ໃນຍຸກເຕັກໂນໂລຊີທັນສະໄໝ, ຍຸກທີ່ມີການແຂ່ງຂັນສູງໃນທຸກດ້ານ ແລະ ຫຼາຍຄົນແລ່ນຕາມວຽກ ແລ່ນຕາມເວລາ ຈົນບໍ່ມີເວລາມາທຳຄວາມສະອາດບ້ານເຮືອນ, ຫ້າງຮ້ານ, ອາຄານ, ຫ້ອງການ ແລະ ສຳນັກງານຕ່າງໆ ອັນໄດ້ເຮັດໃຫ້ສັງຄົມເກີດມີຄວາມຕ້ອງການດ້ານບໍລິການ ກ່ຽວກັບການທຳຄວາມສະອາດຫຼາຍຂຶ້ນ.
ດັ່ງນັ້ນມາຮອດປັດຈຸບັນ ຈຶ່ງມີນັກທຸກລະກິດຈຳນວນໜຶ່ງ ຫັນມາເຮັດທຸລະກິດໃຫ້ບໍລິການທຳຄວາມສະອາດ ແລະ ນັບມື້ມີໜໍ່ແໜງເກີດຂຶ້ນຫຼາຍ, ທັງນີ້ກໍເພື່ອຕອບໂຈດໃຫ້ກັບບັນດາລູກຄ້າ ເຊິ່ງທຸລະກິດທຳຄວາມສະອາດ ຜ່ານມາແມ່ນບໍ່ຄ່ອຍມີຄົນໃຊ້ບໍລິການຫຼາຍ ເນື່ອງຈາກວ່າຈະມີການຈ້າງແມ່ບ້ານມາປະຈຳຫ້ອງການເອງ ແຕ່ຫຼາຍບ່ອນກໍບໍ່ຈຳເປັນຕ້ອງມີແມ່ບ້ານປະຈຳ ຫຼື ການຊອກຫາແມ່ບ້ານກໍພົບຄວາມຫຍຸ້ງຍາກ, ທີ່ສຳຄັນຍັງຕ້ອງໄດ້ຊື້ວັດຖຸອຸປະກອນເອງທຸກຢ່າງໃຫ້ແມ່ບ້ານ ( ເຊິ່ງມັນເປັນວຽກຍ່ອຍ ) ແລະ ຫຼາຍຄົນກໍມີເຮືອນຫຼາຍຫຼັງທີ່ບໍ່ຄ່ອຍໄດ້ຢູ່ ແຕ່ຕ້ອງໄດ້ທຳຄວາມສະອາດກໍມີຄວາມຕ້ອງການໃຊ້ບໍລິການບໍລິສັດທຳຄວາມສະອາດ, ຫ້າງຮ້ານ ກໍຫັນມາຈ້າງບໍລິສັດທຳຄວາມສະອາດ ໂດຍໃຫ້ສົ່ງພະນັກງານ ແລະ ເຄື່ອງມືອຸປະກອນໄປຮັບແບບມອບເໝົາ, ເປັນລາຍເດືອນ ແລະ ລາຍປີກໍມີ.
ການເຮັດທຸລະກິດດ້ານການທຳຄວາມສະອາດ ນອກຈາກຈະເປັນການເຮັດທຸລະກິດດ້ານການບໍລິການແລ້ວ ທີ່ສຳຄັນແມ່ນເປັນການສ້າງວຽກເຮັດງານທຳໃຫ້ກັບແຮງງານລາວ ໂດຍສະເພາະແມ່ນແຮງງານດິບ ທັງແມ່ຍິງ ແລະ ຜູ້ຊາຍ ເພາະຫາກສ້າງຕັ້ງເປັນບໍລິສັດແລ້ວ ມີພະນັກງານຢ່າງໜ້ອຍ 5 ຄົນຂຶ້ນໄປ; ຫາກເປັນບໍລິສັດໃຫຍ່, ການບໍລິການມີຄຸນນະພາບ ມີລູກຄ້າໃຊ້ບໍລິການຫຼາຍ ພະນັກງານໃນບໍລິສັດຢ່າງໜ້ອຍ 20 ຄົນຂຶ້ນໄປ.
ທຸລະກິດທຳຄວາມສະອາດ ແມ່ນທຸລະກິດດ້ານການບໍລິການ, ດັ່ງນັ້ນຕ້ອງແມ່ນຜູ້ທີ່ມີ ຄວາມມັກຮັກໃນດ້ານການບໍລິການແທ້ໆ ໂດຍສະເພາະແມ່ນພະນັກງານຕ້ອງໄດ້ມີການຝຶກອົບຮົມ ແລະ ທີ່ສຳຄັນຄົນທີ່ຈະເຮັດວຽກນີ້ໄດ້ຕ້ອງມີຄວາມອົດທົນ ແລະ ຄວາມດຸໝັ່ນຂະຫຍັນພຽນສູງ.
ເນື່ອງຈາກປັດຈຸບັນຫຼາຍອົງກອນ ກໍໄດ້ຫັນມາໃຊ້ບໍລິການດ້ານການທຳຄວາມສະອາດນີ້ຫຼາຍຂຶ້ນ, ດັ່ງນັ້ນຈຶ່ງເຮັດໃຫ້ມີທຸລະກິດສະໜອງການບໍລິການດ້ານການທຳຄວາມສະອາດມີຫຼາຍຂຶ້ນໃນ ສປປ ລາວ ແລະ ຄາດວ່າໃນຕໍ່ໜ້າຍິ່ງນັບມື້ຈະມີຫຼາຍຂຶ້ນ ການແຂ່ງຂັນທຸລະກິດດ້ານນີ້ກໍນັບມື້ຍິ່ງຈະຫຼາຍຂຶ້ນເຊັ່ນດຽວກັນ, ດັ່ງນັ້ນມັນຈະເປັນຕ່ອງໂສ້ພົວພັນໄປເຖິງການນຳເຂົ້າສິນຄ້າເຄື່ອງທຳຄວາມສະອາດກໍຈະຫຼາຍຂຶ້ນ, ຄວາມຕ້ອງການພະນັກງານຫຼາຍຂຶ້ນເຊັ່ນດຽວກັນ.
