ສະພາການຄ້າ ແລະ ອຸດສາຫະກໍາແຫ່ງຊາດລາວ(ສຄອຊ ) ໄດ້ຈັດກອງປະຊຸມປືກສາຫາລືເພື່ອກຳນົດຊ່ອງວ່າງພາກປະຕິບັດຝືກງານຂະແໜງການລ້ຽງສັດຢູ່ ສປປ ລາວ ຂຶ້ນໃນວັນທີ 21 ສິງຫາ 2024, ທີ່ໂຮງແຮມແລນມາກ, ນະຄອນຫຼວງວຽງຈັນ ເປັນປະທານຂອງທ່ານ ນາງ ສຸໄພວັນ ທ່ຽງຈັນໄຊ ຄະນະບໍລິຫານງານ ສຄອຊ, ທ່ານ ໂມຮາມມັດ ໄຄຣູ ອີສລາມ ຜູ້ຈັດການໂຄງການສົ່ງເສີມວຽກເຮັດງານໃນຊົນນະບົດ ຢູ່ ສປປ ລາວ ມີຜູ້ຕ່າງໜ້າຈາກພາກລັດ, ຜູ້ປະກອບການລ້ຽງສັດເຂົ້າຮ່ວມ.
ທ່ານ ນາງ ສຸໄພວັນ ທ່ຽງຈັນໄຊ ກ່າວວ່າ: ໃນນາມຕາງໜ້າ ສຄອຊ ຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງທີ່ໄດ້ເຂົ້າເປັນປະທານຮ່ວມໃນກອງປະຊຸມປືກສາຫາລືເພື່ອກຳນົດຊ່ອງວ່າງພາກປະຕິບັດຝືກງານຂະແໜງການລ້ຽງສັດຢູ່ ສປປ ລາວ ໃນຄັ້ງນີ້, ເຊິ່ງກອງປະຊຸມ ແມ່ນໄດ້ຮັບການສະໜັບໜູນຈາກອົງການແຮງງານສາກົນ ILO .
ສຄອຊ ເປັ
ນອົງກອນສູງສຸດຂອງພາກທຸລະກິດ ແລະ ໃນນາມຕາງໜ້າຜູ້ໃຊ້ແຮງງານ ເຫັນໄດ້ເຖິງຄວາມສຳຄັນຂອງການເຜີຍແຜ່ຂໍ້ມູນຂ່າວສານ ແລະ ປະສານງານກັບບັນດາຄູ່ຮ່ວມງານທັງພາກລັດ, ພາກທຸລະກິດ; ໂດຍສະເພາະໃນຂະແໜງການລ້ຽງສັດທີ່ເຂົ້າຮ່ວມກອງປະຊຸມໃນຄັ້ງນີ້ ເພື່ອຮ່ວມກັນກຳນົດຊ່ອງວ່າງພາກປະຕິບັດງານໃນຂະແໜງການລ້ຽງສັດເຊິ່ງຈະໄດ້ປືກສາຫາລື ແລະ ແລກປ່ຽນຂໍ້ມູນຂ່າວສານກ່ຽວກັບພາກປະຕິບັດ ການຝືກງານໃນບັນດາບໍລິສັດ ແລະ ສະຖານປະກອບການ. ນອກນັ້ນ, ຈະໄດ້ແລກປ່ຽນກ່ຽວກັບພາບລວມຂອງການຝຶກງານ ໂດຍສະເພາະບັນດາຂະແໜງທຸລະກິດ ທີ່ໄດ້ຮ່ວມມື ກັບສະຖານອາຊີວະສືກສາ ແລະ ໂຮງຮຽນຕ່າງໆ ໃນການຈັດການຮຽນການສອນ ຂອງການຝຶກງານ ແລະ ຝຶກອົບຮົມຕ່າງໆ. ນອກນັ້ນ, ໃນກອງປະຊຸມຍັງຈະໄດ້ປືກສາຫາລື, ແລກປ່ຽນກ່ຽວກັບໂອກາດ, ສິ່ງທ້າທາຍໃນແຜນງານທີ່ໄດ້ຈັດຕັ້ງປະຕິບັດໃນໄລຍະຜ່ານມາ ແລະ ແຜນການຮ່ວມມືສົ່ງເສີມໃນຕໍ່ໜ້າ ຮ່ວມກັບບັນດາຂະແໜງການລ້ຽງສັດ ແລະ ຄູ່ຮ່ວມງານ ໃນການຈັດຕັ້ງ ແລະ ຮ່ວມມືເພື່ອສົ່ງເສີມວຽກງານທີ່ຕິດພັນ.
ທ່ານ ໂມຮາມມັດ ໄຄຣູ ອີສລາມ ກ່າວວ່າ: ຄວາມສໍາຄັນຂອງພາກປະຕິບັດຝືກງານ ສາມາດສ້າງພະນັກງານບຸກຄະລາກອນທີ່ມີຄຸນນະພາບຕອບສະໜອງໃຫ້ຫົວໜ່ວຍຜູ້ປະກອບການໂດຍສະເພາະການລ້ຽງສັດໃນ ສປປ ລາວ, ໂດຍການພັດທະນາລະບົບການຝືກອົບຮົມ ໂດຍຂັບເຄື່ອນຕາມຄວາມຕ້ອງການຂອງຕະຫຼາດ ໂດຍສະເພາະແມ່ນຫົວໜ່ວຍທຸລະກິດທີ່ຕ້ອງການແຮງງານທີ່ມີສີມືໃນການສ້ຽງສັດ ໃຫ້ສາມາດເຊື່ອມໂຍງກັນ ເຮັດໃຫ້ຜູ້ມີສີມືມີວຽກເຮັດງານທໍາ ໃນຂົງເຂດຊົນນະບົດ ຫຼື ສະຖານທີ່ປະກອບການຕ່າງໆ.
ທ່ານ ຂັນທອງ ສີປະເສີດ ປະທານສະຫະກອນ 3F ກະສິກໍາຍືນຍົງຂອງລາວ ກ່າວວ່າ: ການເຂົ້າຮ່ວມກ້ອງປະຊຸມຄັ້ງນີ້ມີຄວາມສໍາຄັນຫຼາຍ ເຊິ່ງມີຜູ້ປະກອບການຂະແໜງກະສິກໍາ ໃນຂະແໜງການຕ່າງໆ ໃນຂອບເຂດທົ່ວປະເທດ ເຊິ່ງຈະໄດ້ມາແລກປ່ຽນ ປຶກສາຫາລືກັນ ໃນການ ສ້າງຜູ້ບໍລິການໃນການຝືກງານ ເປົ້າໝາຍກໍເພື່ອ ຢາກໃຫ້ທຸກຄົນໄດ້ໄປເຮັດວຽກໂຕຈິງກັບພວກເຮົາ ສ້າງທັກສະສືມື ຄວາມຊໍານານສະເພາະດ້ານ ເພື່ອຈະໄດ້ສືບຕໍ່ເຮັດວຽກຮ່ວມກັບຟາມຂອງພວກເຮົາ ຫຼື ກັບຄືນໄປເຮັດວຽກໃນທ້ອງຖິ່ນຂອງຕົນ.
