ພິທີມອບ-ຮັບ ແລະ ເປີດນຳໃຊ້ໂຄງການກໍ່ສ້າງຂົວເບຕົງເສີມເຫລັກອັດແຮງ ຂ້າມນ້ຳເຊຈຳພອນ ເຂດບ້ານນາທົ່ມ ເມືອງອາດສະພອນ ແຂວງສະຫວັນນະເຂດ ຈັດຂຶ້ນໃນວັນທີ 20 ສິງຫາ 2024 ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ເຈົ້າແຂວງໆສະຫວັນນະເຂດ, ທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ ທ່ານ ບຸນລັດ ລໍບານເຢັນ ວ່າການເຈົ້າເມືອງໆອາດສະພອນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄຳຜອງ ສົມວິຈິດ ຫົວໜ້າພະແນກໂຍທາທິການ ແລະ ຂົນສົ່ງ (ຍທຂ) ແຂວງ ໄດ້ລາຍງານວ່າ: ໂຄງການກໍ່ສ້າງຂົວ ເບຕົງເສີມເຫລັກອັດແຮງ ຂ້າມນ້ຳເຊຈຳພອນ ເຂດບ້ານນາທົ່ມ ຈຸດສຸມນາເລົ່າ ເມືອງອາດສະພອນ ແມ່ນນອນຢູ່ໃນບຸລິມະສິດ ເພື່ອແກ້ໄຂການສັນຈອນໃຫ້ທຽວໄດ້ 2 ລະດູ ຕາມດຳລັດ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ.
ພ້ອມທັງເຫັນໄດ້ຈຳເປັນ ແລະ ຄວາມເປັນຫ່ວງເປັນໄຍຕໍ່ປະຊາຊົນການນຳແຂວງ ຈຶ່ງໄດ້ຕົກລົງກໍ່ສ້າງຂົວຂ້າມນໍ້າເຊຈຳພອນຈຸດດັ່ງກ່າວ ເພື່ອອຳນວຍຄວາມສະດວກ ແກ່ປະຊາຊົນຈຳນວນ 13 ບ້ານ, ໃນການເດີນທາງໄປ-ມາ, ຂົວດັ່ງກ່າວມີຄວາມຍາວ 100 ແມັດ, ກວ້າງ 5,5 ແມັດ, ມີ 4 ໄລຍະ, 5 ເສົາ ມູນຄ່າການກໍ່ສ້າງ 19,99 ຕື້ກວ່າກີບ ໂດຍແມ່ນບໍລິສັດ VLP ພັດທະນາກໍ່ສ້າງຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ໂດຍໃຊ້ເວລາກໍ່ສ້າງ 24 ເດືອນ (15/3/2024-15/3/2026), ແຕ່ການຈັດຕັ້ງປະຕິບັດຕົວຈິງທາງບໍລິສັດໄດ້ກໍ່ສ້າງສຳເລັດ 98,50% ສາມາດເປີດນຳໃຊ້ກ່ອນແຜນການ ຫລື ກ່ອນສັນຍາ 18 ເດືອນ. ໃນນີ້, ບໍລິສັດ VLP ໄດ້ປະກອບສ່ວນດອກໄຟແສງຕາເວັນ ຕິດຕັ້ງໃສ່ຂົວຈຳນວນ 9 ຊຸດ, ປັດຈຸບັນຍັງມີວຽກຈຳນວນໜຶ່ງທີ່ຍັງບໍ່ສຳເລັດຄື: ວຽກຖົມດິນຍົກລະດັບທາງເຂົ້າຂົວ, ວຽກກັນເຈື່ອນ, ວຽກແຜ່ນເບຕົງທາງເຂົ້າຂົວ, ທາງບໍລິສັດຈະສືບຕໍ່ພາຍຫລັງລະດູຝົນ ໃຫ້ສຳເລັດ 100% ພາຍໃນປີ 2024.
ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ບໍລິສັດ VLP ພັດທະນາກໍ່ສ້າງ ຈຳກັດຜູ້ດຽວ ທີ່ໄດ້ເອົາໃຈໃສ່ໃນການກໍ່ສ້າງໂຄງການ ຈົນສາມາດສຳເລັດກ່ອນແຜນການ ເຮັດໃຫ້ປະຊາຊົນ ຈຳນວນ 13 ບ້ານຂອງເມືອງອາດສະພອນ ໄດ້ຊົມໃຊ້ຂົວຂ້າມນ້ຳເຊຈຳພອນ ໃນໄລຍະລະດູຝົນປີນີ້ ຊຶ່ງເປັນເງື່ອນໄຂສຳຄັນໜຶ່ງ ທີ່ຈະນຳພາປະຊາຊົນໃຫ້ຫລຸດພົ້ນອອກຈາກຄວາມທຸກຍາກເທື່ອລະກ້າວ ພ້ອມທັງເນັ້ນໃຫ້ອຳນາດການປົກຄອງທ້ອງຖິ່ນ ນຳພາ-ຊີ້ນຳປະຊາຊົນທຳການຜະລິດໃຫ້ຫລາຍ ກາຍເປັນສິນຄ້າເທື່ອລະກ້າວ ເພື່ອຍົກລະດັບຊີວິດການເປັນຢູ່ໃຫ້ດີຂຶ້ນກວ່າເກົ່າ ແລະ ພ້ອມກັນນຳໃຊ້ຂົວແຫ່ງດັ່ງກ່າວນີ້ໃຫ້ເກີດປະໂຫຍດສູງສຸດ.
ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ຍັງໄດຢືນຢັນວ່າທາງແຂວງຈະຊ່ວຍຍົກລະດັບເສັ້ນທາງ ທີ່ເຊື່ອມຕໍ່ຈາກເມືອງເຂົ້າມາຂົວຂ້າມເຊຈຳພອນ ຕື່ມອີກ ຊຶ່ງຈະເລີ່ມຈັດຕັ້ງປະຕິບັດໃນລະດູແລ້ງຕໍ່ໜ້ານີ້.
