ໃນວັນທີ 20 ສິງຫາ 2024 ສະຫະພັນແມ່ຍິງ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມທາບທາມບຸກຄະລາກອນ ຮອບທີ 2 ເພື່ອກະກຽມໃຫ້ແກ່ ກອງປະຊຸມໃຫຍ່ ຄັ້ງທີ IX ຂອງສະຫະພັນແມ່ຍິງກະຊວງ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທີ່ຫໍວັດທະນະທໍາແຫ່ງຊາດ. ໂດຍການເຂົ້າຮ່ວມເປັນປະທານຂອງທ່ານ ນາງ ສວນສະຫວັນ ວິຍາເກດ ລັດຖະມົນຕີ ກະຊວງ ຖວທ, ທ່ານ ນາງ ວຽງທອງ ພິມມະຈັນ ຮອງປະທານຄະນະບໍລິຫານງານ ສະຫະພັນແມ່ຍິງ (ສຍ) ກະຊວງ ຖວທ, ທ່ານ ນາງ ດາລານີ ພົມມະວົງສາ ຮອງປະທານຄະນະບໍລິຫານງານ ສຍ ກະຊວງ ຖວທ ພ້ອມດ້ວຍບັນດາສະມາຊິກສະຫະພັນແມ່ຍິງປິ່ນອ້ອມກະຊວງ ຖວທ ເຂົ້າຮ່ວມ.
ທ່ານ ນາງ ວຽງທອງ ພິມພະຈັນ ຮອງປະທານຄະນະບໍລິຫານງານ ສຍ ກະຊວງ ຖວທ ກ່າວບາງຕອນວ່າ: ຈຳນວນພະນັກງານ-ລັດຖະກອນທັງໝົດ ຢູ່ຂັ້ນສູນກາງ ລວມມີ 1.432 ຄົນ, ຍິງ 601 ຄົນ, ກວມ 41,96% ຂອງຈຳນວນທັງໝົດຢູ່ຂັ້ນສູນກາງ, ຈຳນວນສະມາຊິກພັກທັງໝົດ 978 ສະຫາຍ, ສະມາຊິກພັກເພດຍີງ 379 ສະຫາຍ ກວມເອົາ 38,39% ຂອງຈຳນວນສະມາຂິກທັງໝົດ, ຕຳແໜ່ງເລຂາໜ່ວຍ ແລະ ຮາກຖານໜ່ວຍ ທັງໝົດ 32 ສະຫາຍ, ຍິງ 8 ສະຫາຍ ກວມເອົາ 25% ຂອງຈໍານວນເລຂາທັງໝົດ, ຮອງເລຂາ 32 ສະຫາຍ, ຍິງ 13 ສະຫາຍ ກວມເອົາ 40% ຂອງຈຳນວນຮອງເລຂາ, ກໍາມະການຄະນະໜ່ວຍພັກ 40 ສະຫາຍ, ຍິງ 15 ສະຫາຍ ກວມເອົາ 37% ຂອງຈຳນວນກຳມະການ.
ເຊິ່ງລັດຖະກອນແຍກຕາມຊັ້ນວິຊາສະເພາະ ປະກອບມີຊັ້ນປະລິນຍາເອກ 08 ຄົນ, ຍິງ 01 ຄົນ, ປະລິນຍາໂທ 255 ຄົນ, ຍິງ 105 ຄົນ, ປະລິນຍາຕີ 712 ຄົນ, ຍິງ 338 ຊັ້ນສູງ ແລະ ທຽບເທົ່າ 192 ຄົນ, ຍິງ 81 ຄົນ, ຊັ້ນກາງ 110 ຄົນ, ຍິງ 52 ຊັ້ນຕົ້ນ 25 ຄົນ, ຍິງ 03 ແລະ ບໍ່ມີຊັ້ນ 02 ຄົນ, ຕະຫຼອດໄລຍະຜ່ານມາ, ສະມາຊິກສະຫະພັນແມ່ຍິງກະຊວງ ໄດ້ຮັບການເອົາໃຈໃສຈາກການຈັດຕັ້ງ ກໍ່ຄື ຄະນະພັກ, ຄະນະນໍາແຕ່ລະຂັ້ນ, ໃຫ້ໄປຍົກລະດັບທາງດ້ານທິດສະດີການເມືອງ-ການປົກຄອງ, ວິຊາສະເພາະ, ພາສາຕ່າງປະ ເທດ ຢູ່ພາຍໃນ ແລະ ຕ່າງປະເທດໃນແຕ່ລະປີ, ປະຈຸບັນສະມາຊິກສະຫະພັນແມ່ຍີງທີ່ຈົບທິດສະດີການເມືອງການປົກ ຄອງ ແລະ ວີຊາສະເພາະ ໂດຍສົ່ງເສີມໃຫ້ເອື້ອຍນ້ອງແມ່ຍິງ ກະຊວງ ຖວທ ໄດ້ເຂົ້າຮັບການບໍາລຸງ ດ້ານທິດສະດີການເມືອງ-ການປົກຄອງ ຄື: ລະບົບບໍາລຸງ 45 ວັນ 123 ຄົນ, ຂັ້ນຕົ້ນ 21 ຄົນ, ຂັ້ນກາງ 04 ຄົນ, ແລະ ຂັ້ນສູງ 23 ຄົນ;
ນາງ ສວນສະຫວັນ ວິຍາເກດ ລັດຖະມົນຕີ ກະຊວງ ຖວທ ໄດ້ກ່າວບາງຕອນວ່າ: ກອງປະຊຸມທາບທາມບຸກຄະລາກອນ ຮອບທີ 2 ເພື່ອປ່ອນບັດຄັດເລືອກເອົາບຸກຄະລາກອນ ທີ່ສະໜັກເລືອກຕັ້ງເຂົ້າເປັນ ຄະນະບໍລິຫານງານສະຫະພັນແມ່ຍິງກະຊວງ ຖວທ ຊຸດໃໝ່ ຊຸດທີ IX ຊຶ່ງຄະນະບໍລິຫານງານສະຫະພັນແມ່ຍິງກະຊວງ ຖວທ ຊຸດໃໝ່ນີ້ ແມ່ນນອນຢູ່ໃນການປັບປຸງກົງຈັກການຈັດຕັ້ງຂອງກະຊວງ ຖວທ ຂອງພວກເຮົາ ຊຶ່ງ 5 ປີໃດ ມີການປັບປຸງໃຫຍ່ເທື່ອໜຶ່ງ. ພ້ອມກັນນີ້ ກໍແມ່ນນອນຢູ່ໃນໄລຍະກະກຽມກອງປະຊຸມ 3 ຂັ້ນຂອງພັກ ແລະ ຖືວ່າເປັນຂີດໝາຍທີ່ສຳຄັນ ເຮັດໃຫ້ສະມາຊິກສະຫະພັນແມ່ຍິງ ໂດຍສະເພາະ ຜູ້ແທນສົມບູນກອງປະຊຸມໃຫຍ່ ມີສະຕິຕໍ່ການຈັດຕັ້ງ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ຍົກສູງບົດບາດ ແລະ ຄຸນທາດການເມືອງຂອງສະມາຊິກສະຫະພັນແມ່ຍິງ ກໍຄື ແມ່ຍິງລາວບັນດາເຜົ່າ ໃຫ້ມີຄວາມໜັກແໜ້ນ, ສາມາດຊອກໃຫ້ເຫັນໄດ້ ບຸກຄະລາກອນທີ່ຈະສາມາດມານໍາພາ-ຊີ້ນໍາ ແລະ ຖືຄັນທຸງນໍາໜ້າ ໃນການຈັດຕັ້ງ, ເຄື່ອນໄຫວວຽກງານຂອງສະຫະພັນແມ່ຍິງກະຊວງ ຖວທ ກໍຄື ສາມາດຮັບຜິດຊອບຕໍ່ໜ້າທີ່ການເມືອງທີ່ການຈັດຕັ້ງມອບໝາຍໃຫ້.
ອັນທີໜຶ່ງ: ໃນການຄັດເລືອກເອົາບຸກຄະລາກອນ ໃຫ້ຖືເອົາເງື່ອນໄຂມາດຕະຖານ ທີ່ຮອງປະທານຄະນະບໍລິຫານງານສະຫະພັນແມ່ຍິງ ກະຊວງ ຖວທ ໄດ້ອ່ານຜ່ານໄປແລ້ວນັ້ນ ເປັນມາດຕະຖານຫຼັກ ມາດຕະຖານ ສໍາຄັນ ແລະ ເອົາມາເຍືອງໃສ່ບຸກຄະລາກອນທີ່ຕົນເອງຈະພິຈາລະນາຄັດເລືອກເອົາ.
ອັນທີສອງ: ໃນການຄັດເລືອກ ໃຫ້ເຂົ້າໃຈຢ່າງໜັກແໜ້ນ ວ່າ: ອົງການຈັດຕັ້ງມະຫາຊົນຂອງພວກເຮົາ ຊຶ່ງມີ (ອົງການຈັດຕັ້ງສະຫະພັນແມ່ຍິງລາວ, ອົງການຈັດຕັ້ງຊາວໜຸ່ມປະຊາຊົນປະຕິວັດລາວ ແລະ ອົງການ
ຈັດຕັ້ງສະຫະພັນກໍາມະບານລາວ) ແມ່ນຢູ່ພາຍໃຕ້ການຊີ້ນໍາ-ນໍາພາ ຂອງອົງການຈັດຕັ້ງພັກ (ອົງການຈັດຕັ້ງພັກ ແມ່ນອົງການຈັດຕັ້ງສູງສຸດ ຂອງລະບອບປະຊາທິປະໄຕປະຊາຊົນລາວຂອງພວກເຮົາ). ສະນັ້ນ ໃນການຄັດເລືອກເອົາບຸກຄະລາກອນ ກໍໃຫ້ພິຈາລະນາ ຜູ້ທີ່ເປັນ ສະມາຊິກພັກສົມບູນ ແລະ ມີບົດຮຽນ ປະສົບການໃນການນໍາພາ-ຊີ້ນໍາ.
ອັນທີສາມ: ໃນການຄັດເລືອກນີ້ ຕ້ອງພິຈາລະນາບຸກຄະລາກອນທີ່ມີຕໍາແໜ່ງທັງ ພັກ ແລະ ລັດ ເພື່ອມາເຮັດໜ້າທີ່ການເມືອງ ໃນການນໍາພາ-ຊີ້ນໍາ, ໃນການເຕົ້າໂຮມຄວາມສາມັກຄີ, ໃນການຊີ້ນໍາວຽກງານເບື້ອງລັດ ແລະ ຊີ້ນໍາວຽກງານອົງການຈັດຕັ້ງມະຫາຊົນ ຄວບຄູ່ກັນໄປ;
ອັນທີສີ່: ໃຫ້ຢຶດຫຼັກການໃນການແບ່ງ ຫຼື ການກະຈາຍຄວາມຮັບຜິດຊອບຕໍ່ການຈັດຕັ້ງ, ຕໍ່ໜ້າທີ່ການເມືອງ ໃນການເລືອກເອົາບຸກຄະລາກອນ ແລະ ໃຫ້ຫຼີກເວັ້ນການເລືອກເອົາບຸກຄະລາກອນທີ່ຢູ່ແຕ່ບ່ອນດຽວ ຫຼື ຢູ່ໃນຂົງເຂດວຽກງານດຽວທັງໝົດ. ສະນັ້ນ ຄວນຫຼີກເວັ້ນ, ຄວນເລືອກເອົາ ບຸກຄະລາກອນຢູ່ຫຼາຍຂົງເຂດວຽກງານ ໃຫ້ມີທັງຢູ່ ຂົງເຂດຖະແຫຼງຂ່າວ, ວັດທະນະທໍາ, ທ່ອງທ່ຽວ ແລະ ຂົງເຂດເສນາ ເພື່ອຈະໄດ້ມາຊ່ວຍກັນ ນໍາພາ-ຊີ້ນໍາ ໄດ້ຢ່າງແທດເໝາະ, ສາມາດຮັບຮູ້ບັນຫາ ແລະ ສາມາດຕິດຕາມກວດກາ ເບິ່ງແຍງສະມາຊິກສະຫະພັນແມ່ຍິງກະຊວງ ຖວທ ຂອງພວກເຮົາ ໄດ້ຢ່າງທົ່ວເຖິງ.
ອັນທີຫ້າ: ໃນຄະນະບໍລິຫານງານສະຫະພັນແມ່ຍິງກະຊວງ ຖວທ ຊຸດໃໝ່ນີ້ ຕ້ອງໃຫ້ປະກອບມີທັງ ຜູ້ເກົ່າ ແລະ ຜູ້ໃໝ່, ມີທັງຮຸ່ນກາງ ແລະ ຮຸ່ນໜຸ່ມ ເພື່ອໃຫ້ສາມາດສືບທອດການນໍາພາ-ຊີ້ນໍາຕໍ່ໄປໃຫ້ໄດ້; ຜູ້ເກົ່າກໍໃຫ້ຖ່າຍທອດຄວາມຮູ້ ບົດຮຽນປະສົບການໃຫ້ແກ່ຜູ້ໃໝ່ ແລະ ສ້າງເອົາຜູ້ໃໝ່, ຜູ້ໃໝ່ກໍຕ້ອງຮຽນຮູ້ ຮໍ່າຮຽນເອົາບົດຮຽນປະສົບການນໍາຜູ້ເກົ່າ ສາມາດນຳມາຈັດຕັ້ງຜັນຂະຫຍາຍ ສ້າງເປັນແຜນພັດທະນາໃຫ້ວຽກງານແມ່ຍິງ ມີບົດບາດທີ່ກ້າວໜ້າ ແລະ ທັນສະໄໝ ໃຫ້ທັນກັບສະພາບການພັດທະນາຕົວຈິງໃນແຕ່ລະໄລຍະ, ມີວິໃສທັດທີ່ກວ້າງ, ຕ້ອງຊອກຮູ້ ຄົ້ນຄວ້າ ສ້າງແຜນ ແລະ ນໍາພາສະມາຊິກຂອງຕົນ ໃຫ້ມີການພັດທະນາໃນດ້ານຕ່າງໆໃຫ້ດີຂຶ້ນເລື້ອຍໆ. ທັງນີ້, ກໍເພື່ອສືບທອດອົງການຈັດຕັ້ງຂອງພວກເຮົາຕໍ່ໄປ.
