ໃນຕອນບ່າຍ, ວັນທີ 16 ສິງຫາ 2024 ສອງຄະນະກໍາມະການຮ່ວມມືທະວິພາຄີ ລະຫວ່າງ ລາວ-ຫວຽດນາມ ແລະ ຫວຽດນາມ-ລາວ ໄດ້ຈັດກອງປະຊຸມສະຫຼຸບຕີລາຄາສະພາບການຈັດຕັ້ງຜັນຂະຫຍາຍແຜນການຮ່ວມມື ລາວ-ຫວຽດນາມ ກາງສະໄໝ ປະຈໍາປີ 2024 ແລະ ຕີລາຄາຊຸກຍູ້ການຈັດຕັ້ງຜັນຂະຫຍາຍສັນຍາຮ່ວມມືທະວິພາຄີ ລາວ-ຫວຽດນາມ ໄລຍະປີ 2021-2025, ທີ່ແຂວງ ເຫງະອານ, ສສ ຫວຽດນາມ ໂດຍພາຍໃຕ້ການເປັນປະທານຮ່ວມຂອງທ່ານ ເພັດ ພົມພີພັກ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກໍາມະການຮ່ວມມື ລາວ-ຫວຽດນາມ ແລະ ທ່ານເຈິນ ກວັກ ເຟືອງ, ຮອງລັດຖະມົນຕີ ກະຊວງແຜນການ ແລະ ການລົງທຶນ ຫວຽດນາມ, ຮອງປະທານຄະນະກຳມະການຮ່ວມມື ຫວຽດນາມ-ລາວ ມີ ທ່ານຮອງປະທານຄະນະກຳມະການຮ່ວມມື ຫວຽດນາມ-ລາວ, ທ່ານ ຫົວໜ້າຫ້ອງການ, ທ່ານ ຮອງຫົວໜ້າຫ້ອງວ່າການ, ທ່ານ ຮອງຫົວໜ້າຫ້ອງບັນຊາການ, ທ່ານ ຫົວໜ້າກົມ, ທ່ານ ຮອງຫົວໜ້າກົມ, ຫົວໜ້າພະແນກ, ຮອງພະແນກຂອງບັນດາຂະແໜງການທີ່ກ່ຽວຂ້ອງຂອງສອງຝ່າຍ ລາວ-ຫວຽດນາມ ເຂົ້າຮ່ວມ, ເຊິ່ງມີຜູ້ເຂົ້າຮ່ວມທັງໝົດ 100 ກ່ວາທ່ານ.
ທ່ານ ເພັດ ພົມພີພັກ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກໍາມະການຮ່ວມມື ລາວ-ຫວຽດນາມ ໄດ້ລາຍງານຕໍ່ກອງປະຊຸມ ໃຫ້ຮູ້ວ່າ: ສະພາບການຈັດຕັ້ງປະຕິບັດຂໍ້ຕົກລົງແຜນການຮ່ວມມື ປະຈໍາປີ 2024 ແລະ ສັນຍາວ່າດ້ວຍການຮ່ວມມືທະວິພາຄີ ໄລຍະປີ 2021-2025: ນັບແຕ່ປີ 2021 ມາຮອດປັດຈຸບັນ, ໂດຍພາຍໃຕ້ການຊີ້ນຳທີ່ເດັດຂາດຕົວຈິງ ຂອງສອງພັກ-ສອງລັດ ລາວ ແລະ ຫວຽດນາມ, ບວກກັບ ຄວາມພະຍາຍາມຂອງບັນດາກະຊວງ, ຂະແໜງການ, ທ້ອງຖິ່ນ ຕະຫຼອດຮອດພາກສ່ວນເສດຖະກິດຕ່າງໆ ຂອງທັງສອງຝ່າຍ ໄດ້ເຮັດໃຫ້ການປະຕິບັດສັນຍາວ່າດ້ວຍການຮ່ວມມື ໄລຍະປີ 2021-2025 ສາມາດຈັດຕັ້ງປະຕິບັດ ແລະ ມີຜົນສຳເລັດຫຼາຍດ້ານ ຄື: 1)ການພົວພັນດ້ານການເມືອງ-ການຕ່າງປະເທດ, ປ້ອງກັນຊາດ-ປ້ອງກັນຄວາມສະຫງົບ, 2)ດ້ານການສຶກສາ ແລະ ພັດທະນາຊັບພະຍາກອນມະນຸດ ແລະ ກໍ່ສ້າງວິຊາຊີບ, 3)ດ້ານການຮ່ວມມືໃນຂົງເຂດເສດຖະກິດ: ການຮ່ວມມືດ້ານການລົງທຶນ ແຕ່ປີ 2021 ຮອດປັດຈຸບັນ, ສປປ ລາວ ໄດ້ອະນຸຍາດການລົງທຶນໃໝ່ໃຫ້ ວິສາຫະກິດຫວຽດນາມ ປະຕິບັດໂຄງການຈໍານວນໜຶ່ງ ດ້ວຍມູນຄ່າລົງທຶນທັງໝົດ 869,9 ລ້ານໂດລາສະຫະລັດ; ສະເພາະ 06 ເດືອນຕົ້ນປີ 2024, ສປປ ລາວ ໄດ້ອອກໃບອະນຸຍາດການລົງທຶນ ໃຫ້ແກ່ວິສາຫະກິດຫວຽດນາມ ຈໍານວນ 06 ໂຄງການ ມູນຄ່າລວມ 339 ລ້ານໂດລາສະຫະລັດ; ໃນນີ້, ມີຂະແໜງບໍ່ແຮ່ 01 ໂຄງການ, ຂະແໜງໄຟຟ້າ 01 ໂຄງການ ແລະ ຂະແໜງສາທາລະນະສຸກ 04 ໂຄງການ, ການຮ່ວມືດ້ານການຄ້າ ສອງປະເທດ ຍັງມີລັກສະນະເພີ່ມຂຶ້ນຢ່າງຕໍ່ເນື່ອງ ສະເພາະໃນ 06 ເດືອນຕົ້ນປີ 2024 ບັນລຸໄດ້ 927,8 ລ້ານໂດລາສະຫະລັດ ເພີ່ມຂຶ້ນ 11,1% ທຽບໃສ່ໄລຍະດຽວກັນຂອງປີ 2023; ໃນນັ້ນ, ມູນຄ່າສິນຄ້ ນໍາເຂົ້າຈາກ ສສ ຫວຽດນາມ ບັນລຸໄດ້ 289,2 ລ້ານໂດລາສະຫະລັດ ແລະ ມູນຄ່າສິນຄ້າທີ່ ສປປ ລາວ ສົ່ງອອກໄປຫວຽດນາມ ບັນລຸໄດ້ 638,6 ລ້ານໂດລາສະຫະລັດ. ນັບແຕ່ໄລຍະ 2021-2023 ມີອັດຕາການຂະຫຍາຍຕົວສະເລ່ຍ 17,7% ເຫັນວ່າສາມາດບັນລຸໄດ້ຕາມການຕົກລົງຂອງສອງລັດຖະບານ (ເພິ່ມຂຶ້ນປີລະ 10-15%). ນອກນັ້ນກໍ່ມີ, ການຮ່ວມມືດ້ານພະລັງງານ-ບໍ່ແຮ່, ການຄົມມະນາຄົມ ແລະ ກໍ່ສ້າງ ແລະ ການ ຮ່ວມມືໃນຂົງເຂດອື່ນໆ ລະຫວ່າງ ບັນດາກະຊວງ, ອົງການ, ຂະແໜງການ, ຄະນະກໍາມະການຂອງສະພາ ແຫ່ງຊາດ, ທ້ອງຖິ່ນ, ອົງການຈັດຕັ້ງມະຫາຊົນຕ່າງໆ ໄດ້ຮັບການຊຸກຍູ້ ແລະ ຈັດຕັ້ງປະຕິບັດຢ່າງຄ່ອງຕົວ, 4)ທຶນຊ່ວຍເຫຼືອລ້າ: ໄລຍະປີ 2021-2025, ລັດຖະບານ ສສ ຫວຽດນາມ ໄດ້ຕົກລົງໃຫ້ການຊ່ວຍເຫຼືອແກ່ ລັດຖະບານ ສປປ ລາວ ດ້ວຍບ້ວງທຶນຊ່ວຍເຫຼືອລ້າ ຈໍານວນ 3.600 ຕື້ດົ່ງ. ໃນນັ້ນ: ປີ 2021 ໄດ້ຈັດສັນທຶນ ຈໍານວນ 719,3 ຕື້ດົ່ງ; ປີ 2022 ຈັດສັນທຶນ ຈໍານວນ 733,66 ຕື້ດົ່ງ; ປີ 2023 ໄດ້ຈັດສັນທຶນ ຈໍານວນ 751,29 ຕື້ດົ່ງ ແລະ ປີ 2024 ໄດ້ຈັດສັນທຶນ ຈໍານວນ 719,23 ຕື້ດົ່ງ ເພື່ອຈັດຕັ້ງປະຕິບັດແຜນການຮ່ວມມືດ້ານການສຶກສາ ແລະບັນດາກິດຈະການ/ໂຄງການ. ເຊິ່ງບັນດາໂຄງການຊ່ວຍເຫຼືອລ້າ ທີ່ໄດ້ສໍາເລັດນັບແຕ່ປີ 2021 ຮອດປັດຈຸບັນ ແມ່ນມີ 18 ກິດຈະການ/ໂຄງການ; ໃນນັ້ນ ພົ້ນເດັ່ນແມ່ນ ໂຄງການຫໍສະພາແຫ່ງຊາດ ຫຼັງໃໝ່, ໂຄງການໂຮງຮຽນມັດທະຍົມ-ວິຊາຊີບຕົວແບບ ມິດຕະພາບ ລາວ-ຫວຽດນາມ ຢູ່ເມືອງໜອງບົກ ແຂວງຄໍາມ່ວນ, ໂຄງການວິທະຍາຄານການເມືອງ ປ້ອງກັນຄວາມສະຫງົບ.
ສຳລັບທິດທາງແຜນການການຈັດຕັ້ງປະຕິບັດການຮ່ວມມືີ ລະຫວ່າງ ສອງກະຊວງ ກໍ່ຄື ກະຊວງແຜນການ ແລະ ການລົງທຶນ ລາວ-ຫວຽດນາມ ໃນຕໍ່ໜ້າ: ສືບຕໍ່ເສີມຂະຫຍາຍການພົວພັນຮ່ວມມືຮອບດ້ານ ທີ່ມີມູນເຊື້ອ, ອັນສໍາຄັນແມ່ນ ສອງຝ່າຍ ຈະຕ້ອງຮ່ວມກັນສ້າງແຜນການຮ່ວມມື ໃນໄລຍະໃໝ່ຕໍ່ໜ້າຮ່ວມກັນຕື່ມ ເພື່ອເປັນບ່ອນອີງໃນການຈັດຕັ້ງປະຕິບັດ ບາງເນື້ອໃນສໍາຄັນ ຄື: ສືບຕໍ່ເພີ່ມທະວີການຮ່ວມມືຮອບດ້ານ ລະຫວ່າງ ສອງກະຊວງແຜນການ ແລະ ການລົງທຶນ ໃນຂົງເຂດແຜນການ ແລະ ການລົງທຶນ; ໃນການຊຸກຍູ້ການພົວພັນຮ່ວມມືຂອງສອງປະເທດ; ສົ່ງເສີມ ແລະ ຄຸ້ມຄອງ ການລົງທຶນຂອງວິສາຫະກິດ ຢູ່ແຕ່ລະປະເທດ ພ້ອມທັງເປັນໃຈກາງໃນການປະສານງານ ເພື່ອກະຕຸກຊຸກຍູ້ໃຫ້ບັນດາວິສາຫະກິດທີ່ໄດ້ມີສັນຍາ ຫຼື ຂໍ້ຕົກລົງຮ່ວມກັນ ໃຫ້ໄດ້ຮັບການຈັດຕັ້ງປະຕິບັດຕາມແຜນການທີ່ວາງໄວ້ ແລະ ແກ້ໄຂບັນດາຂໍ້ຄົງຄ້າງຕ່າງໆຂອງບັນດາໂຄງການລົງທຶນ ທີ່ໄດ້ຮັບອະນຸຍາດໃນແຕ່ລະໄລຍະ ໃຫ້ຫຼຸດລົງ; ສືບຕໍ່ຊ່ວຍເຫຼືອໃນການກໍ່ສ້າງ, ບຳລຸງສ້າງດ້ານວິຊາສະເພາະ ໃຫ້ແກ່ພະນັກງານຂະແໜງແຜນການ ແລະການລົງທຶນ ຂອງລາວ ໃນແຕ່ລະໄລຍະ; ໂດຍສະເພາະແມ່ນ ການຝຶກອົບຮົມການລົງທຶນເອກະຊົນ ແລະ ເຂດເສດຖະກິດພິເສດ; ວິທີການຄຸ້ມຄອງ ແລະ ຈັດສັນທຶນຂອງໂຄງການລົງທຶນ ຂອງລັດ ແລະ ໂຄງການຊ່ວຍເຫຼືອ ຈາກຕ່າງປະເທດ; ວຽກງານສະຖິຕິດ້ານຄຸ້ມຄອງບໍລິຫານ ແລະ ຂົງເຂດວຽກງານອື່ນໆ; ສືບຕໍ່ ສົ່ງຊ່ຽວຊານດ້ານເສດຖະກິດມະຫາພາກຂອງກະຊວງແຜນການ ແລະ ການລົງທຶນ ຫວຽດນາມ ມາເຮັດວຽກ, ຮ່ວມກັບຝ່າຍລາວ ເພື່ອໃຫ້ການແນະນໍາຕໍ່ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ…
