ສະໂມສອນດອກປີກໄກ່ ແລັບດອກ ແຊັມເກົ່າ ຕັ້ງເປົ້າຍາດ 8 ຫຼຽນຄໍາ ເພື່ອຮັບປະກັນການປ້ອງກັນແຊັມໃນການແຂ່ງຂັນກີລາດອກປີກໄກ່ລາຍກາຍໃຫຍ່ທີ່ສຸດໃນສປປ ລາວ ກັບລາຍການ 23rd Beerlaos badminton Championship 2024 ໂດຍມີການຊີງໄຊເຖິງ 17 ລາຍການ ລະຫວ່າງວັນທີ 22-25 ສິງຫາ 2024 ທີ່ສະໜາມດອກປີກໄກ່ໃນຮົ່ມ ເສດຖາ ( ເຂດບຶງຂະຫຍອງ ) ນະຄອນຫຼວງວຽງຈັນ ສປປ ລາວ
ເມື່ອຕອນເຊົ້າວັນທີ 21 ສິງຫາ 2024 ທີ່ສະມສອນດອກປີກໄກ່ໃນຮົ່ມ ເສດຖາ ທ່ານ ດາວເພັດ ສີຣິແສງ ຫົວໜ້າຄູຝຶກສະໂມສອນ ດອກປີກໄກ່ ແລັບດອກ ໃຫ້ສຳພາດວ່າ: ທີ່ຈິງແລ້ວ ສະໂມສອນ ແລັບດອກ ໄດ້ມີການຝຶກຊ້ອມນັກກິລາຢ່າງເປັນປົກກະຕິມາແຕ່ຕົ້ນປີ 2024 ເປັນຕົ້ນມາ ໂດຍລວມແລ້ວກໍມີຄວາມເຕັມທີ່ທີ່ຈະເຂົ້າຮ່ວມແຂ່ງຂັນໃນລາຍການດັ່ງກ່າວ ໂດຍພວກເຮົາຈະສົ່ງນັກກິລາເຂົ້າຮ່ວມທັງໝົດເກືອບ 60 ຄົນ ຈາກ 13 ລາຍການ ປີນີ້ ຖືວ່າເປັນປີທີ່ໃຫຍ່ອີກປີໜຶ່ງ ພວກເຮົາສົ່ງນັກກິລາຫຼາຍກວ່າປີຜ່ານມາ ເກືອບ 2 ເທົ່າ ແລະ ໃນການເຂົ້າຮ່ວມງານດັ່ງກ່າວ ພວກເຮົາກໍມີເປົ້າໝາຍໃນການປ້ອງກັນແຊັມໃຫ້ໄດ້ສະໄໝທີສອງ ໂດຍວາງຄາດໝາຍຈະສູ້ຊົນໃຫ້ໄດ້ 8 ຫຼຽນຄຳ, ໃນນີ້ ກໍມີຄວາມຫວັງທີ່ຮຸ່ນທົ່ວໄປ ເພາະນັກກິລາຂອງສະໂມສອນພວກເຮົາສ່ວນໃຫຍ່ແມ່ນຕິດທີມຊາດຈຳນວນຫຼາຍ ສ່ວນນັກກິລາເຍົາວະຊົນອີກຈຳນວນໜຶ່ງກໍມີຄວາມຫວັງ. ແນວໃດກໍດີ, ສຳລັບຄູ່ແຂ່ງຂັນ ຄືຮູ້ກັນແລ້ວວ່າທຸກໆປີ ມັນກໍຍາກແຕກຕ່າງກັນໄປ ເພາະທຸກໆສະໂມສອນໃນທົ່ວປະເທດໄດ້ມີການຝຶກຊ້ອມຢ່າງເອົາຈິງເອົາຈັງ ແລະ ມີການກຽມຕົວມາດີ ເພື່ອເປົ້າໝາຍແຊັມ ການເປັນແຊັມມັນຍາກແລ້ວ ແຕ່ການປ້ອງກັນແຊັມຍິ່ງຍາກກວ່າຫຼາຍ ແຕ່ພວກເຮົາກໍຈະພະຍາຍາມສູ້ໃຫ້ເຕັມທີ່.
ສຳລັບຮຸ່ນທີ່ພວກເຮົາບໍ່ເຄີຍສົ່ງມາກ່ອນ ກໍໜ້າຈະແມ່ນຮຸ່ນອາຍຸ 35 ປີ ເພາະພວກເຮົາບໍ່ໄດ້ເນັ້ນການພັດທະນານັກກິລາໃນຮຸ່ນນີ້ ໂດຍສ່ວນໃຫຍ່ຈະມີແຕ່ນັກກິລາຮຸ່ນສະໝັກຫຼິ້ນ ຄືຮູ້ກັນແລ້ວວ່າ ສະໂມສອນພວກເຮົາກໍ່ຕັ້ງຂຶ້ນມາ ກໍມີຄວາມມຸ້ງຫວັງຢາກຈະພັດທະນາກິລາດອກປີກໄກ່ລາວ ໃຫ້ກ້າວເປັນອາຊີບ ເລີ່ມຈາກຕົວຂ້າພະເຈົ້າເອງກໍເປັນນັກກິລາມາໃນສົກສະໄໝນັ້ນ ມາຮອດປັດຈຸບັນນີ້ ກໍຍັງບໍ່ສາມາດຫັນປ່ຽນເປັນອາຊີບໄດ້ເທື່ອແຕ່ໃນອະນາຄົດອັນໃກ້ນີ້ ພວກເຮົາກໍກຳລັງພັດທະນາ ໂດຍໄດ້ຂຽນນະໂຍບາຍຕ່າງໆເພື່ອຈະສະເໜີຫາສະຫະພັນເພື່ອຈະມາປັບປ່ຽນພັດທະນາວົງການກິລານີ້ໃຫ້ມາເປັນອາຊີບໄດ້.
“ ນອກຈາກການແຂ່ງຂັນລາຍການເບຍລາວ ແຊັມປ້ຽນຊິບນີ້ແລ້ວ ສະໂມສອນພວກເຮົາກໍຍັງມີເປົ້າໝາຍຈະເຂົ້າຮ່ວມແຂ່ງຂັນງານກິລານັກຮຽນທົ່ວປະເທດ ຊຶ່ງຈະໄດ້ຕາງໜ້າຊາວນະຄອນຫຼວງວຽງຈັນ ເຂົ້າຮ່ວມງານດັ່ງກ່າວ. ນອກນັ້ນ, ກໍຍັງມີງານອິນດໍເກມ ຈະຈັດຂຶ້ນທີ່ປະເທດໄທ ຊຶ່ງມີ 100 ກວ່າປະເທດເຂົ້າຮ່ວມ ຊຶ່ງພວກເຮົາກໍໄດ້ກຽມນັກກິລາ 4 ຄົນ ຊາຍ 3 ຍິງ 1. ຂະນະທີ່ປີໜ້າ ກໍຍັງຈະມີງານແຂ່ງຂັນລາຍການລະດັບອາຊີບຫຼາຍຂຶ້ນ ຊຶ່ງທາງສະໂມສອນພວກເຮົາຈະສະໜັບສະໜູນນັກກິລາຢ່າງເຕັມທີ່ເພື່ອໃຫ້ໄດ້ເຂົ້າຮ່ວມງານຕ່າງໆ ເພື່ອສ້າງໂອກາດໃຫ້ເຂົາເຈົ້າໄດ້ສະສົມຄະແນນ ເພື່ອລຸ້ນໃນການເຂົ້າຮ່ວມງານກິລາໂອແລມປິກ ອີກ 4 ປີຂ້າງໜ້າ ” ຫົວໜ້າຄູຝຶກສະໂມສອນ ດອກປີກໄກ່ ແລັບດອກ ກ່າວ.
ສຸດທ້າຍຂໍຝາກສະແດງຄວາມຂອບໃຈມາຍັງບັນດາພາກສ່ວນທີ່ໃຫ້ການສະໜັບສະໜູນ ໂດຍສະເພາະບໍລິສັດ ເຄບີເອວລາວ ອິນເຕີເນເຊິນນອລ ຄອນຊາວຕີ້ງ ເຊີວິດ ຫຼື ທີ່ປຶກສາເລື່ອງການເງິນສາກົນ. ບໍລິສັດ ຈະເລີນຊັບ ພັດທະນາກໍ່ສ້າງ ແລະ ຂົວທາງ ຈຳກັດຜູ້ດຽວ, ເຄດີດີ ຊາເລັກ ແລະ ສະໂມສອນ ດອກປີກໄກ່ ເຊດຖາ ແລະ ຂໍຝາກເຖິງນັກກິລາ ຕະຫຼອດຮອດຜູ້ຊົມ-ເຊຍ ຈາກທຸກພາກສ່ວນເຂົ້າມາຮ່ວມຊົມ-ເຊຍ ວ່າກິລາດອກປີກໄກ່ ໄດ້ມີການພັດທະນາຮອດໃສແລ້ວ ສ່ວນນັກກິລາຂອງສະໂມສອນພວກເຮົາກໍຈົ່ງພ້ອມກັນເຮັດໃຫ້ເຕັມທີ່ຈົດຈໍເຂົ້າໃນການແຂ່ງຂັນ ເພື່ອສ້າງຜົນງານໃຫ້ສຳເລັດຕາມເປົ້າໝາຍທີ່ວາງໄວ້.
ສໍາລັບ ການແຂ່ງຂັນໃນຄັ້ງນີ້ມີ 17 ລາຍການປະກອບມີ:
+ຮຸ່ນເຍົາວະຊົນ 10 ລາຍການຄື: ດ່ຽວເຍົາວະຊົນຊາຍ 13 ປີ, ດ່ຽວເຍົາວະຊົນຍິງ 13 ປີ, ດຽ່ວເຍົາວະຊົນຊາຍ 15 ປີ, ດ່ຽວເຍົາວະຊົນຍິງ 15 ປີ, ຄູ່ເຍົາວະຊົນຊາຍ 15 ປີ, ດ່ຽວເຍົາວະຊົນຊາຍ 17 ປີ, ດ່ຽວເຍົາວະຊົນຍິງ 17 ປີ ແລະ ຄູ່ປະສົມ 17 ປີ.
-ຮຸ່ນຊາວໜຸ່ມ-ທົ່ວໄປ 7 ລາຍການຄື: ດ່ຽວຊາຍທົ່ວໄປ, ດ່ຽວຍິງທົ່ວໄປ, ຄູ່ຊາຍທົ່ວໄປ, ຄູ່ປະສົມທົ່ວໄປ, ຄູ່ສະໝັກຫຼິ້ນຊາຍ ( ສາຍ ຂ ) ແລະ ຄູ່ຊາຍອາຍຸລວມ 70 ປີຂຶ້ນໄປ ( ນັກກີລາແຕ່ລະຄົນຕ້ອງມີອາຍຸ 35 ປີຂຶ້ນໄປ ).
ຂ່າວ-ຮູບ: Larh Creators
