ຕົ້ນເດືອນສິງຫານີ້, ພະແນກອຸດສາຫະກຳ ແລະ ການຄ້າ(ອຄ)ແຂວງຈຳປາສັກ ໄດ້ຈັດກອງປະຊຸມ ປຶກສາຫາລືຮ່ວມກັບຂະແໜງການທີ່ກ່ຽວຂ້ອງພາກລັດ ແລະ ພາກທຸລະກິດພາຍໃນແຂວງ ເພື່ອເກັບກຳບັນຫາຂອງທຸລະກິດ ນຳເຂົ້າ-ສົ່ງອອກ ພາຍໃນແຂວງ. ກອງປະຊຸມ ຈັດຂຶ້ນຢູ່ຫ້ອງປະຊຸມພະແນກ ອຄ ແຂວງ ໂດຍການເປັນປະທານຂອງ ທ່ານ ບຸນຍະເດດ ທອງສະຫວັນ ກໍາມະການພັກແຂວງ ຫົວໜ້າພະແນກ ອຄ ແຂວງ ຮອງຫົວໜ້າ ທັງເປັນຜູ້ປະຈຳການ ຄະນະກຳມະການອຳນວຍຄວາມສະດວກທາງດ້ານການຄ້າ ແລະ ການຂົນສົ່ງແຂວງ. ມີການນໍາຂະແໜງການທີ່ກ່ຽວຂ້ອງຂອງພະແນກ ອຄ ແຂວງ, ການນໍາຫົວໜ່ວຍທຸລະກິດ, ຜູ້ປະກອບການ ດ້ານການນໍາເຂົ້າ-ສົ່ງອອກພາຍໃນແຂວງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ໂອກາດກ່າວເປີດກອງປະຊຸມ, ທ່ານ ບຸນຍະເດດ ທອງສະຫວັນ ມີຄໍາເຫັນວ່າ: ກອງປະຊຸມຄັ້ງນີ້ ສຸດທີ່ມີຄວາມໝາຍສໍາຄັນ ເພາະວ່າຈະໄດ້ປຶກສາຫາລື ເພື່ອເກັບກຳບັນຫາຂອງທຸລະກິດນຳເຂົ້າ ແລະ ສົ່ງອອກພາຍໃນແຂວງ ທີ່ຕິດພັນກັບການເຄື່ອນຍ້າຍ, ນຳເຂົ້າ-ສົ່ງອອກສິນຄ້າ ໃນ ສປປ ລາວ ທັງເປັນການຈັດຕັ້ງປະຕິບັດແຜນຍຸດທະສາດອຳນວຍຄວາມສະດວກທາງດ້ານການຄ້າ ແລະ ການຂົນສົ່ງ 5 ປີ (2024-2028) ເພື່ອປັບປຸງການຄ້າ ແລະ ການຂົນສົ່ງ ໃຫ້ມີຄວາມວ່ອງໄວ, ໂປ່ງໃສ ແລະ ປອດໄພ ໂດຍນຳໃຊ້ລະບົບທັນສະໄໝ, ເປົ້າໝາຍເພື່ອຫຼຸດຜ່ອນເວລາ ໃນການອະນຸຍາດ, ຢັ້ງຢືນການນຳເຂົ້າ ແລະ ສົ່ງອອກສິນຄ້າ ຂອງຂະແໜງການກ່ຽວຂ້ອງຢ່າງໜ້ອຍ 25%, ຫຼຸດຜ່ອນເວລາ ໃນການກວດປ່ອຍສິນຄ້ານຳເຂົ້າ-ສົ່ງອອກ ແລະ ຜ່ານແດນຢູ່ດ່ານສາກົນ ຢ່າງໜ້ອຍ 25%, ຍົກສູງການແຂ່ງຂັນ ແລະ ຄຸນນະພາບການບໍລິການດ້ານໂລຈິດສະຕິກ ເພື່ອກະຕຸກຊຸກຍູ້ໃຫ້ປະລິມານການຂົນສົ່ງສິນຄ້ານຳເຂົ້າ – ສົ່ງອອກ ແລະ ຜ່ານແດນ ຜ່ານທ່າບົກ ແລະ ສະຖານີລົດໄຟລາວ-ຈີນ ໃຫ້ເພີ່ມຂຶ້ນຢ່າງໜ້ອຍ 50%, ຫຼຸດຜ່ອນຈຸດກວດກາຕາມເສັ້ນທາງທີ່ບໍ່ຈຳເປັນ ເພື່ອອຳນວຍຄວາມສະດວກໃຫ້ແກ່ການເຄື່ອນຍ້າຍ ແລະ ການຂົນສົ່ງສິນຄ້າ ຢູ່ພາຍໃນປະເທດ ຢ່າງໜ້ອຍ 50%.
ໃນກອງປະຊຸມ, ທ່ານ ນາງ ອຸໄທທິບ ວົງຈັນທະລາ ຂະແໜງການຄ້າຕ່າງປະເທດ ພະແນກ ອຄ ແຂວງ ໃນນາມຫ້ອງການປະຈຳການ ໜ່ວຍງານອຳນວຍຄວາມສະດວກທາງດ້ານການຄ້າໄດ້ຜ່ານບົດສະຫຼຸບການຈັດຕັ້ງປະຕິບັດແກ້ໄຂບັນຫາ ການສະເໜີຂອງພາກທຸລະກິດ ໃນ 6 ເດືອນ ປີ 2024, ວຽກອຳນວຍຄວາມສະດວກທາງດ້ານການຄ້າແຂວງຈຳປາສັກ ໄດ້ຖືກດຳເນີນການຕັ້ງແຕ່ ປີ 2022 ຊຶ່ງສາມາດເກັບກຳບັນຫາທີ່ຕິດພັນກັບ ນິຕິກຳ, ແບບແຜນວິທີຈັດຕັ້ງປະຕິບັດຂອງຂະແໜງ ແລະ ແກ້ໄຂ ໄດ້ຫຼາຍບັນຫາ ທັງຂັ້ນສູນກາງ ແລະ ທ້ອງຖິ່ນ. ໃນ 6 ເດືອນຕົ້ນປີ 2024, ບັນຫາທີ່ໄດ້ຖືກແກ້ໄຂແລ້ວ 2 ບັນຫາ ຄື: ການເກັບຄ່າບໍລິການທ່າບົກທີ່ບໍ່ສອດຄ່ອງກັບອັດຕາແລກປ່ຽນຂອງທະນາຄານທຸລະກິດ ຕາມແຈ້ງການຂອງກົມຄຸ້ມຄອງເງິນຕາຕ່າງປະເທດ ເລກທີ 1566/ກຄງຕ, ລົງວັນທີ 7 ມີນາ 2024; ໄດ້ຈັດຕັ້ງປະຕິບັດ ດຳລັດວ່າດ້ວຍທ່າບົກ ເລກທີ 298/ລບ, ລົງວັນທີ 5 ມີຖຸນາ 2024 ທີ່ໄດ້ຖືກນຳໃຊ້ແຕ່ວັນທີ 11 ກໍລະກົດ 2024.
ສ່ວນບັນຫາກຳລັງແກ້ໄຂ ມີ 6 ບັນຫາ ເປັນບັນຫາທີ່ຕິດພັນກັບ ທ່າບົກວັງເຕົ່າ ມີ 2 ບັນຫາທີ່ຈະຖືກຍົກເລີກ ເນື່ອງຈາກບໍ່ໄດ້ຈັດຕັ້ງ ໂດຍສະເພາະແມ່ນການເກັບຄ່າບໍລິການກວດການອກຮອບ ແລະ ການເກັບຄ່າເສຍໂອກາດຂອງລົດຂົນສົ່ງລາວ. ມີ 2 ບັນຫາທີ່ຊຸກຍູ້ໃຫ້ບັນດາທ່າບົກຈັດຕັ້ງປະຕິບັດ ແຈ້ງການເລກທີ 1566/ກຄງຕ ລວມມີການປະຕິບັດອັດຕາແລກປ່ຽນທີ່ທະນາຄານທຸລະກິດກຳນົດອອກໃນແຕ່ລະໄລຍະຢ່າງເຂັ້ມງວດ ແລະ ການເກັບຄ່າບໍລິການເປັນເງິນໂດລາຢ່າງດຽວ; ການເກັບ 30% ຂອງຄ່າບໍລິການທັງໝົດຢູ່ຈຸດຄ່ຽນຖ່າຍ ແລະ ລານຕູ້ຢູ່ທ່າບົກ ສະເໜີໃຫ້ປັບປຸງແຈ້ງການໂຄງສ້າງຄ່າບໍລິການທ່າບົກທົ່ວປະເທດ; ການເກັບຄ່າບໍລິການສຳລັບລົດຂົນສົ່ງສິນຄ້າ ປະເພດ 4 ລໍ້ ທີ່ບໍ່ໄດ້ກຳນົດໃນລາຍການອັດຕາຄ່າບໍລິການຂອງທ່າບົກວັງເຕົ່າ ຊຶ່ງສະເໜີຂໍທິດຊີ້ນຳຈາກກະຊວງໂຍທາທິການ ແລະ ຂົນສົ່ງ ທີ່ມີສອງທາງເລືອກ ຄື: ຄົ້ນຄວ້າອອກແຈ້ງການເພີ່ມເຕີມ ເພື່ອໃຫ້ຖືກລະບຽບ, ເຈລະຈາກັບຝ່າຍໄທ ເນື່ອງຈາກກົດໝາຍ ແລະ ສັນຍາສອງຝ່າຍບໍ່ໄດ້ອະນຸຍາດ ລົດ 4 ລໍ້ເປັນລົດຂົນສົ່ງສິນຄ້າ. ນອກນີ້ ຍັງມີບັນຫາທີ່ມີຄວາມຄືບໜ້າ ຄື: ການປັບປຸງໂຄງສ້າງລາຄາຄ່າບໍລິການທ່າບົກ 7 ລາຍການ ທີ່ຍັງບ່ໍທັນໄດ້ຈັດກອງປະຊຸມເປີດກວ້າງມີຄຳເຫັນຈາກຜູ້ປະກອບການ ກ່ອນສະເໜີລັດຖະບານເຊັນຮັບຮອງ; ການປັບປຸງແຈ້ງການ 260/ຍທຂ ແລະ 4718/ຫກ ຊຶ່ງຢູ່ໃນຂັ້ນຕອນການມີຄຳເຫັນເປີດກວ້າງ ຂອງພາກລັດ ແລະ ເອກະຊົນ. ສ່ວນບັນຫາທີ່ຊັກຊ້າ ຄື: ຈຸດກວດກາຕາມເສັ້ນທາງຂອງເຈົ້າໜ້າທີ່ກ່ຽວຂ້ອງ ທີ່ສ້າງຄວາມຫຍຸ້ງຍາກໃຫ້ແກ່ການເຄື່ອນຍ້າຍ ແລະ ຂົນສົ່ງສິນຄ້າພາຍໃນປະເທດຂອງພາກທຸລະກິດ.
ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ສະເໜີ ຄໍາເຫັນ ໂດຍເນັ້ນໃສ່ບັນຫາ, ຂໍ້ສະດວກ, ຂໍ້ຫຍຸ້ງຍາກ ໃນການເຄື່ອນໄຫວທຸລະກິດ ທີ່ຕິດພັນກັບການເຄື່ອນຍ້າຍ, ການນຳເຂົ້າ-ສົ່ງອອກ ທີ່ກຳລັງພົບພໍ້ ໃນປັດຈຸບັນ ແລະ ວິທີການທີ່ສາມາດແກ້ໄຂ ໃນມູມມອງຂອງພາກທຸລະກິດ ເພື່ອຄັດຈ້ອນ ແລະ ໄຈ້ແຍກ ບາງບັນຫາ ທີ່ອາດຕິດພັນກັບນິຕິກຳ, ແບບແຜນວິທີການປະຕິບັດນິຕິກຳຂອງຂະແໜງການ ຫຼື ການຈັດຕັ້ງປະຕິບັດໜ້າທີ່ຂອງບຸກຄົນ. ທັງນີ້ ກໍເພື່ອປຶກສາຫາລືໃນການແກ້ໄຂບັນຫາທີ່ຍັງອຸດຕັນ ບໍ່ໂລ່ງລ່ຽນ, ບໍ່ໂປ່ງໃສ ຂອງພາກລັດ ແລະ ການດຳເນີນທຸລະກິດ ທີ່ອາດບໍ່ສອດຄ່ອງກັບ ນິຕິກຳຂອງຂະແໜງການ ແລະ ປຶກສາຫາລືຮ່ວມກັນ ເພື່ອແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດຂອງ ສປປ ລາວ ກໍຄືແຂວງຈຳປາສັກ ແລະ ເພື່ອເລັ່ງໃສ່ການຈຳກັດການນຳເຂົ້າ ທີ່ຜະລິດໄດ້ພາຍໃນ ທັງເປັນການກະກຽມ ເພື່ອເປີດກອງປະຊຸມພົບປະກັບ ການນໍາແຂວງ ທີ່ຈະມີຂຶ່ນໃນມໍ່ໆນີ້.
(ຂ່າວ-ພາບ: ທູນທອງໃຈ)
