ໃນວັນທີ 15 ສິງຫາ 2024, ກະຊວງການເງິນ ໄດ້ປະກາດການແຕ່ງຕັ້ງຫົວໜ້າຄັງເງິນແຫ່ງຊາດ; ຫົວໜ້າກົມຄຸ້ມຄອງການບັນຊີ; ຫົວໜ້າສະຖາບັນການເງິນ-ການບັນຊີ ແລະ ແຕ່ງຕັ້ງເລຂາໜ່ວຍພັກຮາກຖານກົມ ແລະ ອົງການທຽບເທົ່າ ໂດຍການເປັນປະທານຂອງ ສະຫາຍ ບຸນປອນ ວັນນະຈິດ ຮອງເລຂາຄະນະພັກຮາກຖານກະຊວງ, ຮອງລັດຖະມົນຕີກະຊວງການເງິນ, ມີຄະນະນໍາ ກົມຈັດຕັ້ງ ແລະ ພະນັກງານ ກະຊວງການເງິນ ພ້ອມດ້ວຍບັນດາກົມກ່ຽວຂ້ອງ ແລະ ພະນັກງານຫຼັກແຫຼ່ງ ເຂົ້າຮ່ວມ.
ໃນພິທີ, ສະຫາຍ ກົງຄໍາ ສິດທິວໍລະດາ ກໍາມະການພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ ໄດ້ຂຶ້ນຜ່ານດໍາລັດ ຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ຫົວໜ້າຄັງເງິນແຫ່ງຊາດ ກະຊວງການເງິນ ສະບັບເລກທີ 346/ນຍ, ລົງວັນທີ 31 ກໍລະກົດ 2024. ເຊິ່ງໄດ້ແຕ່ງຕັ້ງ ທ່ານ ນາງ ຍອດ ແພງສົມບັດ ເປັນຫົວໜ້າຄັງເງິນແຫ່ງຊາດ; ດໍາລັດ ວ່າດ້ວຍການແຕ່ງຕັ້ງ ຫົວໜ້າກົມຄຸ້ມຄອງການບັນຊີ ກະຊວງການເງິນ ສະບັບເລກທີ 347/ນຍ, ລົງວັນທີ 31 ກໍລະກົດ 2024. ໂດຍແຕ່ງຕັ້ງທ່ານ ນາງ ດາວອນ ທອງຈັນ ເປັນຫົວໜ້າກົມຄຸ້ມຄອງການບັນຊີ ກະຊວງການເງິນ ແລະ ດໍາລັດ ວ່າດ້ວຍການແຕ່ງຕັ້ງ ຫົວໜ້າສະຖາບັນການເງິນ-ການບັນຊີ ກະຊວງການເງິນ ສະບັບເລກທີ 348/ນຍ, ລົງວັນທີ 31 ກໍລະກົດ 2024. ໄດ້ແຕ່ຕັ້ງ ທ່ານ ຟອງສີສຸພັນ ພົມມະວົງ ເປັນຫົວໜ້າສະຖາບັນການເງິນ-ການບັນຊີ ກະຊວງການເງິນ.
ພ້ອມກັນນັ້ນ, ສະຫາຍ ກົງຄໍາ ສິດທິວໍລະດາ ໄດ້ຜ່ານມະຕິຕົກລົງ ຂອງຄະນະປະຈໍາພັກກະຊວງການເງິນ ວ່າດ້ວຍການແຕ່ງຕັ້ງເລຂາໜ່ວຍພັກຮາກຖານ ກົມຄຸ້ມຄອງການບັນຊີ ສະບັບເລກທີ 186/ຄປຈ.ກງ, ລົງວັນທີ 14 ສິງຫາ 2024. ໂດຍແຕ່ງຕັ້ງ ສະຫາຍ ນາງ ດາວອນ ທອງຈັນ ເປັນເລຂາໜ່ວຍພັກຮາກຖານ ກົມຄຸ້ມຄອງການບັນຊີ; ຜ່ານມະຕິຕົກລົງ ວ່າດ້ວຍການແຕ່ງຕັ້ງເລຂາຄະນະພັກຮາກຖານ ຄັງເງິນແຫ່ງຊາດ ແລະ ສະຖາບັນການເງິນ-ການບັນຊີ, ເຊິ່ງໄດ້ແຕ່ງຕັ້ງ ສະຫາຍ ນາງ ຍອດ ແພງສົມບັດ ເປັນເລຂາຄະນະພັກຮາກຖານ ຄັງເງິນແຫ່ງຊາດ ແລະ ແຕ່ງຕັ້ງ ສະຫາຍ ຟອງສີສຸພັນ ພົມມະວົງ ເປັນເລຂາຄະນະພັກຮາກຖານ ສະຖາບັນການເງິນ-ການບັນຊີ ກະຊວງການເງິນ.
ສະຫາຍ ບຸນປອນ ວັນນະຈິດ ໄດ້ມີຄຳເຫັນໂອ້ລົມຕໍ່ພິທີແຕ່ງຕັ້ງພະນັກງານນໍາພາ ຄຸ້ມຄອງ ຄັ້ງນີ້ວ່າ: ໃນການແຕ່ງຕັ້ງ ກໍຄືການມອບໜ້າທີ່ໃນຄັ້ງນີ້ ບັນດາສະຫາຍທີ່ໄດ້ຮັບການແຕ່ງຕັ້ງ ແລະ ພະນັກງານຫຼັກແຫຼ່ງທຸກສະຫາຍ ຕ້ອງໄດ້ເພີ່ມທະວີການຊີ້ນໍາ, ນໍາພາທາງດ້ານການເມືອງແນວຄິດ ຕີຖອຍປະກົດການຫຍໍ້ທໍ້ຕ່າງໆ, ນໍາພາອ້າຍນ້ອງພະນັກງານ ຈັດຕັ້ງປະຕິບັດໜ້າທີ່ການເມືອງ, ສ້າງແຜນການດໍາເນີນງານ, ແຜນວຽກປະຈໍາເດືອນ, ປະຈໍາປີ ແລະ ຈັດຕັ້ງປະຕິບັດໃຫ້ສໍາເລັດຕາມລະດັບຄາດໝາຍ.
