ເຫດການທາງການເມືອງທີ່ກຳລັງຮ້ອນແຮງສຸດຕອນນີ້ກໍ່ຄື ການລົງຄະແນນສຽງຮັບຮອງເອົານາຍົກລັດຖະມົນຕີຄົນໃໝ່ຂອງລາຊະອານາຈັກໄທ ປະເທດບ້ານໃກ້ເຮືອນຄຽງຂອງລາວເຮົານີ້ ມື້ນີ້ທີມຂ່າວພວກເຮົາຈະພາທ່ານໄປຮູ້ຈັກປະຫວັດຫຍໍ້ຂອງ ທ່ານ ນາງ ແພທອງທານ ຊິນນະວັດ.
ທ່ານ ນາງ ແພທອງທານ ຊິນນະວັດ ຖືເປັນນາຍົກລັດຖະມົນຕີທີ່ອາຍຸນ້ອຍທີ່ສຸດໃນປະຫວັດສາດຂອງໄທ ແລະ ຍັງເປັນນາຍົກ ຍິງ ຄົນທີ 2 ຂອງປະເທດ ພາຍຫຼັງທີ່ສະພາໄດ້ລົງຄະແນນສຽງຮັບຮອງໃນວັນທີ 16 ສິງຫາ 2024 ນີ້ ດ້ວຍຄະແນນເຫັນດີ 319 ສຽງ, ບໍ່ເຫັນດີ 145 ສຽງ ແລະ ບໍ່ລົງຄະແນນສຽງ 27 ສຽງ.
ໂດຍທ່ານນາງ ແພທອງທານ ຊິນນະວັດປະຈຸບັນອາຍຸ 38 ປີ ເປັນລູກສາວຫຼ້າຂອງ ທ່ານທັກສິນ ຊິນນະວັດ ອະດີດນາຍົກລັດຖະມົນຕີຂອງໄທ ແລະໄດ້ແຕ່ງງານກັບອະດີດນັກບິນຊື່ ປໍ ປີດົກ ສຸກສະຫວັດ ມີລູກນຳກັນສອງຄົນ.
ໃນດ້ານການສຶກສາ ທ່ານ ນາງ ແພທອງທານ ແມ່ນຈົບປະລິນຍາຕີ ສາຂາສັງຄົມວິທະຍາ ແລະມະນຸດວິທະຍາ ທີ່ຈຸລາລົງກອນ ມະຫາວິທະຍາໄລ, ຈົບປະລິນຍາໂທ ສາຂາບໍລິຫານການໂຮງແຮມນາໆຊາດ ທີ່ມະຫາວິທະຍາໄລເຊີເຣ ແຫ່ງສະຫະລາຊະອານາຈັກອັງກິດ.
ກ່ອນການເຂົ້າສູ່ເວທີການເມືອງ ເພິ່ນແມ່ນເປັນປະທານເຈົ້າໜ້າທີ່ບໍລິຫານບໍລິສັດເຣນ ດີວີລັອບເມັ້ນ ດູແລໃນກຸ່ມທຸລະກິດໂຮງແຮມ ແລະສະໜາມກ໊ອຟ.
ສຳລັບທ່ານ ນາງແພງທອງທານແລ້ວ ການເຂົ້າມາເວທີການເມືອງບໍ່ແມ່ນຫາກໍ່ເລີ່ມຕົ້ນນີ້ ແຕ່ເພິ່ນໄດ້ຄ່ອຍໆຊືມຊັບການເມືອງມາແຕ່ອາຍຸປະມານ 8 ປີ ໂດຍການໄປຮ່ວມແຈກໃບປິວກັບພໍ່ກໍ່ຄືທ່ານທັກສິນ ຊິນນະວັດ ທີ່ເປັນນັກການເມືອງມາໂດຍຕະຫຼອດ ຈົນມາຮອດປີ 2021-2022 ຈຶ່ງເລີ່ມເຂົ້າສູ່ເວທີການເມືອງ ແລະໄດ້ຮັບຕຳແໜ່ງຫົວໜ້າພັກເພື່ອໄທຍິງຄົນທຳອິດ ກ່ອນໄດ້ຮັບເລືອກເປັນນາຍົກລັດຖະມົນຕີຄົນທີ 31 ຂອງໄທ.
