ນັບແຕ່ໃດມາ ຢູ່ພາຍໃນປະເທດເຮົາ ການເຮັດທຸລະກິດໃດກໍແລ້ວແຕ່ ມັກເຮັດແບບເປັນກະແສແຂ່ງກັນ ( ເຫັນເຮັດໄດ້ກໍພາກັນເຮັດເຫີ່ຕາມກັນ ) ແຕ່ບັນດາທຸລະກິດທັງຫຼາຍ ຕ້ອງຫັນໄປຕາມກະແສ ແລະ ຄວາມຮຽກຮ້ອງຕ້ອງການຂອງສັງຄົມສະໄໝໃໝ່, ຫາກທຸລະກິດໃດ ເຮັດແບບເກົ່າ ບໍ່ພັດທະນາຕາມຍຸກ ຫຼື ຕອບສະໜອງຕາມຄວາມຕ້ອງການຂອງລູກໄດ້ ທຸລະກິດດັ່ງກ່າວຕ້ອງຕາຍໄປກັບເວລາ ຍິ່ງໃນຍຸກເສດຖະກິດມີຄວາມຫຍຸ້ງຍາກແບບນີ້ ແລະ ຍຸກທີ່ທຸກຢ່າງຫັນເປັນດີຈີຕອນແບບນີ້ ຍິ່ງຕ້ອງມີການປັບຕົວ.
ຖ້າເອີ່ຍເຖິງທຸລະກິດ ຟັງເບິ່ງຄືງ່າຍ ພຽງແຕ່ມີເງິນແລ້ວລົງມືເຮັດໄດ້ ແຕ່ໃນຄວາມເປັນຈິງ ການເຮັດທຸລະກິດໃດໜຶ່ງນັ້ນ ສິ່ງທີ່ຜູ້ລົງທຶນ ຫຼື ນັກທຸລະກິດຫວັງ ກໍຄືການເຮັດໃຫ້ທຸລະກິດມີຄວາມຈະເລີນ, ມີເງິນທຶນໝູນວຽນສູງ ແລະ ມີຄວາມຍືນຍົງ ຄຽງຄູ່ກັບມີການຫັນປ່ຽນ ຫຼື ປັບປຸງທຸລະກິດຢູ່ຕະຫຼອດເວລາ ເພື່ອໃຫ້ສາມາດຕອບໂຈດກັບຄວາມຕ້ອງການຂອງລູກຄ້າໄດ້ໃນແຕ່ລະໄລຍະ, ໂດຍສະເພາະປະຈຸບັນຄວາມຕ້ອງການຂອງລູກຄ້າແມ່ນຕ້ອງວ່່ອງໄວ, ທັນໃຈ, ລາຄາຍຸຕິທຳ ແລະ ສິນຄ້າ ຫຼື ການບໍລິການທີ່ໄດ້ມາດຕະຖານ.
ທຸລະກິດສ້ອງແປງ ແລະ ຕົກແຕ່ງລົດ ເປັນທຸລະກິດໜຶ່ງທີ່ຫຼາຍຄົນເບິ່ງຂ້າມ ແຕ່ມັນເປັນທຸລະກິດທີ່ຍືນຍົງ ແລະ ສ້າງລາຍຮັບໄດ້ຕະຫຼອດ ເນື່ອງຈາກປັດຈຸບັນ ເຖິງວ່າເສດຖະກິດຈະພົບຄວາມຫຍຸ້ງຍາກ, ບັນຫາເງິນເຟີ້, ອັດຕາແລກປ່ຽນທີ່ສູງ ແຕ່ເຫັນໄດ້ວ່າບັນດາໂຊລູມລົດໃຫຍ່ ແລະ ລົດຈັກ ທັງມືໜຶ່ງ ແລະ ມືສອງຍັງມີຍອດຂາຍທີ່ດີ. ການນຳໃຊ້ຍານພາຫະນະກໍຕ້ອງມີການຫຼຸ້ຍຫ້ຽນ ແລະ ເສື່ອມສະພາບຕາມການໃຊ້ງານ ສະນັ້ນຕ້ອງມີການເປ່ເພ ແລະ ສ້ອມແປງ.
ດັ່ງນັ້ນທຸລະກິດສ້ອມແປງລົດ ທັງລົດຈັກ ແລະ ລົດໃຫຍ່ ຍັງຖືວ່າໄປໄດ້ດີ ເພາະຍັງມີລູກຄ້າຈຳນວນຫຼາຍເຂົ້າໄປໃຊ້ບໍລິການຢູ່ຕະຫຼອດ ແລະ ຍິ່ງປັດຈຸບັນ ມີລົດທີ່ອອກມາຫຼາຍລຸ້ນ, ຫຼາຍຍີ່ຫໍ້ ຫາກເຈົ້າຂອງຮ້ານມີການພັດທະນາຮຽນຮູ້ໄປເລື້ອຍໆ ກໍຍິ່ງຈະສາມາດຕອບໂຈດລູກຄ້າໄດ້ດີ, ນອກຈາກສ້ອມແປງເວລາລົດລູກຄ້າເປ່ເພແລ້ວ ຍັງມີກຸ່ມຄົນຈຳນວນໜຶ່ງ ມັກແຕ່ງລົດ ເຊິ່ງຈະຈົນເກືອບໝົດຄັນກໍມີ, ຫາກຮ້ານໃດ ສາມາດແປງລົດໄດ້ເກືອບທຸກປະເພດ, ມີອາໄລ່ຄົບ, ມີການບໍລິການທີ່ວ່ອງໄວທັນໃຈ ແລະ ໄດ້ມາດຕະຖານ ຮ້ານນັ້ນຍິ່ງມີລູກຄ້າເຂົ້າໄປໃຊ້ບໍລິການຫຼາຍ, ດັ່ງນັ້ນທຸລະກິດສ້ອມແປງລົດ ຈຶ່ງຍັງສາມາດດຳເນີນໄປໄດ້ດີ.
ທີ່ສຳຄັນ ທຸລະກິດດ້ານນີ້ຍັງຈະຍັງສາມາດສ້າງລາຍຮັບໃຫ້ກັບເຈົ້າຂອງໄດ້ໄປອີກດົນ ແລະ ຖ້າທ່ານໃດສົນໃຈຢາກມາສຶກສາເບິ່ງທຸລະກິດດ້ານນີ້ໄດ້ ເພາະທ່າອ່ຽງຍັງດີ, ຄູ່ແຂ່ງເຖິງຈະມີແລ້ວ ແຕ່ຫາກທ່ານມີຄວາມໝັ້ນໃຈໃນສີມືການບໍລິການ, ໝັ້ນໃຈດ້ານການເຮັດການຕະຫຼາດ, ມີສະຖານທີ່ອຳນວຍຄວາມສະດວກແລ້ວ ໂອກາດກໍຍິ່ງເໝາະສົມ ແລະ ຖ້າມີບໍລິການຮັບແກ່ລົດຂອງລູກຄ້າທີ່ມີບັນຫາຢູ່ທຸກສະຖານທີ່ຍິ່ງດີ ເພາະຢູ່ໃນລາວຍັງບໍ່ທັນມີບໍລິການແບບຄົບວົງຈອນແບບນີ້ຫຼາຍເທື່ອ.
