ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ(ສລຍ) ມະຫາວິທະຍາໄລແຫ່ງຊາດ ໂດຍການສະໜັບສະໜູນຂອງອົງການໄຈກາ (JICA) ໄດ້ຈັດງານ ສົ່ງເສີມພັດທະນາທຸລະກິດ ເພື່ອປະກອບສ່ວນສ້າງຄວາມເຂັ້ມແຂງໃຫ້ແກ່ຫົວໜ່ວຍທຸລະກິດໃນການຮັບໃຊ້ສັງຄົມໃນວັນທີ 14 ສິງຫາ 2024 ທີ່ໂຮງແຮມ ຄາວພາຊ້າ ເຂົ້າຮ່ວມຂອງ ທ່ານ Junya NAKANO ອຸປະທູດຂອງສະຖານທູດຍີ່ປຸ່ນປະຈຳ ສປປ ລາວ, ທ່ານ ນາງ Miyako KOBAYASHI ຫົວໜ້າ ຫ້ອງການໄຈກາປະຈຳ ສປປ ລາວ, ທ່ານ ສາ ສິລິພົງ ຮອງຫົວໜ້າສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ກະຊວງ ອຸດສາຫະກໍາ ແລະ ການຄ້າ ໃນງານມີຜູ້ເຂົ້າຮ່ວມ ຫຼາຍກວ່າ 180 ທ່ານ ເຊິ່ງເປັນຕົວແທນຈາກບໍລິສັດ ແລະ ພາກສ່ວນຕ່າງໆທັງພາຍໃນ ແລະ ປະເທດຕ່າງປະເທດ ເຊິ່ງມີຜູ້ເຂົ້າຮ່ວມ ທາງອອນລາຍ ຕື່ມອີກ.
ງານດັ່ງກ່າວ ຈັດຂຶ້ນພາຍໃຕ້ໂຄງການ LJI SUSU ມີຈຸດປະສົງ ສ້າງທ່າແຮງໃນການແຂ່ງຂັນ ແລະ ຂະຫຍາຍເຄືອຂ່າຍທຸລະກິດ ລະຫວ່າງບໍລິສັດພາຍໃນ ແລະ ຕ່າງປະເທດ, ລວມທັງບໍລິສັດຍີ່ປຸ່ນ ໃຫ້ແກ່ຫົວໜ່ວຍບໍລິສັດທີ່ໄດ້ເຂົ້າຮ່ວມໂຄງການ. ພາຍໃນມີການນໍາສະເໜີ 5 ບໍລິສັດທີ່ໄດ້ເຂົ້າຮອບຊະນະເລີດຈາກການແຂ່ງຂັນແຜນທຸລະກິດ LJI SUSU ທີ່ຈັດຂຶ້ນໃນເດືອນຕຸລາ ປີ 2023 ເຊິ່ງພາຍຫຼັງເຂົາເຈົ້າໄດ້ດຳເນີນການຈັດຕັ້ງປະຕິບັດແຜນທຸລະກິດໃຫ້ປະກົດຜົນເປັນຈິງ (Proof of Concept)ເປັນໄລຍະເວລາ 8 ເດືອນ ໂດຍໄດ້ຮັບການສະໜັບສະໜູນເງິນທຶນຈາກອົງການໄຈກາ (JICA) ແລະ ໄດ້ຮັບຄໍາແນະນໍາຈາກຜູ້ໃຫ້ຄໍາແນະນໍາ (Mentor) ຕ່າງປະເທດແລ້ວ, ເຂົາເຈົ້າໄດ້ນໍາສະເໜີກ່ຽວກັບທຸລະກິດຂອງຕົນ ພ້ອມທັງຮູບເເບບໃນການຮ່ວມມືນຳຄູ່ຮ່ວມງານ ຫຼື ນັກລົງທຶນອື່ນໆ ທີ່ມີຄວາມສົນໃຈ.
5 ບໍລິສັດດັ່ງກ່າວມີລາຍຊື່ດັ່ງລຸ່ມນີ້:
1. SYSTORY Co.,Ltd: ແອັບຈັດການບໍລິຫານລະບົບຄລີນິກ ເພື່ອການບໍລິການທີ່ດີຂຶ້ນສຳລັບຄົນເຈັບ
2. ຍອດຊຳ: ຜະລິດຕະພັນເຂົ້າໄກ່ນ້ອຍ ເພື່ອອະນຸລັກວັດທະນະທໍາຂອງຄົນລາວ ເເລະ ສົ່ງເສີມຊີວິດການເປັນຢູ່ຂອງຊາວນາ
3. VendeeX Co., Ltd: ຕູ້ກົດສິນຄ້າອັດຕະໂນມັດ ຂະຫຍາຍຊ່ອງທາງການຈຳໜ່າຍສິນຄ້າ ເພື່ອເພີ່ມຄວາມສະດວກໃຫ້ເເກ່ລູກຄ້າ
4. Cofarm Co., Ltd: ລະບົບສຳລັບການປູກພືດຜັກ ເພື່ອຂະຫຍາຍທ່າແຮງຂອງການກະສິກຳໃນຕົວເມືອງ ແລະ ເພີ່ມທະວີການຜະລິດພາຍໃນ.
5. SAYA Arts and Crafts: ຜະລິດຕະພັນຜ້າຝ້າຍ ເພື່ອສົ່ງເສີມຄຸນຄ່າຂອງຝ້າຍລາວໃຫ້ມີຄວາມແບບຍືນຍົງ ເເລະ ກ້າວສູ່ເວທີສາກົນ.
ນອກຈາກນັ້ນ, ຜູ້ຕາງໜ້າບໍລິສັດສະຕາດອັບຍີ່ປຸ່ນທີ່ມີຊື່ວ່າ Cuel ໄດ້ຮ່ວມບັນຍາຍກ່ຽວກັບປັດໄຈສຳຄັນທີ່ມີຜົນຕໍ່ກັບນັກລົງທຶນ ແລະ ກໍຍັງມີການບັນຍາຍຈາກນັກທຸລະກິດລາວທີ່ປະສົບຜົນສຳເລັດ ເຊິ່ງເປັນຜູ້ກໍ່ຕັ້ງຮ້ານອາຫານ ຂອບໃຈເດີ ແລະ Green Discovery Laos ມາຮ່ວມເເບ່ງປັນປະສົບການໃນຫົວຂໍ້ “ ຄວາມຢືດຢຸ່ນໃນການນໍາພາທຸລະກິດຜ່ານຜ່າໄລຍະທີ່ມີຄວາມທ້າທາຍສູງ”. ໃນຕອນທ້າຍຂອງງານ ຍັງມີການມອບຮາງວັນຕ່າງໆ ໃຫ້ກັບບໍລິສັດທີ່ນໍາສະເໜີ ເພື່ອສະແດງຄວາມຍ້ອງຍໍຊົມເຊີຍຕໍ່ການປະກອບສ່ວນສ້າງຄຸນຄ່າໃຫ້ກັບສັງຄົມລາວ, ເຊິ່ງລາຍລະອຽດລາງວັນຕ່າງໆແລະບໍລິສັດທີ່ໄດ້ຮັບມີດັ່ງນີ້:
●ລາງວັນ LJI SUSU Awards:
– “Best Performance Award”: ບໍລິສັດທີ່ໄດ້ຮັບແມ່ນ Cofarm Co., Ltd
– “Social Impact Award”: ບໍລິສັດທີ່ໄດ້ຮັບແມ່ນ SAYA Arts and Crafts
●ລາງວັນພິເສດ
1. ລາງວັນຈາກ JETRO : ບໍລິສັດທີ່ໄດ້ຮັບແມ່ນ Cofarm Co., Ltd
2. ລາງວັນຈາກ TechSauce: ບໍລິສັດທີ່ໄດ້ຮັບແມ່ນ Systory Co.,Ltd ເເລະ Cofarm Co., Ltd
3. ລາງວັນຈາກ Lighthouse Partners (Venture Fund Law): ບໍລິສັດທີ່ໄດ້ຮັບແມ່ນ Cofarm Co., Ltd
ສະຖາບັນພັດທະນາຊັໍບພະຍາກອນມະນຸດ ລາວ-ຍີ່ປຸ່ນ (ສລຍ) ມີຄວາມຍິນດີເປັນຢ່າງຍິ່ງ ທີ່ຈະສືບຕໍ່ຮ່ວມງານຢ່າງໃກ້ຊິດ ກັບບັນດາຫົວໜ່ວຍທຸລະກິດລາວ ທີ່ເຂົ້າຮ່ວມໂຄງການ LJI SUSU ເພື່ອຊ່ວຍສົ່ງເສີມການພັດທະນາທຸລະກິດຂອງເຂົາເຈົ້າໃຫ້ເຕີບໃຫຍ່ ແລະ ສ້າງຄຸນຄ່າໃຫ້ກັບສັງຄົມລາວໃຫ້ຫຼາຍຂຶ້ນ.
ນອກຈາກນັ້ນ ການຈັດງານຍັງໄດ້ຮັບການສະໜັບສະນູນຈາກ Asean-Japan Center, Technology Promotion and Transfer Center, ມະຫາວິທະຍາໄລແຫ່ງຊາດ, ທະນາຄານມາຣູຮານ ເຈແປນລາວ ແລະ ບໍລິສັດ TechSauce ສະໜັບສະໜູນງານດັ່ງກ່າວ.
