ການແຂ່ງຂັນກີລາດອກປີກໄກ່ລາຍກາຍໃຫຍ່ທີ່ສຸດໃນສປປ ລາວ ກັບລາຍການ 23rd Beerlaos badminton Championship 2024 ໂດຍມີການຊີງໄຊເຖິງ 17 ລາຍການ ລະຫວ່າງວັນທີ 22-25 ສິງຫາ 2024 ທີ່ສະໜາມດອກປີກໄກ່ໃນຮົ່ມ ເສດຖາ ( ເຂດບຶງຂະຫຍອງ ) ນະຄອນຫຼວງວຽງຈັນ ສປປ ລາວ ພິເສດຍັງມີການມອບການສະໜັບສະໜູນຈາກ ບໍລິສັດ ເບຍລາວ ຈໍາຫັດ ເປັນຜະລິດຕະພັນ ແລະ ເງິນຈໍານວນ 388.000.000 ກີບ.
ພິທີຖະແຫຼງຂ່າວ ແລະ ມອບເງິນສະໜັບຈັດຂຶ້ນເມື່ອ ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກີລາ, ທ່ານ ສົມພູ ພົງສາ ຮອງປະທານຄະນະກໍາມະການໂອແລມປິກແຫ່ງຊາດລາວ; ໃຫ້ກຽດມອບການອຸປະຖໍ້າເປັນ ຜະລິດຕະພັນ ແລະ ເງິນຈໍານວນ 388.000.000 ກີບ ໂດຍ ທ່ານ ອາລຸນແສງ ພົງມະນີ ຜູ້ຈັດການອຸປະຖຳ ແລະ ກິດຈະກຳ ບໍລິສັດ ເບຍລາວ ຈໍາກັດ ແລະ ກ່າວຮັບໂດຍ ທ່ານ ວຽງສະຫວັນ ແສງຈັນ ຮອງປະທານສະຫະພັນກິລາດອກປີກໄກ່ແຫ່ງຊາດລາວ, ໂດຍມີຄະນະ, ຄູຝຶກ ແລະ ນັກກີລາຈາກຫຼາຍໆພາກສວ່ນເຂົ້າຮ່ວມຢ່າງພ້ອມພຽງ.
ທ່ານ ປອ. ໄຊບັນດິດ ຣາຊະພົນ ເລຂາທິການສະຫະພັນດອກປີກໄກ່ແຫ່ງຊາດລາວ ກ່າວ: ການຈັດແຂງຂັນກີລາດອກປີກໄກ່ທົ່ວປະເທດ ຄັ້ງທີ 23 ລາຍການ 23rd Beerlaos badminton Championship 2024 ເປັນການແຂ່ງຂັນກີລາດອກປີກໄກ່ທີ່ໃຫຍ່ທີ່ສຸດປະຈໍາປີຂອງລາວ ເຊິ່ງຄັ້ງນີ້ຈັດຂຶ້ນມາເປັນຄັ້ງທີ 23 ໂດຍໄດ້ຮັບການສືບຕໍ່ສະໜັບສະໜູນຈາກ ບໍລິສັດ ເບຍລາວ ຈໍາກັດ ຕັ້ງແຕ່ຄັ້ງທີ 1 ຕະຫຼອດຮອດຈົນເຖິງປັດຈຸບັນ ເຊິ່ງຈັດຂຶ້ນເພື່ອສ້າງຂະບວນການແຂ່ງຂັນດອກປີກໄກ່ພາຍໃນປະເທດໃຫ້ມີຄວາມຟົດຟື້ນ, ໃຫ້ນັກກີລາໄດ້ມີໂອກາດໃນການທົດສອບສີມືຂອງຕົວເອງ ແລະ ສາມາດເລືອກໄດ້ນັກກີລາດີເດັ່ນປະກອບເຂົ້າໃນການເປັນນັກກີລາທີມໃນຮຸ່ນເຍົາວະຊົນ ແລະ ຮຸ່ນທົວໄປ ພ້ອມທັງເປັນການກະກຽມຄວາມພ້ອມຂອງນັກກີລາເຂົ້າຮ່ວມງານມະຫາກໍາກີລາໃນຮົ່ມ ແລະ ຕໍ່ສູ້ປ້ອງກັນຕົວ ຄັ້ງທີ 5 ທີ່ປະເທດໄທ ໃນເດືອນພະຈິກ 2024 ແລະ ງານມະຫາກໍາກີລານັກຮຽນມັດທະຍົມສຶກສາທົ່ວປະເທດ ຄັ້ງທີ 8 ທີ່ແຂວງສາລະວັນໃນເດືອນທັນວາ 2024.
ສໍາລັບ ການແຂ່ງຂັນໃນຄັ້ງນີ້ມີ 17 ລາຍການປະກອບມີ:
+ຮຸ່ນເຍົາວະຊົນ 10 ລາຍການຄື: ດ່ຽວເຍົາວະຊົນຊາຍ 13 ປີ, ດ່ຽວເຍົາວະຊົນຍິງ 13 ປີ, ດຽ່ວເຍົາວະຊົນຊາຍ 15 ປີ, ດ່ຽວເຍົາວະຊົນຍິງ 15 ປີ, ຄູ່ເຍົາວະຊົນຊາຍ 15 ປີ, ດ່ຽວເຍົາວະຊົນຊາຍ 17 ປີ, ດ່ຽວເຍົາວະຊົນຍິງ 17 ປີ ແລະ ຄູ່ປະສົມ 17 ປີ.
-ຮຸ່ນຊາວໜຸ່ມ-ທົ່ວໄປ 7 ລາຍການຄື: ດ່ຽວຊາຍທົ່ວໄປ, ດ່ຽວຍິງທົ່ວໄປ, ຄູ່ຊາຍທົ່ວໄປ, ຄູ່ປະສົມທົ່ວໄປ, ຄູ່ສະໝັກຫຼິ້ນຊາຍ ( ສາຍ ຂ ) ແລະ ຄູ່ຊາຍອາຍຸລວມ 70 ປີຂຶ້ນໄປ ( ນັກກີລາແຕ່ລະຄົນຕ້ອງມີອາຍຸ 35 ປີຂຶ້ນໄປ ).
ເຊິ່ງໄດ້ເລີ່ມເປີດຮັບສະໝັກຕັ້ງແຕ່ວັນທີ 6 ສິງຫາ 2024 ຈົນເຖິງວັນທີ 17 ສິງຫາ 2024 ເຊິ່ງປັດຈຸບັນມີ 62 ຄົນຈາກ 10 ພາກສ່ວນ ( ທີມ, ສະໂມສອນ ແລະ ແຂວງ ) ມາສະໝັກແລ້ວ ແລະ ຄາດວ່າໃນໄລຍະ 4 ມື້ຈະມີນັກກີລາເພີມຂຶ້ນອີກຈໍານວນຫຼາຍ ພິເສດສຸດໆສະເພາະຮຸ່ນເຍົາວະຊົນລາຍການ ດ່ຽວຍິງ ແລະ ຄູ່ຍິງແມ່ນສະໝັກເຂົ້າຮ່ວມແຂ່ງຂັນຟຣີບໍ່ເສຍຄ່າສະໝັກ, ສ່ວນລາຍການອື່ນມີຄ່າສະໝັກ 200.000 ກີບສໍາລັບປະເພດດ່ຽວ ແລະ 300.000 ສໍາລັບປະເພດຄູ່ ເຊິ່ງຈະມີພິທີຈັບສະຫຼາກແບ່ງສາຍໃນວັນຈັນທີ 18 ສິງຫາ 2024.
