ວັນທີ 20 ສິງຫາ 2024 ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ, ໄດ້ມີກອງປະຊຸມພົບປະ ປຶກສາຫາລື ລະຫວ່າງ ສະມາຄົມທຸລະກິດ ກະສິກຳລາວ ໂດຍມີປະທານ, ຮອງປະທານ ແລະ ຄະນະບໍລິຫານສະມາຄົມ ພ້ອມດ້ວຍຕົວແທນຂອງກຸ່ມຜູ້ປະກອບການສວນຖົ່ວລຽນລາວ ແລະ ຄະນະນັກທຸລະກິດຜູ້ນຳເຂົ້າສິນຄ້າກະສິກຳ ຈາກ ສປ ຈີນ. ຈຸດປະສົງຂອງການປະຊຸມແມ່ນເພື່ອຮັບຟັງຂໍ້ມູນຈາກຝ່າຍລາວກ່ຽວກັບການປູກຖົ່ວລຽນໃນ ສປປ ລາວ ແລະ ຝ່າຍຈີນ ໄດ້ນຳສະເໜີຄວາມຕ້ອງການຊື້ສິນຄ້າກະສິກຳ “ໝາກຖົ່ວລຽນ” ຂອງ ສປ ຈີນ.
ທ່ານ ບຸນທ່ຽງ ລັດຕະນະວົງ ປະທານສະມາຄົມທຸລະກິດກະສິກຳລາວ ໄດ້ນຳສະເໜີບົດບາດ ໜ້າທີ່ຂອງສະມາຄົມທຸລະກິດກະສິກຳລາວ ທີ່ເປັນຕົວແທນຂອງຜູ້ປະກອບການກະສິກຳ ເຊິ່ງປະກອບມີຜູ້ປະກອບການທຸລະກິດກະສິກຳຫຼາຍຂະ ແໜງການ ທັງຂະແໜງການປູກຝັງ, ລ້ຽງສັດ, ການປະມົງ, ການປຸງແຕ່ງສິນຄ້າກະສິກຳ ແລະ ຜູ້ສະໜອງປັດໄຈກະສິກຳ; ເຊິ່ງກຸ່ມຜູ້ປະກອບການສວນຖົ່ວລຽນກໍ່ແມ່ນກຸ່ມໜຶ່ງທີ່ຂຶ້ນກັບສະມາຄົມທຸລະກິດກະສິກຳລາວ, ສປປ ລາວ ມີເນື້ອທີ່ທັງໝົດ 236,800 ກິໂລຕາແມັດ, ມີປະຊາກອນປະມານ 7 ລ້ານກວ່າຄົນ ເຫັນວ່າເມື່ອທຽບກັນລະຫວ່າງເນື້ອທີ່ໃສ່ປະຊາກອນເຫັນວ່າພວກເຮົາມີເນື້ອທີ່ກວ້າງໃຫຍ່ຫຼາຍ ນອກນີ້ແຜ່ນດິນລາວຍັງມີຄວາມອຸດົມສົມບູນ, ມີແມ່ນ້ຳລຳເຊນ້ອຍ-ໃຫຍ່ຫລາຍສາຍໃນທົ່ວປະເທດ, ໃນອະດີດປະເທດ ສປປ ລາວ ຖືໄດ້ວ່າຍັງມີຂໍ້ຫຍຸ້ງຍາກຫຼາຍດ້ານທີ່ຍັງບໍ່ອຳນວຍຄວາມສະດວກຕໍ່ການຄ້າຂາຍກັບສາກົນ ໂດຍສະເພາະແມ່ນບໍ່ມີທາງອອກສູ່ທະເລ ເຮັດໃຫ້ເສຍປຽບຄ່າຂົນສົ່ງ ແລະ ບໍ່ສາມາດແຂ່ງຂັນກັບສິນຄ້າຈາກປະເທດອື່ນໄດ້ ເຮັດໃຫ້ສິນຄ້າກະສິກຳຂອງ ສປປ ລາວ ບໍ່ພົ້ນເດັ່ນເທົ່າທີ່ຄວນ. ແຕ່ມາປັດຈຸບັນນີ້ ລັດຖະບານ ສປປ ລາວ ແລະ ລັດຖະບານ ສປ ຈີນ ໄດ້ລົງທຶນໃສ່ການສ້າງໂຄງລ່າງພື້ນຖານທີ່ສຳຄັນນັ້ນຄື ເສັ້ນທາງລົດໄຟ ລາວ-ຈີນ ເຮັດໃຫ້ສິນຄ້າຂອງສປປ ລາວ ມີທາງເຊື່ອມຈອດກັບຕະຫຼາດໃຫຍ່ດັ່ງ ສປ ຈີນ, ນອກນີ້ລັດຖະບານກໍ່ໄດ້ເອົາໃຈໃສ່ປັບປຸງບັນດານິຕິກຳ, ລະບຽບການທີ່ກ່ຽວຂ້ອງທີ່ມີລັກສະນະຊຸກຍູ້-ສົ່ງເສີມແກ່ພາກການຜະລິດ, ການປຸງແຕ່ງ ແລະ ການສົ່ງອອກສິນຄ້າກະສິກຳຢ່າງແຂງແຮງ ມາຮອດປັດຈຸບັນ ລັດຖະບານ ສປປ ລາວ ກໍ່ຄືກະຊວງກະສິກຳ ແລະ ປ່າໄມ້ ກໍ່ໄດ້ສຳເລັດການເຈລະຈາການຊື້-ຂາຍສິນຄ້າກະສິກຳກັບ ສປ ຈີນ ໄດ້ຫລາຍກວ່າ 33 ລາຍການແລ້ວ ນັ້ນແມ່ນບາດກ້າວການເຕີບໃຫຍ່ຂອງວຽກງານການຜະລິດກະສິກຳເປັນສິນຄ້າຂອງ ສປປ ລາວ, ສຳລັບ ໝາກຖົ່ວລຽນລາວ ຄວາມຈິງແລ້ວລາວມີໝາກຖົ່ວລຽນມາດົນນານແລ້ວ ແຕ່ການຜະລິດເປັນສິນຄ້າສົ່ງອອກຍັງບໍ່ທັນພົ້ນເດັ່ນຍ້ອນບາງຂໍ້ຫຍຸ້ງຍາກດັ່ງກ່ວໃນໄລຍະຜ່ານມາ ແຕ່ປັດຈຸບັນຂະບວນການຜະລິດໝາກຖົ່ວລຽນເພື່ອເປັນສິນຄ້າກຳລັງມີທ່າກ້າວທີ່ແຂງແຮງ ແລະ ມີຄວາມເປັນມືອາຊີບ.
ທ່ານ ເອລາວັນ ລາດປາກດີ ຕົວແທນຜູ້ປະກອບການສວນຖົ່ວລຽນ ລາວ ໄດ້ລາຍງານໃຫ້ຊາບວ່າ: ປັດຈຸບັນນີ້ໃນກຸ່ມທີ່ຢູ່ໃນສະມາຄົມມີ 170 ສວນ ມີເນື້ອທີ່ທັງໝົດ 20.000 ຮຕ ໃນນີ້ມີຈຳນວນໜຶ່ງທີ່ເລີ່ມເກັບກ່ຽວແລ້ວມີຈຳນວນ 10.000 ກວ່າຕົ້ນ, ມີຜົນຜະລິດປະມານ 900 ໂຕນ, ເປົ້າຫມາຍໃນປີ 2029 ຄາດວ່າຈະເກັບກ່ຽວປະມານ 270.000 ຕົ້ນ, ຄາດວ່າຈະເກັບກ່ຽວໄດ້ 24.300 ໂຕນ ຄາດຄະເນມູນຄ່າ 155.520.000 ໂດລາສະຫະລັດ. ໃນກຸ່ມຜູ້ປະກອບການຊາວສວນຖົ່ວລຽນລາວຍັງມີຜູ້ຊ່ຽວຊານກ່ຽວກັບການປູກ ແລະ ດູແລສວນຖົ່ວລຽນແບບມືອາຊີບ.
ທ່ານ ດວງດາວອນ ສຸລະຍະວົງສາ ຫຼື ອາຈານເນ້ ຖົ່ວລຽນລາວ ແມ່ນນັກວິຊາການທີ່ມີປະສົບການສູງ ເຮັດວຽກຕົວຈິງໃນການຜະລິດໝາກຖົ່ວລຽນເປັນສິນຄ້າສົ່ງອອກ ເຊິ່ງໄດ້ເຮັດວຽກຕົວຈິງຢູ່ປະເທດໄທເກືອບ 20 ປີ ແລະ ໄດ້ກັບຄືນປະເທດມາເຮັດສວນໝາກຖົ່ວລຽນຢູ່ປະເທດລາວ ຈາກປະສົບການອັນຍາວນານອາຈານເນ້ ແລະ ປະຕິບັດຕົວຈິງຢູ່ລາວເຫັນວ່າໄດ້ຜົນດີຈຶ່ງມີຄວາມໝັ້ນໃຈວ່າສິນຄ້າໝາກຖົ່ວລຽນລາວຈະເປັນສິນຄ້າປາຍແຫຼມທີ່ສຳຄັນໃນການສົ່ງອອກໄປຂາຍຢູ່ຕ່າງປະເທດເພື່ອນຳເອົາເງິນຕາເຂົ້າປະເທດໄດ້ເປັນຢ່າງດີ.
ທ່ານ ເຖົາ ຈ້ຽນ ນັກລົງທຶນຈາກ ສປ ຈີນ ທີ່ມາລົງທຶນເຮັດສວນໝາກຖົ່ວລຽນຢູ່ ສປປ ລາວ ໄດ້ກ່າວວ່າ: ເພິ່ນໄດ້ເອົາແນວພັນມາຈາກປະເທດມາເລເຊຍ ມາຕໍ່ກັບຕົ້ນໝາກຖົ່ວລຽນພື້ນເມືອງຂອງລາວ ເຊິ່ງຕົ້ນໝາກຖົ່ວລຽນໃນສວນຂອງເພິ່ນເລີ່ມໃຫ້ໝາກແລ້ວ ເຫັນວ່າຄຸນນະພາບດີຫຼາຍ ທ່ານຍັງໄດ້ເວົ້າອີກວ່າທີ່ດິນຂອງລາວເປັນທີ່ດິນທີ່ມີຄວາມອຸດົມສົມບູນ ມີຄວາມເໝາະສົມໃນການປູກໝາກຖົ່ວລຽນເປັນສິນຄ້າ; ທ່ານ ຫວານຈີ່ນ ນັກທຸລະກິດຜູ້ນຳເຂົ້າສິນຄ້າກະສິກຳ ໂດຍສະເພາະໝາກຖົ່ວລຽນ ລາຍງານໃຫ້ຮູ້ວ່າ ຕາມຕົວເລກສະຖິຕິຂອງກົມໃຫຍ່ພາສີຂອງ ສປ ຈີນ ໃຫ້ຮູ້ວ່າ ໃນປີ 2022 ປະເທດຈີນນຳເຂົ້າໝາກຖົ່ວລຽນ 800.000ໂຕນ, ປີ 2023 ນຳເຂົ້າຈຳນວນ 1.300.000ໂຕນ, ສຳລັບປີ 2024 ເຄິ່ງປີ ນຳເຂົ້າປະມານ 1.400.000ໂຕນ ຄາດວ່າຫມົດປີ 2024 ຈະມີສູງເຖິງ 2.300.000ໂຕນ; ຈາກໂຕເລກສະຖິຕິດັ່ງກ່າວ ເຫັນໄດ້ວ່າຄົນຈີນມີຄວາມນິຍົມບໍລິໂພກໝາກຖົ່ວລຽນສູງຂຶ້ນຢ່າງຕໍ່ເນື່ອງ. ສຳລັບປະເທດຈີນ ເຂດທີ່ສາມາດປູກໝາກຖົ່ວລຽນໄດ້ແມ່ນຢູ່ເຂດເກາະໄຫໜານ ປັດຈຸບັນນີ້ກໍ່ມີການປູກຫຼາຍສົມຄວນແຕ່ທຽບກັບຄວາມຕ້ອງການຂອງຕະຫຼາດແລ້ວແມ່ນຍັງບໍ່ພຽງພໍ ເຊິ່ງການນຳເຂົ້າສ່ວນຫຼາຍແມ່ນນຳເຂົ້າຈາກປະເທດໄທ, ມາເລເຊຍ, ຫວຽດນາມ. ທ່ານຍັງໄດ້ມີຄຳເຫັນ ແລະ ຄຳແນະນຳວ່າໝາກຖົ່ວລຽນລາວກໍ່ມີໂອກາດສູງທີ່ຈະເຂົ້າໄປຂາຍຢູ່ປະເທດຈີນ ແຕ່ຜູ້ປະກອບການລາວຍັງຕ້ອງໄດ້ເຮັດວຽກອີກຫຼາຍຢ່າງເພື່ອໃຫ້ສິນຄ້າ (ໝາກຖົ່ວລຽນລາວ) ໄດ້ມາດຕະຖານຕາມເງື່ອນໄຂຂອງລະບຽບກົດໝາຍຂອງປະເທດຈີນ ຜູ້ປະກອບການສວນຖົ່ວລຽນລາວຕ້ອງເອົາໃຈໃສ່ສ້າງມາດຕະຖານຕັ້ງແຕ່ການປູກ, ການບົວລະບັດດູແລ, ການປ້ອງກັນສັດຕູພືດ, ການເກັບກ່ຽວ, ການເກັບຮັກສາ, ການປຸງແຕ່ງ-ການຫຸ້ມຫໍ່ ແລະ ການຂົນສົ່ງ ແຕ່ລະຂະບວນການຕ້ອງມີມາດຕະຖານ ຜູ້ປະກອບການສວນຖົ່ວລຽນລາວເຖິງຈະຍັງໃໝ່ເມື່ອທຽບກັບຫຼາຍປະເທດ ແຕ່ເຮົາເລີ່ມໃໝ່ເຮົາກໍ່ຄວນເລີ່ມຕົ້ນດ້ວຍສິ່ງທີ່ດີເລີຍ; ທ່ານຍັງແນະນຳຕື່ມວ່າ ຜູ້ປະກອບການສວນຖົ່ວລຽນລາວຄວນໂຮມໂຕກັນເປັນສະມາຄົມໃນການເຮັດວຽກຮ່ວມກັນເພື່ອສ້າງມາດຕະຖານດັ່ງກ່າວ ນອກນີ້ຍັງຕ້ອງໄດ້ປະສານພົວພັນກັບພາກລັດໃນການສະເໜີໃຫ້ລັດຖະບານໄດ້ພິຈາລະນາສະເໜີສິນຄ້າໝາກຖົ່ວລຽນເຂົ້າຢູ່ໃນລາຍການທີ່ຈະເຈລະຈາກັບລັດຖະບານຈີນ ພ້ອມກັນນັ້ນກໍ່ຕ້ອງໄດ້ດຳເນີນການກະກຽມປະສານງານເພື່ອຂໍອະນຸຍາດຈາກກົມໃຫຍ່ພາສີ ສປ ຈີນ ເຊິ່ງວຽກງານດັ່ງກ່າວລ້ວນແຕ່ໃຊ້ເວລາພໍສົມຄວນ ດັ່ງນັ້ນ, ຜູ້ປະກອບການສວນຖົ່ວລຽນຈຳເປັນຕ້ອງເຮັດວຽກລວມໝູ່.
ທ່ານ ບົວຈັນ ສີຫາວົງ ຮອງປະທານສະມາຄົມທຸລະກິດກະສິກຳລາວ ທັງເປັນຜູ້ອຳນວຍການລັດວິສາຫະກິດບໍລິການກະສິກຳ ໄດ້ກ່າວເພີ່ມຕື່ມວ່າ: ສະພາບປັດຈຸບັນແມ່ນມີຄວາມເໝາະສົມ ແລະ ເອື້ອອຳນວຍທີ່ສຸດ ທີ່ລັດຖະບານໄດ້ແກ້ບັນຫາຂໍ້ຫຍຸ້ງຍາກໄດ້ຫລາຍແລ້ວ ເປັນຕົ້ນແມ່ນເສັ້ນທາງຄົມມະນາຄົມຂົນສົ່ງ, ບັນດາລະບຽບ ແລະ ນິຕິກຳທີ່ກ່ຽວຂ້ອງ ທັງນະໂຍບາຍຂອງລັດຖະບານທີ່ມີການສົ່ງເສີມການຜະລິດກະສິກຳເປັນສິນຄ້າຢ່າງແຂງແຮງ. ດັ່ງນັ້ນ, ເຫັນໄດ້ວ່າທຸກຢ່າງມີຄວາມພ້ອມຫຼາຍແລ້ວຍັງແຕ່ການຮ່ວມມືລະຫວ່າງສອງຝ່າຍລາວ-ຈີນ ຮ່ວມມືກັນ ເຮັດວຽກຮ່ວມກັນເພື່ອກະກຽມ ແລະ ສ້າງເງື່ອນໄຂອຳນວຍຄວາມສະດວກໃຫ້ແກ່ການສົ່ງສິນຄ້າກະສິກຳເວົ້າລວມ ເວົ້າສະເພາະແມ່ນໝາກຖົ່ວລຽນລາວ ໃຫ້ສາມາດເຂົ້າໄປຂາຍຢູ່ ສປ ຈີນ ໄດ້ນັບມື້ນັບຫຼາຍຂຶ້ນ ໃຫ້ການຮ່ວມມືລະຫວ່າງລາວ ແລະຈີນ ມີຄວາມຍືນຍົງຕະຫຼອດໄປ.
