເກືອຍົກຍ້າຍ ແລະ ແຕ່ງຕັ້ງ: ທ່ານ ສີມອນ ອຸທິຄຸນ ຮອງຫົວໜ້າພາສີ ປະຈຳແຂວງອັດຕະປື ເປັນຫົວໜ້າດ່ານພາສີສາກົນພູເກືອ.
ໃນພິທີດັ່ງກ່າວ ທ່ານ ຄຳບຸນ ດວງພະບາງ ຄະນະປະຈຳພັກແຂວງ, ຮອງເລຂາພັກແຂວງ ແລະ ຕາງໜ້າຄະນະນຳຈາກກົມຈັດຕັ້ງກະຊວງການເງິນ, ໄດ້ມີຄໍາເຫັນໂອ້ລົມຕໍ່ການປັບປຸງ, ສັບຊ້ອນ ແລະ ແຕ່ງຕັ້ງພະນັກງານຂັ້ນນໍາພາ-ຄຸ້ມຄອງຂອງພາສີປະຈໍາແຂວງ ແລະ ດ່ານພາສີພາສີສາກົນ. ໃນຄັ້ງນີ້, ຈົ່ງຕັ້ງໜ້າເສີມຂະຫຍາຍມູນເຊື້ອສາມັກຄີເປັນປຶກແຜ່ນ, ມູນເຊື້ອດຸໝັ່ນຂະຫຍັນໃນການປະຕິບັດໜ້າທີ່ວຽກງານທີ່ຖືກມອບໝາຍໃຫ້ມີຜົນສໍາເລັດໃໝ່ໃຫຍ່ຫຼວງກ່ວາເກົ່າຝຶກຝົນຫຼໍ່ຫຼອມກໍ່ສ້າງຕົນເອງໃຫ້ກ້າວຂຶ້ນເລື້ອຍໆ, ສືບຕໍ່ສ້າງໃຫ້ວຽກງານຂອງພັກ-ລັດມີຄວາມເຂັ້ມແຂງ, ຮັບປະກັນການປະຕິບັດໜ້າທີ່ໃນການຊີ້ນຳ-ນໍາພາໃນຂົງເຂດພາສີໃຫ້ມີຄວາມເປັນເອກະພາບ ແລະ ທຸກໜ້າທີ່ວຽກງານທີ່ຂັ້ນເທິງມອບໝາຍໃຫ້ມີຜົນສໍາເລັດ, ກໍາແໜ້ນຕໍ່ກັບແນວທາງການປ່ຽນແປງໃໝ່ຂອງພັກ, ກໍາແໜ້ນມະຕິຄໍາສັ່ງຕ່າງໆທີ່ຂັ້ນເທິງວາງອອກ, ເພື່ອພັດທະນາວຽກງານພາສີ ແລະ ດ່ານພາສີສາກົນພາຍໃນແຂວງອັດຕະປືໃຫ້ມີທ່າກ້າວຂະຫຍາຍຕົວດີຂຶ້ນກວ່າເກົ່າ.
ພາບ-ຂ່າວ: ກະຊວງການເງິນ
