ກະຊວງໂຍທາທິການ ແລະ ຂົນສົ່ງ ( ຍທຂ ) ຈັດກອງປະຊຸມຮັບຟັງການລາຍງານ ແລະ ເຜີຍແຜ່ຂໍ້ມູນຂ່າວສານໂຄງການຂົນສົ່ງແບບຍືນຍົງໃນຕົວເມືອງນະຄອນຫຼວງ ວຽງຈັນ ( ນວ ) ເມື່ອທ້າຍອາທິດຜ່ານມາ ໂດຍການເປັນປະທານຂອງ ທ່ານ ສະເຫຼີມສັກ ໄຊຍະມຸງຄຸນ ຫົວໜ້າຫ້ອງການກະຊວງ ຍທຂ.
ທ່ານ ສະເຫຼີມສັກ ໄຊຍະມຸງຄຸນ ໃຫ້ຮູ້ວ່າ: ໂຄງການຂົນສົ່ງແບບຍືນຍົງໃນຕົວເມືອງ ນວ ໄດ້ກະກຽມ ແລະ ເລີ່ມຈັດຕັ້ງປະຕິບັດມາແຕ່ປີ 2015 ແລະ ວາງແຜນໃຫ້ສໍາເລັດໂຄງການໃນເດືອນມິຖຸນາປີ 2020 ຍ້ອນສະພາບຄວາມພ້ອມພາຍໃນ ໃນການປະຕິບັດເງື່ອນໄຂເງິນກູ້ຢືມຊ່ວຍເຫຼືອ ແລະ ພາຍນອກ, ການເກີດພະຍາດໂຄວິດ – 19 ລະບາດຢູ່ບັນດາປະເທດຕ່າງໆທົ່ວໂລກ. ໂຄງການດັ່ງກ່າວຈຶ່ງໄດ້ແກ່ຍາວມາຮອດປັດຈຸບັນ ແລະ ໄດ້ຕໍ່ເວລາໃຫ້ໂຄງການສໍາເລັດໃນເດືອນທັນວາ 2024.
ການຂົນສົ່ງສາທາລະນະ ຄືລົດເມດ່ວນ ແມ່ນການຂົນສົ່ງທີ່ພວກເຮົາເລືອກຈະພັດທະນາ ແລະ ຈະນໍາໃຊ້ເຂົ້າໃນການຮັບໃຊ້ການບໍລິການ ໃນປີ 2025. ພ້ອມນັ້ນ, ໃນອະນາຄົດ ໂຄງການດັ່ງກ່າວຈະເປັນຂໍ້ລິເລີ່ມແກ່ການກໍານົດນະໂຍບາຍ ແລະ ຍຸດທະສາດຂອງການຂົນສົ່ງສາທາລະນະ ແລະ ຫວັງວ່າການວາງແຜນການຂົນສົ່ງສາທາລະນະ ທີ່ປົກຄຸມພື້ນທີ່ຂອງຕົວເມືອງເຂດຕ່າງໆໃຫ້ທົ່ວເຖິງ ທັງມີບົດບາດສໍາຄັນຫຼາຍໃນການປະກອບສ່ວນໃຫ້ແກ່ການສັນຈອນຕາມທ້ອງຖະໜົນມີ ຄວາມສະດວກ ປອດໄພຈາກອຸບັດເຫດ.
ແນວໃດກໍຕາມ ຖ້າຫາກຕາຂ່າຍການບໍລິການລົດເມ ບໍ່ມີການບໍລິການເປັນຕ່ອງໂສ້ຕິດຕໍ່ກັນ ແລະ ຍັງໃຊ້ເວລາຫຼາຍໃນການເດີນທາງ. ພ້ອມນີ້, ຄ່າໂດຍສານຍັງສູງ ລວມທັງວິທີການຊື້ປີ້ຖ້າຍັງຫຍຸ້ງຍາກ, ຄ່າໃຊ້ຈ່າຍ ແລະ ຄວາມສະດວກທຽບເທົ່າ ຫຼື ໃກ້ຄຽງ ກັບການເດີນທາງດ້ວຍລົດສ່ວນຕົວ ກໍຈະເປັນໄປໄດ້ຍາກທີ່ຈະດຶງດູດເອົາຜູ້ໃຊ້ລົດ – ໃຊ້ຖະໜົນປ່ຽນພຶດຕິກໍາໃນການເດີນທາງ. ສະນັ້ນ, ບັນຫານີ້, ຢາກໃຫ້ຜູ້ທີ່ມີໜ້າທີ່ຄຸ້ມຄອງວາງແຜນການບໍລິການ ຕ້ອງໄດ້ເຮັດການສຶກສາປະເມີນຜົນ ແລະ ມີການປັບປຸງເປັນແຕ່ລະໄລຍະທັງມີການໂຄສະນາໃຫ້ຜູ້ໂດຍສານມີ ຄວາມໄວ້ເນື້ອເຊື່ອໃຈແກ່ການບໍລິການລົດເມແບບໃໝ່.
ການພັດທະນາຕົວເມືອງ ປັດຈຸບັນແມ່ນການຫັນໄປສູ່ການຄຸ້ມຄອງ ແລະ ການບໍລິການຕົວເມືອງແບບທັນສະໄໝ ເຊິ່ງການຂົນສົ່ງແບບທັນສະໄໝນີ້ ແມ່ນອົງປະກອບຕົ້ນຕໍຂອງຕົວເມືອງ. ສະນັ້ນ, ການບໍລິການລົດເມດ່ວນ BRT ໃນອະນາຄົດຈະຕ້ອງຫັນໄປສູ່ລະບົບທັນສະໄໝ ມາດຖານການບໍລິການທຽບເທົ່າກັບສາກົນ, ຖ້າຈັດຕັ້ງໂຄງການນີ້ປະສົບຜົນສໍາເລັດດ້ວຍດີ ຈະປະກອບສ່ວນແກ່ການຫຼຸດຜ່ອນຄວາມແອອັດ, ອຸບັດເຫດ, ການສັນຈອນໃນທ້ອງຖະໜົນ ແລະ ຫຼຸດຜ່ອນມົນລະພິດຢູ່ໃນ ນວ ພ້ອມທັງຍັງເປັນການປະກອບສ່ວນແກ່ການປະຢັດພະລັງງານ ເປັນຕົ້ນນໍ້າມັນເຊື້ອໄຟທີ່ນໍາມາໃຊ້ສໍາລັບການຂົນສົ່ງປັດຈຸບັນ ແລະ ປະຢັດເງິນຕາຕ່າງປະເທດຕື່ມອີກ.
ກອງປະຊຸມໃນຄັ້ງນີ້, ຜູ້ເຂົ້າຮ່ວມຍັງໄດ້ຮັບຟັງການນໍາສະເໜີອົງປະກອບຂອງໂຄງການ, ຄວາມຄືບໜ້າ ແລະ ແຜນການຈັດຕັ້ງປະຕິບັດໂຄງການ, ຮັບຟັງການລາຍງານລະບົບການຄຸ້ມຄອງການຈະລາຈອນ ແລະ ບ່ອນຈອດລົດແຄມທາງ, ຮັບຟັງລາຍງານຄວາມຄືບໜ້າຂອງການກໍ່ສ້າງ ພ້ອມທັງຍັງໄດ້ປຶກສາຫາລື, ແລກປ່ຽນປະກອບຄຳຄິດເຫັນເຊິ່ງກັນ ແລະ ກັນຕື່ມອີກ.
[ ຂ່າວ – ຮູບ: ປະຊາຊົນ ]
