ໂຄງການໄຟຟ້າພະລັງງານລົມ ມອນຊູນວິນ ຕັ້ງຢູ່ເມືອງດາກຈຶງ ແຂວງເຊກອງ ແລະ ເມືອງຊານໄຊ ແຂວງອັດຕະປື ການກໍ່ສ້າງຄືບໜ້າຫຼາຍກວ່າ 81,71%; ສ່ວນການຊົດເຊີຍຜົນກະທົບແບ່ງອອກເປັນ 3 ໄລຍະ ລວມມູນຄ່າ 25 ຕື້ກວ່າກີບ.
ກອງປະຊຸມທົບທວນຄືນການຈັດຕັ້ງປະຕິບັດວຽກງານທົດແທນຄ່າເສຍຫາຍ ແລະ ຟື້ນຟູຊີວິດການເປັນຢູ່ໃຫ້ປະຊາຊົນ ທີ່ຖືກຜົນກະທົບຈາກການກໍ່ສ້າງໄຟຟ້າພະລັງງານລົມມອນຊຸນວິນ ຈັດຂຶ້ນໃນວັນທີ 13 ສິງຫາ ໂດຍການເຂົ້າຮ່ວມຂອງທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ; ມີຄະນະຊີ້ນໍາໂຄງການ, ຄະນະກໍາມະການທົດແທນຄ່າເສຍຫາຍ ແລະ ຟື້ນຟູຊີວິດການເປັນຢູ່ຂອງປະຊາຊົນ, ບໍລິສັດຜູ້ພັດທະນາ, ບໍລິສັດຜູ້ຮັບເໝົາກໍ່ສ້າງໂຄງການ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ລໍາພັນ ແກ້ວມະຫາໄຊ ຮອງຫົວໜ້າພະແນກພະລັງງານ ແລະ ບໍ່ແຮ່ແຂວງ, ກອງເລຂາຄະນະກໍາມະການທົດແທນຄ່າເສຍຫາຍ ແລະ ຟື້ນຟູຊີວິດການເປັນຢູ່ຂອງປະຊາຊົນ ໄດ້ໃຫ້ຮູ້ວ່າ: ໂຄງ ການໄຟຟ້າພະລັງງານລົມ ມອນຊູນ ຕັ້ງຢູ່ເມືອງດາກຈຶງ ແຂວງເຊກອງ ແລະ ເມືອງຊານໄຊ ແຂວງອັດຕະປື ມີ 133 ເສົາ ມີກໍາລັງຕິດຕັ້ງທັງໝົດ 600 ເມກາວັດ; ໃນນີ້ ຕັ້ງຢູ່ເມືອງດາກຈຶງ 110 ເສົາ ແລະ ຕັ້ງຢູ່ເມືອງຊານໄຊແຂວງອັດຕະປື 23 ເສົາ, ປັດຈຸບັນການກໍ່ສ້າງສໍາເລັດແລ້ວ 81,71%.
ໂຄງການດັ່ງກ່າວ ມີຜົນກະທົບທັງໝົດ 26 ບ້ານ 807 ຄົວເຮືອນ; ໃນນີ້ ເມືອງດາກຈຶງ 21 ບ້ານ ແລະ ເມືອງຊານໄຊ 5 ບ້ານ ຊຶ່ງການປະຕິບັດວຽກງານທົດແທນຄ່າເສຍຫາຍ ຫຼື ການຊົດເຊີຍຜົນກະທົບ ແມ່ນໄດ້ປະຕິບັດຕາມລະບຽບການຕ່າງໆຂອງພັກ-ລັດຖະບານ ແລະ ໄດ້ແບ່ງອອກເປັນ 3 ໄລຍະ.
ໄລຍະທີ I ທົດແທນຜົນກະທົບຈຸດຕັ້ງເສົາກັງຫັນລົມ ແລະ ທາງເຂົ້າຫາເສົາກັງຫັນລົມ, ທາງເຊື່ອມຕໍ່ລະຫວ່າງເສົາ, ມີບ້ານໄດ້ຮັບຜົນກະທົບ 11 ບ້ານ 209 ຄົວເຮືອນ ລວມມູນຄ່າຊົດເຊີຍ 7,59 ຕື້ກວ່າກີບ.
ໄລຍະທີ II ທົດແທນຜົນກະທົບຊັບສິນ ເຂດພື້ນທີ່ຕັ້ງເສົາໄຟຟ້າແຮງສູງ 35ກິໂລໂວນ, 115ກິໂລໂວນ ແລະ 500ກິໂລໂວນ, ເສັ້ນທາງເຂົ້າຫາສາຍສົ່ງ, ບ່ອນວາງອຸປະກອນກໍ່ສ້າງ, ການຂະຫຍາຍເສັ້ນທາງຫຼວງແຫ່ງຊາດເລກທີ 16B ມີບ້ານໄດ້ຮັບຜົນກະທົບ 19 ບ້ານ 438 ຄົວເຮືອນ ລວມມູນຄ່າການຊົດເຊີຍ 8,89 ຕື້ກວ່າກີບ.
ໄລຍະທີ III ທົດແທນຄ່າເສຍຫາຍຊັບສິນ ແລະ ທີ່ດິນຂອບເຂດແລວ ສະຫງວນສາຍສົ່ງໄຟຟ້າແຮງສູງ 115ກິໂລໂວນ ແລະ 500ກິໂລໂວນ ມີບ້ານໄດ້ຮັບຜົນກະທົບ 16 ບ້ານ 340 ຄົວເຮືອນ ລວມມູນຄ່າຊົດເຊີຍ 9,23 ຕື້ກີບ; ລວມທັງ 3 ໄລຍະ ປະຕິບັດການຊົດເຊີຍທັງໝົດ 25,86 ຕື້ກວ່າກີບ.
ທ່ານ ຊາຄິດ ດວງໃຈ ຜູ້ຈັດການດ້ານສັງຄົມ ໂຄງການມອນຊູນວິນພາວເວີ ໃຫ້ຮູ້ວ່າ: ໃນໄລຍະຜ່ານມາ, ໂຄງການໄດ້ເອົາໃຈໃສ່ປະຕິບັດວຽກງານທົດແທນຄ່າເສຍຫາຍ ຫຼື ການຊົດເຊີຍຜົນກະທົບ ຕິດພັນກັບການພັດທະນາຊຸມຊົນໃນ 6 ແຜນງານ ຄື: ແຜນງານການສຶກສາ ແລະ ການສ້າງຂີດຄວາມສາມາດ, ແຜນງານການດູແລສຸຂະພາບ ແລະ ສຸຂາພິບານ, ແຜນງານການພັດທະນາການດໍາລົງຊີວິດ ແລະ ເສດຖະກິດ, ແຜນງານການປັບປຸງພື້ນຖານໂຄງລ່າງ, ແຜນງານການພັດທະນາວັດທະນະທໍາ ແລະ ສັງຄົມ ແລະ ແຜນງານສ້າງຄວາມເຂັ້ມແຂງໃຫ້ຊຸມຊົນ.
ທ່ານ ເຫຼັກໄຫຼ ສີວິໄລ ໄດ້ມີຄໍາເຫັນແລກປ່ຽນ ແລະ ຊີ້ນໍາໃຫ້ສືບຕໍ່ພັດທະນາໂຄງການ ໃຫ້ໄປຕາມຄາດໝາຍແຜນການທີ່ວາງໄວ້, ຖືກຕ້ອງຕາມເຕັກນິກ ແລະ ຮັບປະກັນຄຸນນະພາບ; ເອົາໃຈໃສ່ຄຸ້ມຄອງການຂົນສົ່ງໃຫ້ມີຄວາມປອດໄພ; ປັບປຸງພື້ນຖານໂຄງລ່າງ, ປົກປັກຮັກສາສິ່ງແວດລ້ອມ, ຮັກສາປ່າໄມ້, ຟື້ນຟູປ່າໄມ້ ແລະ ຊີວະນາໆພັນ ຕາມທິດພັດທະນາສີຂຽວ ແລະ ຍືນຍົງ.
ກອງປະຊຸມ, ຍັງໄດ້ປຶກສາຫາລື ກ່ຽວກັບການແກ້ໄຂບັນຫາທີ່ໄດ້ຮັບຜົນກະທົບຜ່ານມາ, ການສະເໜີບາງບັນຫາທີ່ຍັງຄົງຄ້າງ ແລະ ການສືບຕໍ່ຈັດຕັ້ງປະຕິບັດ ທົດແທນຄ່າເສຍຫາຍ ໃຫ້ປະຊາຊົນ ລວມທັງແຜນໃນການແກ້ໄຂ ບັນຫາຄົງຄ້າງ ຂອງຜູ້ພັດທະນາໂຄງການຕື່ມອີກ.
ຂ່າວ:ສັນຍາ
