ໃນຕອນບ່າຍຂອງວັນທີ 13 ສິງຫາ 2024 ທີ່ຜ່ານມາຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ແລະ ກົມສົ່ງເສີມການລົງທຶນ (ຫຂສພ) ໄດ້ຈັດກິດຈະການຮ່ວມກັນ ເພື່ອຕ້ອນຮັບກອງປະຊຸມໃຫຍ່ຂອງໜ່ວຍພັກຂອງຕົນ ກໍ່ຄືການສ້າງຂະບວນການປິ່ນອ້ອມໃຫ້ແກ່ການກະກຽມກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງແຜນການ ແລະ ການລົງທຶນ ທີ່ຈະຈັດຂຶ້ນໃນອານາຄົດອັນໃກ້ນີ້.
ຊຶ່ງຂະບວນການດັ່ງກ່າວນໍາພາໂດຍສະຫາຍ ສອນປະເສີດ ດາລາວົງ ຄະນະບໍລິຫານງານພັກກະຊວງແຜນການ ແລະ ການລົງທຶນ, ເລຂາໜ່ວຍພັກ, ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ແລະ ທ່ານ ວັດທະນາ ນໍລິນທາ ເລຂາໜ່ວຍພັກ, ຫົວໜ້າກົມສົ່ງເສີມການລົງທຶນ ໂດຍມີຄະນະນໍາ, ຕົວແທນສາມອົງການຈັດຕັ້ງມະຫາຊົນ ພ້ອມດ້ວຍພະນັກງານຫຼັກແຫຼ່ງຈາກສອງພາກສ່ວນເຂົ້າຮ່ວມ.
ສໍາລັບການຈັດຂະບວນການຄັ້ງນີ້ແມ່ນ ຄະນະຜູ້ແທນໄດ້ເດີນທາງໄປແລກປ່ຽນບົດຮຽນກ່ຽວກັບວຽກງານການພັດທະ ນາເຂດເສດຖະກິດພິເສດຢູ່ ເຂດພັດທະນາ ກວມລວມໄຊເຊດຖາ ທີ່ຕັ້ງຢູ່ບ້ານນາໂນ, ເມືອງໄຊເສດຖາ, ນະຄອນຫຼວງວຽງຈັນ ຊຶ່ງເປັນໜຶ່ງໃນເຂດເສດຖະກິດພິເສດຂອງ ສປປ ລາວ ທີ່ມີຄວາມຄືບໜ້າໃນການພັດທະນາ ແລະ ເປັນຖານຮອງຮັບໃຫ້ແກ່ການດຶງດູດການຜະລິດຈາກພາຍໃນ ແລະ ຕ່າງປະເທດເຂົ້າມາລົງທຶນ ເຂົ້າມາ ສປປ ລາວ ໂດຍສະເພາະແມ່ນນະຄອນຫຼວງວຽງຈັນ.
ຊຶ່ງມາຮອດປະຈຸບັນເຂດພັດທະນາກວມ ລວມໄຊເຊດຖາ ມີຫົວໜ່ວຍວິສາຫະກິດທີ່ຈົດທະບຽນເຂົ້າມາລົງທຶນໃນເຂດລວມທັງໝົດ 149 ບໍລິສັດ, ໃນນີ້ມີ 73 ບໍລິສັດໄດ້ເລີ່ມທໍາການຜະລິດແລ້ວ ແລະ ອີກ 76 ບໍລິສັດ ແມ່ນຢູ່ໃນຂັ້ນຕອນການກະກຽມເພື່ອດໍາເນີນການກໍ່ສ້າງໂຮງງານ, ມີມູນຄ່າການລົງທຶນທັງໝົດປະມານ 1,3 ຕື້ໂດລາສະຫະລັດ, ເຊິ່ງເປັນນັກລົງທຶນທີ່ມາຈາກ 9 ປະເທດຄື: ສປ ຈີນ, ໄທ, ຢີ່ປຸ່ນ, ມາເລເຊຍ, ສິງກະໂປ, ສປປ ລາວ, ສະຫະລັດອາເມລິກາ, ສະວິດເຊີແລນ ແລະ ສ.ເກົາຫຼີ ລວມມີບໍລິສັດທີ່ສໍາຄັນຄື: ສໍານັກງານໃຫຍ່ຂອງ ບໍລິສັດທາງລົດໄຟລາວ-ຈີນ, ກຸ່ມບໍລິສັດຄວາມຫວັງໃໝ່ ເປັນໂຮງງານຜະລິດຫົວອາຫານທີ່ມີຂະໜາດໃຫຍ່, ກຸ່ມບໍລິສັດໂຮຢາ ເປັນບໍລິສັດທີ່ໃຫຍ່ ແລະ ມີຊື່ສຽງ ຂອງ ປະເທດຢີ່ປຸ່ນ, ບໍລິສັດ ເປ້ເຕີເຄື່ອງນຸ່ງຫົ່ມ (ລາວ) ຈໍາກັດ ເຊິ່ງເປັນໂຮງ ງານຜະລິດເຄື່ອງນຸ່ງຫົ່ມ, ບໍລິສັດ ຈົ່ງຫຼຸ້ນ ໂຊລ້າເຊວ ເປັນບໍລິສັດຜະລິດແຜງໂຊລ້າເຊວ ແລະ ບໍລິສັດອື່ນໆ ອີກຫຼາຍບໍລິ ສັດ, ກວມເອົາ 9 ຂະແໜງການ ຄື: ການຜະລິດເຄື່ອງເອເລັກໂຕຼນິກ, ອຸປະກອນໄຟຟ້າ, ຢາປົວພະຍາດ, ພະລັງງານສະອາດ, ການປຸງແຕ່ງຜະລິດຕະພັນກະສິກໍາ, ຜະລິດຕະພັນເພື່ອສຸຂະພາບ, ເຄື່ອງນຸ່ງຫົ່ມ, ເຄື່ອງໂລຫະ, ການຂົນສົ່ງ ແລະ ສາງສິນຄ້າເປັນຕົ້ນ.
ພາຍຫຼັງທີ່ບັນດາບໍລິສັດທັງໝົດກ່າວມາໃນຂ້າງເທິງນີ້ໄດ້ລົງມືທໍາການຜະລິດຈະສາມາດສ້າງມູນຄ່າຜະລິດທັງໝົດ 1,8 ຕື້ໂດລາສະຫະລັດຕໍ່ປີ, ສາມາດສ້າງວຽກເຮັດງານທໍາໄດ້ຫຼາຍກວ່າ 15.000 ຕໍາແໜ່ງງານ, ປະຈຸບັນມີແຮງງານທັງໝົດ 7.867 ຄົນ (ໃນນັ້ນມີແຮງງານລາວ 5.566 ຄົນ). ນອກຈາກນີ້ເຂດພັດທະນາກວມລວມໄຊເຊດຖາ ຍັງເປັນເຂດໜຶ່ງທີ່ຖືກກຳນົດເປັນເຂດຕົວແບບເພື່ອສ້າງເປັນ ເຂດສາທິດການປ່ອຍອາຍກາກບອນຕໍ່າ.
