ໃນຍຸກທີ່ມີຄວາມຫຍຸ້ງຍາກສັບສົນ ດ້ານເສດຖະກິດນີ້ ເຮັດໃຫ້ຫລາຍຄອບຄົວ ຫັນມາສ້າງເສດຖະກິດຄອບຄົວ ດ້ວຍການຜະລິດກະສິກຳ ປູກຝັງ-ລ້ຽງສັດເພື່ອເປັນສະບຽງອາຫານໄວ້ຮັບໃຊ້ ແກ່ຄອບຄົວຕົນ ເພື່ອຫລຸດຜ່ອນຄ່າໃຊ້ຈ່າຍທີ່ບໍ່ຈຳເປັນ ແລະ ຍັງເປັນການປະຕິບັດຕາມທິດຊີ້ນຳຂອງຂັ້ນເທິງ ໃນການຫັນມາກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ.
ບາງຄອບຄົວກໍຜະລິດໜ້ອຍເພື່ອບໍໂພກພາຍໃນຄອບຄົວເທົ່ານັ້ນ, ແຕ່ກໍມີຫລາຍຄອບຄົວທີ່ຜະລິດຫລາຍ ຈົນກາຍເປັນສິນຄ້າອອກຈຳໜ່າຍ ສ້າງລາຍຮັບເພີ່ມໃຫ້ຄອບຄົວເປັນກອບເປັນກຳ ກາຍເປັນຕົ້ນແບບ ໃຫ້ຫລາຍຄອບຄົວ ດັ່ງຄອບຄົວຂອງ ທ່ານ ໂພໄຊ ສີພອນແກ້ວປະເສີດ ອາຍຸ 40 ປີ ຢູ່ບ້ານໂພນທັນ ເມືອງໂພນໂຮງ ແຂວງວຽງຈັນ ທີ່ໄດ້ປະກອບອາຊີບປູກຝັງ-ລ້ຽງສັດແບບປະສົມປະສານ ແລະ ຮັບບໍລິການດ້ານກົນຈັກການກະເສດ ສາມາດສ້າງລາຍຮັບ ໃຫ້ຄອບຄົວໄດ້ 700-800 ລ້ານຕໍ່ປີ.
ທ່ານ ໂພໄຊ ສີພອນແກ້ວປະເສີດ ໃຫ້ຮູ້ວ່າ: ໃນຄອບຄົວມີສະມາຊິກທັງໝົດ 7 ຄົນ ໃນນີ້, ມີແຮງງານຫລັກ 4 ຄົນ, ໄດ້ເລີ່ມປະກອບອາຊີບປູກຝັງ-ລ້ຽງສັດແບບປະສົມປະສານ ມາແຕ່ປີ 2007 ໂດຍເລີ່ມຈາກການປູກເຂົ້າ ທັງນາປີ-ນາແຊງ ໃນເນື້ອທີ່ 5-6 ເຮັກຕາ, ສະມັດຕະພາບ 4 ໂຕນຕໍ່ເຮັກຕາ, ສວນໝາກແຕງ, ແຕງໂມ, ຖົ່ວ ແລະ ລ້ຽງງົວຂຸນ, ຊຶ່ງເບື້ອງຕົ້ນມີງົວພຽງແຕ່ 8 ໂຕ ໃນນີ້, ມີແມ່ພັນ 4 ໂຕ ລ້ຽງແບບຂາຍໄປນຳ ແລະ ຂະຫຍາຍແມ່ພັນໄປພ້ອມ (ນຳໃຊ້ລູກງົວຂອງເຮົາເອງມາຂຸນຂາຍ).
ປັດຈຸບັນ ມີງົວທັງໝົດ 30 ໂຕ ໃນນີ້, ມີແມ່ພັນ 20 ໂຕ. ຕໍ່ມາໄດ້ເຫັນຊ່ອງທາງການສ້າງລາຍຮັບໃໝຄືການລ້ຽງໝູຂຸນ ຈຶ່ງໄດ້ສຶກສາຂໍ້ມູນຈາກສື່ອອນລາຍ ແລະ ຈາກຜູ້ທີ່ເຮັດມາກ່ອນ ທຳອິດໄດ້ເລີ່ມລ້ຽງ 1 ຄອກ (ໝູນ້ອຍ 10 ກວ່າໂຕ) ເກືອຫົວອາຫານສົດ ໂດຍໃຊ້ເວລາລ້ຽງ 4 ເດືອນກວ່າກໍສາມາດອອກຈຳໜ່າຍໄດ້ ເຫັນວ່າພໍມີກຳໄລ ກໍເລີຍລ້ຽງໝູແມ່ພັນ ເພື່ອຂະຫຍາຍລູກ ແລ້ວເອົາໄວ້ຂຸນເອງ ຈຳນວນ 2 ໂຕ ແລະ ຂະຫຍາຍເພີ່ມອີກ, ປັດຈຸບັນ ມີໝູແມ່ພັນ 6 ໂຕ ພ້ອມທັງຂະຫຍາຍຄອກໝູຂຸນຈາກ 1 ຄອກ ມາເປັນ 4 ຄອກ. ສຳລັບຕະຫລາດ ແມ່ນຈຳໜ່າຍຢູ່ພາຍເມືອງໂພນໂຮງ ແລະ ຕ່າງແຂວງຈຳນວນໜຶ່ງ. ນອກຈາກປູກຝັງ-ລ້ຽງສັດແລ້ວ ຕົນເອງຍັງໄດ້ຮັບບໍລິການລົດໄຖນາ ໄຖສວນ ຮັບບໍລິການກ່ຽວເຂົ້າດ້ວຍກົນຈັກຕາມລະດູການ. ສະເລ່ຍລາຍຮັບຈາກການຂາຍເຂົ້າ, ຂາຍເຄື່ອງສວນ, ໝູຂຸນ, ງົວຂຸນ ແລະ ບໍລິການລົດໄຖນາໄຖສວນ ຮັບບໍລິການກ່ຽວເຂົ້າດ້ວຍກົນຈັກ ໄດ້ປະມານ 700-800 ລ້ານກີບຕໍ່ປີ. ຍ້ອນຄວາມດຸໝັ່ນຂະຫຍັນພຽນ ແລະ ເຮັດແທ້ທຳຈິງ ໃນການປະກອບອາຊີບກະສິກຳ ຄອບຄົວຕົນເອງ ໄດ້ເປັນຄອບຄົວຕົວແບບ ໃນປີ 2017 ຈົນເຖິງປັດຈຸບັນ.
ທ່ານ ໂພໄຊ ສີພອນແກ້ວປະເສີດ ກ່າວຕື່ມວ່າ: ສຳລັບແຜນການໃນຕໍ່ໜ້າ ຕົນເອງມີແຜນຢາກຈະຂະຫຍາຍການລ້ຽງໜູຂຸນ, ງົວຂຸນ ແລະ ຊື້ລົດກ່ຽວເຂົ້າອີກ 1 ຄັນ ເພື່ອໃຫ້ພຽງພໍກັບຄວາມຕ້ອງການຂອງລູກຄ້າໃນອະນາຄົດ.
ຂ່າວ-ພາບ: ບຸນທະວີ ພົມມະສິດ
