ທ່ານ ອຸດົມ ປັນຍາທອງ ກໍາມະການພັກເມືອງ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງຄອບໃຫ້ຮູ້ວ່າ:ຕະຫຼອດໄລຍະຜ່ານມາພາຍໃຕ້ການນໍາພາ-ຊີ້ນໍາຂອງຄະນະພັກເມືອງ ແລະ ພະແນກອຸດສາຫະກໍາ ແລະ ການຄ້າແຂວງໄຊຍະບູລີ ເວົ້າລວມ, ເວົ້າສະເພາະຫ້ອງການອຸດສາຫະກໍາ ແລະ ການຄ້າເມືອງກໍ່ໄດ້ໃກ້ຊິດຕິດແທດນໍາພາຊີ້ນໍາຊຸກຍູ້ສົ່ງເສີມຜູ້ປະກອບການນັກທຸລະກິດຢູ່ພາຍໃນເມືອງເຮັດການຄ້າຂາຍ ແລະ ການບໍລິການຊຸກຍູ້ໃຫ້ນັກທຸລະກິດມາລົງທຶນໃນໄລຍະຍາວເຂົ້າໃສ່ການຜະລິດສິນຄ້າກະສິກໍາ ແລະ ເກັບຊີ້ນໍາປະຊາຊົນເຊັ່ນ: ໝາກເດືອຍ, ມັນຕົ້ນ, ຢາງພາລາ, ເຂົ້າ, ສາລີລ້ຽງສັດ, ໝາກຖົ່ວດິນ, ໝາກໂມ, ຖົ່ວເຫຼືອງ, ງົວ, ຄວາຍ.
ຕໍ່ກັບວຽກງານຫັດຖະກໍາແມ່ນຜະລິດຕະພັນຂອງເອື້ອຍນ້ອງແມ່ຍິງລາວຊຸກຍູ້ສົ່ງເສີມເພື່ອສ້າງລາຍຮັບໃຫ້ແກ່ປະຊາຊົນບັນດາເຜົ່າປະຈຸບັນມີຜູ້ລົງທຶນເຂົ້າໃສ່ການຕໍ່າແຜນມີ 3 ກຸ່ມ ຈໍານວນ 13 ທ່ານ ມີກີຕໍ່າຫູກ 1.011 ກີ, ຜະລິດໄດ້ 12.500 ຜືນ ສະເລ່ຍລາຄາປະມານ 800.000 ກີບຕໍ່ຜືນ ມີມູນຄ່າການຜະລິດປະມານ 10 ຕື້ກີບ.
ການສົ່ງເສີມການຄ້າ ແລະ ບໍລິການພວກເຮົາກໍໄດ້ເອົາໃຈໃສ່ໃນການຊຸກຍູ້ສົ່ງເສີມຜູ້ປະກອບການນັກທຸລະກິດນໍາເຂົ້າ, ຂາຍຍົກ-ຂາຍຍ່ອຍ ແລະ ບໍລິການ ໃຫ້ຕອບສະໜອງສິນຄ້າ ແລະ ບໍລິການທີ່ມີຄຸນນະພາບໃຫ້ໄປຮອດໄປເຖິງພໍ່ແມ່ປະຊາຊົນບັນດາເຜົ່າຢູ່ພາຍໃນເມືອງແຕ່ລະບ້ານແມ່ນມີຮ້ານຄ້າຂາຍຍ່ອຍສິນຄ້າອຸປະໂພກ, ບໍລິໂພກຕ່າງໆ ນອກນັ້ນກໍ່ຍັງມີແມ່ຄ້າແຜງລອຍທີ່ເລາະຂາຍສິນຄ້າຢ່າງທົ່ວເຖິງໃນແຕ່ລະບ້ານ.
ປະຈຸບັນທົ່ວເມືອງມີຫົວໜ່ວຍວິສາຫະກິດທັງໝົດ 379 ຫົວໜ່ວຍ ມີທຶນຈົດທະບຽນ 295 ພັນ ຕື້ກີບ ປະກອບມີ 3 ຂະແໜງຄື: ຂະແໜງການຄ້າ 187 ຫົວໜ່ວຍ, ຂະແໜງບໍລິການ 152 ຫົວໜ່ວຍ ແລະ ຂະແໜງອຸດສາຫະກໍາ 40 ຫົວໜ່ວຍ.
ໃນ 6 ເດືອນ ຕົ້ນປີ 2024 ການສົ່ງອອກສິນຄ້າທັງພາຍໃນ ແລະ ສົ່ງອອກໄປຕ່າງປະເທດມີມູນຄ່າ 1.895.000 ໂດລາສະຫະລັດ ແລະ ມູນຄ່າການນໍາເຂົ້າສິນຄ້າ 339.930 ໂດລາສະຫະລັດ(ສະເພາະມູນຄ່າສິນຄ້າທີ່ນໍາເຂົ້າຊົມໃຊ້ຢູ່ພາຍໃນເມືອງຄອບ) ຕໍ່ກັບແຈ້ງການຂອງທ່ານເຈົ້າແຂວງໄຊຍະບູລີເລກທີ 141 ລົງວັນທີ 25 ທັນວາ 2023 ທາງຫ້ອງການອຸດສາຫະກໍາ ແລະ ການຄ້າພວກເຮົາກໍໄດ້ເປັນເຈົ້າການສະກັດກັ້ນຫ້າມນໍາເຂົ້າຢ່າງເດັດຂາດໂດຍສົມທົບກັບຫ້ອງການກະສິກໍາ ແລະ ປ່າໄມ້ເມືອງ ແລະ ເຈົ້າໜ້າທີ່ພາສີປະຈໍາດ່ານສາກົນປາງມອນ ຫຼັງຈາກນັ້ນ ກໍ່ໄດ້ລົງກວດກາຢູ່ທ້ອງຕະຫຼາດເພື່ອບໍ່ໃຫ້ແມ່ຄ້າສວຍໂອກາດຂຶ້ນລາຄາສິນຄ້າໃນ 6 ເດືອນທ້າຍປີ 2024 ນີ້ ພວກເຮົາຈະສຶບຕໍ່ຈັດຕັ້ງປະຕິບັດວຽກງານຈໍານວນໜຶ່ງເປັນຕົ້ນສຶບຕໍ່ຈັດຕັ້ງປະຕິບັດແຜນການ 6 ເດືອນທ້ານປີ 2024 ທີ່ວາງໄວ້ໃຫ້ໄດ້ຮັບຜົນດີ, ຊຸກຍູ້ສົ່ງເສີມການຜະລິດພາຍໃນໃຫ້ຫຼາຍຂຶ້ນເພື່ອຫຼຸດຜ່ອນການນໍາເຂົ້າເປັນຕົ້ນແມ່ນການຜະລິດກະສິກໍາເປັນສິນຄ້າໃຫ້ຫຼາຍຂຶ້ນທັງປະລິມານ ແລະ ຄຸນນະພາບ ເພື່ອຕອບສະໜອງການບໍລິໂພກພາຍໃນເມືອງໃຫ້ພຽງພໍ ແລະ ສົ່ງອອກໄປຕ່າງເມືອງເອົາໃຈໃສ່ຄຸ້ມຄອງລາຄາສິນຄ້າ ແລະ ບໍລິການໃຫ້ຢູ່ໃນສະພາບປົກກະຕິບໍ່ເໜັງຕິງແຮງຈົນເກີນໄປ.
