ໃນວັນທີ 4 ກໍລະກົດ 2024 ທີ່ຫ້ອງປະຊຸມໃຫ່ຍຊັ້ນ1ຂອງກະຊວງອຸດສາຫະກຳ ແລະ ການຄ້າ ໄດ້ມີ ກອງປະຊຸມໃຫຍ່ ຄັ້ງທີ III ຂອງໜ່ວຍສະຫະພັນແມ່ຍິງກົມມາດຕະຖານ ແລະ ວັດແທກ ກະຊວງອຸດສາຫະກໍາ ແລະ ການຄ້າ ໂດຍການເປັນປະທານຂອງທ່ານນາງ ລັດດາວັນ ສີວົງໄຊ ປະທານສະຫະພັນແມ່ຍິງກົມມາດຕະຖານ ແລະ ວັດແທກເປັນກຽດເຂົ້າຮ່ວມຂອງສະຫາຍ ນາງ ສົມໝາຍ ພົມມຸນີວົງ ປະທານສະຫະພັນແມ່ຍິງກະຊວງອຸດສາຫະກໍາ ແລະ ການຄ້າ ແລະ ທ່ານ ວຽງທອງ ວົງທະວິໄລ ຄະນະບໍລິຫານງານພັກ ກະຊວງອຸດສາຫະກໍາ ແລະ ການຄ້າ, ເລຂາໜ່ວຍພັກກົມມາດຕະຖານ ແລະ ວັດແທກ ມີເລຂາໝ່ວຍຊາວໝຸ່ມ, ກຳມະບານ ພ້ອມນັ້ນຍັງມີມີບັນດາຄະນະສະຫະພັນແມ່ຍິງພາຍໃນ ເຊິ່ງມີຜູ້ເຂົ້າຮ່ວມທັງໝົດ 50 ກ່ວາຄົນ.
ໃນກອງປະຊຸມ ທ່ານ ນາງ ລັດດາວັນ ສີວົງໄຊ ປະທານສະຫະພັນແມ່ຍິງກົມມາດຕະຖານ ແລະ ວັດແທກ ໄດ້ຂື້ນຜ່ານຮ່າງບົດລາຍງານການເມືອງນັບແຕ່ປີ 2019-2023 ແລະ ທິດທາງແຜນການ 5 ປີ 2024-2028, ທ່ານ ນ ລັດດາ ພິມມະຈັກ ໄດ້ຂຶ້ນຜ່ານຮ່າງບົດສຳຫຼວດຊີ້ນຳນຳພາຂອງຄະນະຊຸດເກົ່າ ແລະ ທ່ານ ນ ສຸພັນສາ ວັນນະໂພ ໄດ້ຂຶ້ນກ່າວບົດອຳລາໜ້າທີ່ຕຳແໜ່ງ ກອງປະຊຸມໃຫຍ່ ຄັ້ງທີ III ຂອງໜ່ວຍສະຫະພັນແມ່ຍິງກົມມາດຕະຖານ ແລະ ວັດແທກ ໄດ້ໄຂຂຶ້ນໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວ ພວມສືບຕໍ່ຈັດຕັ້ງປະຕິບັດກອງປະຊຸມໃຫ່ຍຄັ້ງທີ XI ຂອງພັກ, ມະຕິກອງປະຊຸມໃຫຍ່ຜູ້ແທນແມ່ຍິງລາວ ທົ່ວປະເທດ ຄັ້ງທີ VII ຂອງສູນກາງສະຫະພັນແມ່ຍິງລາວ. ທັງຢູ່ໃນບັນຍາກາດທີ່ ພະນັກງານ – ລັດຖະກອນ ໃນທົ່ວຂະແໜງອຸດສາຫະກໍາ ແລະ ການຄ້າ ກະກຽມດໍາເນີນກອງ ປະຊຸມໃຫຍ່ 3 ຂັ້ນ ຂອງອົງຄະນະພັກກະຊວງອຸດສາຫະກໍາ ແລະ ການຄ້າ ເວົ້າລວມ, ເວົ້າສະເພາະ ແມ່ນກອງ ປະຊຸມ ໃຫຍ່ຂອງ ໜ່ວຍສະຫະພັນແມ່ຍິງກົມມາດຕະຖານ ແລະ ວັດແທກ ກໍຄືຕາມທິດຊີ້ນຳຂອງສະຫະພັນແມ່ຍິງຂັ້ນເທິງຢ່າງມີຂະບວນຟົດຟື້ນ ສູ້ຊົນຜ່ານຜ່າ ຈັດຕັ້ງປະຕິບັດໜ້າທີ່ວຽກງານ ກໍ່ຄືທິດທາງແຜນການທີ່ໄດ້ຮັບມອບໝາຍດ້ວຍຄວາມເອົາໃຈໃສ່ ແນ່ໃສ່ບັນລຸໄດ້ ຕາມແຜນພັດທະນາຂອງຂະແໜງອຸດສາຫະກໍາ ແລະ ການຄ້າ ວາງອອກ.
ຄະນະສະຫະພັນແມ່ຍິງກົົມມາດຕະຖານ ແລະ ວັດແທກມີທັງໝົດ3ທ່ານ ພ້ອມດ້ວຍສະມາຊິກ ຈຳນວນ35 ທ່ານ ເຊິ່ງກອງປະຊຸມໄດ້ປ່ອນບັດເລືອກເອົາຄະນະບໍລິຫານຊຸດໃໝ່ ເຊິ່ງໄດ້ດັ່ງນີ້:
1. ທ່ານ ນ ແສງທິບ ພິມພາວົງ ເປັນປະທານສະຫະພັນແມ່ຍິງ ກມວ
2. ທ່ານ ນ ລັດດາ ພິມມະຈັກ ເປັນຮອງປະທານ
3. ທ່ານ ນ ສຸພັນສາ ວັນນະໂພ ເປັນຄະນະ
ໃນໂອກາດນີ້ ສະຫາຍ ວຽງທອງ ວົງທະວິໄລ ເລຂາໜ່ວຍພັກ ກມວ ກໍໃຫ້ກຽດມີຄໍາເຫັນຕໍ່ກອງປະຊຸມ ຊຶ່ງສະຫາຍໄດ້ສະແດງຄວາມຊົມເຊີຍຕໍ່ຜົນງານຂອງຄະນະສະຫະພັນແມ່ຍິງກົມມາດຕະຖານ ແລະ ວັດແທກ ທີ່ຍາດມາໄດ້ໃນໄລຍະ 5 ປີຜ່ານມາ ພ້ອມທັງໄດ້ເນັ້ນໜັກໃຫ້ສະມາຊິກແມ່ຍິງ ກົມຈົ່ງພ້ອມກັນໃຊ້ສິດປະຊາທິປະໄຕຄັດເລືອກເອົາຄະນະສະຫະພັນແມ່ຍີງຊຸດໃໝ່ດ້ວຍຄວາມຮັບຜິດຊອບສູງ. ພ້ອມດຽວກັນນີ້, ບັນດາສະມາຊິກແມ່ຍິງ ກໍໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາ ຄະນະບໍລິຫານງານ ສະຫະພັນແມ່ຍິງກົມມາດຕະຖານ ແລະ ວັດແທກຊຸດໃໝ່ ຊຶ່ງມີຜູ້ລົງເລືອກຕັ້ງຈຳນວນ 05 ສະຫາຍ ແລະ ເລືອກໄດ້ 03 ສະຫາຍ, ໃນກອງປະຊຸມຄັ້ງປະຖົມມະລຶກຄົບຄະນະປະທານໄດ້ຕົກລົງເຫັນດີເລືອກເອົາ ຄະນະສະຫະພັນແມ່ຍິງ ກມວ ຊຸດໃໝ່ ຄື: 1, ສະຫາຍ ນາງ ແສງທິບ ພິມພາວົງ ເປັນ ຫົວໜ້າໜ່ວຍ ສະຫາຍ ນາງ ລັດດາ ພິມມະຈັກ ເປັນຮອງຫົວໜ້າໜ່ວຍ ແລະ ສະຫາຍ ນາງ ສຸພັນສາ ວັນນະໂພ ເປັນຄະນະໜ່ວຍ ຮັບຜິດຊອບວຽກງານກວດກາ.
ໃນຕອນທ້າຍ, ສະຫາຍ ນາງ ສົມໝາຍ ພົມມູນີວົງ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ ຊຶ່ງສະຫາຍໄດ້ສະແດງຄວາມຊົມເຊີຍຕໍ່ຄະນະໜ່ວຍສະຫະພັນແມ່ຍີງຊຸດໃໝ່ ພ້ອມທັງຍ້ອງຍໍຊົມເຊີຍຕໍ່ຄວາມພະຍາຍາມ ແລະ ຫຼາຍຜົນງານອັນພົ້ນເດັ່ນທີ່ຍາດມາໄດ້ໃນໄລຍະຜ່ານມາ. ສະຫາຍຍັງໄດ້ເນັ້ນໜັກໃຫ້ເອົາໃຈໃສ່ນໍາພາ-ຊີ້ນໍາທຸກຂະບວນການ, ໃກ້ສິດຕິດແທດກັບເອື້ອຍນ້ອງແມ່ຍິງ ເພື່ອເປັນການເຕົ້າໂຮມຄວາມສາມມັກຄີໃຫ້ເອື້ອຍນ້ອງແມ່ຍິງມີຄວາມໜັກແໜ້ນເຂັ້ມແຂງ, ຊຸກຍູ້ສຶກສາອົບຮົມການເມືອງ-ແນວຄິດໃຫ້ສະມາຊິກຂອງຕົນຢ່າງເປັນປົກກະຕິ, ຕໍ່ເນື່ອງ ເຮັດໃຫ້ເອື້ອຍນ້ອງສະມາຊິກມີຄວາມໜັກແໜ້ນທາງດ້ານຄຸນທາດການເມືອງ, ມີແນວຄິດອຸ່ນອ່ຽງທຸ່ນທ່ຽງ, ສົ່ງເສີມຄວາມເປັນເອກະພາບໃນການເຄື່ອນໄຫວວຽກງານ, ຍຶດໝັ້ນຮັກສາຄວາມສາມັກຄີພາຍໃນເປັນອັນໜຶ່ງອັນດຽວກັນ ປົກປ້ອງສິດຜົນປະໂຫຍດຂອງແມ່ຍິງ, ສຸມໃສ່ແບບແຜນວິທີການນຳພາ, ແບບແຜນວິທີເຮັດວຽກເພື່ອກໍ່ສ້າງໃຫ້ໄດ້ພະນັກງານຍິງທີມີຄຸນນະພາບ, ປະກອບສ່ວນໃນອົງການຈັດຕັ້ງພັກ-ລັດໃຫ້ມີຄວາມເຂັ້ມແຂງ, ຖືເອົາການປະຕິບັດຂໍ້ແຂ່ງຂັນ 3 ດີໂດຍຕິດພັນກັບການເຄື່ອນໄຫວວຽກງານວິຊາສະເພາະຂອງຕົນ, ເອົາໃຈໃສ່ສືບຕໍ່ບຸກບືນສູ້ຊົນ ແລະ ແກ້ໄຂຂໍ້ຫຍຸ້ງຍາກຢ່າງຕັ້ງໜ້າ, ສືບຕໍ່ ນໍາພາ-ຊີ້ນໍາ ສະມາຊິກພາຍໃນໜ່ວຍ ເພື່ອຕອບສະໜອງໜ້າທີ່ການເມືອງທີ່ການຈັດຕັ້ງມອບໝາຍໃຫ້. ພ້ອມນັ້ນ, ກໍຕ້ອງຮ່ວມແຮງຮ່ວມໃຈກັນຢ່າງຕັ້ງໜ້າ ໃນການປະຕິບັດຕາມແນວທາງຂອງພັກ, ກົດໝາຍ ແລະ ລະບຽບການຕ່າງໆຂອງລັດ ຢ່າງເປັນຂະບວນຝົດຟື້ນ ແລະ ມີໝາກຜົນອັນຈົບງາມຂຶ້ນເລື້ອຍໆ ເພື່ອແນ່ໃສ່ການສົ່ງເສີມດ້ານດີ, ດ້ານຕັ້ງໜ້າປະຕິບັດວຽກງານ ແລະ ຊອກຫາວິທີທາງແກ້ໄຂຂໍ້ຄົງຄ້າງໃຫ້ທັນກັບເວລາ.
