ສະຫະພັນບານເຕະແຫ່ງຊາດລາວ ປະກາດຢ່າງເປັນທາງການວ່າ: ການແຂ່ງຂັນບານເຕະ ເປບຊີ ລາວລີກ 1 ລະດູການ 2024-2025 ຈະຈັດຂຶ້ນໃນວັນທີ 14 ກັນຍາ 2024 ຫາ ວັນທີ 1 ມີນາ 2025 ໂດຍມີ 8 ສະໂມສອນ ເຂົ້າຮ່ວມຊີງໄຊ ແລະ ໃຊ້ 6 ສະໜາມຈັດການແຂ່ງຂັນ.
ສໍາລັບສະໂມສອນເຂົ້າຮ່ວມແຂ່ງຂັນລະດູການນີ້ເປັນ 8 ສະໂມສອນໃນລະດູການ 2023 ທີ່ຜ່ານມາ ປະກອບມີ:
1. ສະໂມສອນ ກິລາບານເຕະ ຊ້າງນ້ອຍ ແຊັມເກົ່າ
2. ສະໂມສອນ ກິລາບານເຕະ ມາສເຕີ້ ເຊເວັ້ນ
3. ສະໂມສອນ ກິລາບານເຕະ ເອສະຣາ
4. ສະໂມສອນ ກິລາບານເຕະ ກອງທັບ
5. ສະໂມສອນ ກິລາບານເຕະ ຫຼວງພະບາງ
6. ສະໂມສອນ ກິລາບານເຕະ ຈຳປາສັກ
7. ສະໂມສອນ ກິລາບານເຕະ ນໍ້າທາ
8. ສະໂມສອນ ກິລາບານເຕະ ວຽງຈັນ
ສ່ວນການແຂ່ງຂັນຈະໃຊ້ 6 ສະຫນາມຄື: ສະຫນາມກິລາແຫ່ງຊາດຫຼັກ 16 ( ສະຫນາມນອກ ), ສະຫນາມກິລາກອງທັບ ຫຼັກ 5, ສະຫນາມກິລາແຂວງຈຳປາສັກ, ສະຫນາມກິລາແຂວງຫຼວງພະບາງ, ສະຫນາມກິລາແຂວງຫຼວງນ້ຳທາ ແລະ ສະຫນາມກິລາກອງບັນຊາການທະຫານແຂວງວຽງຈັນ.
ຂະນະທີ່ ຮູບແບບການແຂ່ງຂັນແມ່ນແຂ່ງຂັນແບບພົບກັນຫມົດຈຳນວນ 2 ຮອບ ຂາໄປ ແລະ ຂາກັບ, ຈຳນວນນັດແຂ່ງຂັນທັງຫມົດ 56 ນັດ, ສະໂມສອນທີ່ໄດ້ເປັນແຊັມການແຂ່ງຂັນບານເຕະ ເປບຊີ ລາວລີກ 1 ລະດູການ 2024-2025 ຈະໄດ້ເປັນສະໂມສອນ ຕົວແທນຈາກ ສປປ ລາວ ເຂົ້າຮ່ວມການແຂ່ງຂັນລະດັບ AFC CHALLENGE LEAGUE 2025/2026 (ແຕ່ຕ້ອງໄດ້ຮັບໃບອະນຸຍາດຈາກສະໂມສອນລະດັບອາຊີຈື່ງສາມາດເຂົ້າຮ່ວມໄດ້ ) ຫຼື ລາຍການອື່ນໆທີ່ຖືກເຊີນ ສ່ວນອັນດັບຮອງລົງມາຈະໄດ້ພິຈາລະນາຕາມຄວາມເໝາະສົມ.
