ນາງ ພອນພະຈັນ ສິງສະຫວ່າງ ແລະ ທ້າວ ຮ່າວຢາງ ພິມມາ ກາຍເປັນຜູ້ຊະນະເລີດການປະກວດ FACE of LAOS 2024 ໂດຍຮອບຊີງຊະນະເລີດຈັດຂຶ້ນໃນວັນທີ 11 ສິງຫາ 2024 ທີ່ Naga Mall ຊັ້ນ 4 (ເຂົ້າທາງ ປະຕູ B1 – B3 ທາງ Park Mall ຊັ້ນ 4) ເຮັດໃຫ້ທັງສອງກາຍເປັນຕົວແທນຈາກ ສປປ ລາວ ເຂົ້າຮ່ວມງານ FACE of ASIA 2024 ທີ່ ສເກົາຫຼີ.
ສໍາລັບ ເວທີດັ່ງກ່າວເປັນການປະກາດນາງແບບ-ນາຍແບບ ຫຼັງຈາກທີ່ໄດ້ເລີຍເກັບຕົວ ແລະ ປະກວດມາແຕ່ເດືອນທີ່ແລ້ວຈົນຫຼ້າສຸດທ້າຍອາທິດທີ່ຜ່ານມາ ໄດ້ມີພິທີປະກວດຜູ້ຊະນະເລີດ ໂດຍຝ່າຍຍິງຕົກເປັນຂອງ FOL19 ປິບ – ພອນພະຈັນ ສິງສະຫວ່າງ ແລະ ຝ່າຍຊາຍຕົກເປັນຂອງ FOL20 ຮ່າວຢາງ ພິມມາ ແນ່ນອນທັງສອງມາກັບຄວາມສາມາດຫຼາກຫຼາຍ ໄດ້ພິສູດໃຫ້ເຫັນຜ່ານແຄັມເປນສຸດໂຫດທ້າທາຍໃນແຕ່ລະອີພີທີ່ໄດ້ໂຈດທີ່ແຕກຕ່າງກັນໄປ ລວມເຖິງການສະແດງທ່າທາງ ອິນເນີ້ ພ້ອມເປັນໄມ້ແຂວນເສື້ອທີ່ພຣີເຊັນໄດ້ເດັ່ນທີ່ສຸດ ແລະ ການເດີນທີ່ເຮັດໄດ້ດີທຸກຮອບ ພ້ອມຮັບຟັງແລະ ພັດທະນະທຸກທັກສະ ຈົນຮອດຜົນງານໃນມື້ Final ທີ່ຕ້ອງວ້າວ ຍ່າງຟຽສອິນເນີ້ຈັດເຕັມສົມຕໍາແໜ່ງທີ່ສຸດ. ສຳລັບທັງ 2 ຄົນຈະໄດ້ເປັນຕົວແທນຄົນລາວໄປແຂ່ງຂັນຕໍ່ກັບນາຍແບບ-ນາງແບບກັບອີກຫຼາຍປະເທດໃນເວທີສາກົນທີ່ເກົາຫຼີ.
ນາງ ພອນພະຈັນ ສິງສະຫວ່າງ ເປີດໃຈວ່າ: ສໍາລັບນ້ອງເປັນຄົນທີ່ມັກຫຼິ້ນກີລາ, ເດີນແບບ ແລະ ຟັງເພງ ແນ່ນອນເລີຍມັກທີ່ສຸດຄືສາຍ ໂມເດລ ແລະ ມັກສີລະປິນເກົາຫຼີ ຈິ່ງຢາກເຫັນຕົວເອງເດີນແບບ, ໃສ່ຊຸດແບບຕ່າງໆ ເຊິ່ງປະສົບການກ່ອນໜ້ານີ້ເຄີຍເດີນແບບມາກ່ອນ ແລະ ໄດ້ຖ່າຍແບບໃຫ້ຫຍີ່ກະເປົ໋າແຫ່ງໜ້່ງ ມັນເປັນສິ່ງທີ່ໜ້າປະທັບໃຈຫຼາຍທີ່ສາມາດກ້າວມາເຖິງຈຸດນີ້.
ສ່ວນ ພິມມາ ຫຼື ຊື້ຫຼິ້ນແມ່ນ ຮ່າວ, ອາຍຸ 23 ປີ ຮຽນຈົບມາຈາກລອນດອນ ປະເທດອັງກິດ ແລະ ຈົບມັດທະຍົມຢູ່ທີ່ໂຮງຮຽນ VIS (Vientiane international school) ປະຈຸບັນເປັນນາຍແບບຢູ່ສັງກັດ A-list ມັກການຫຼິ້ນກີລາຕີບານ, ຕີດອກປີກໄກ່, ທ່ອງທ່ຽວ ແລະ ຟັງເພງ ກ່ອນຈະມາເປັນນາຍແບບມີຫຼາຍຄົນມາທາບທາມໃຫ້ເປັນຕັ້ງແຕ່ຕອນຮຽນຢູ່ອັງກິດແລ້ວ ແຕ່ຍັງບໍ່ທັນໄດ້ລອງຈິງຈັງ ຈົນໄດ້ມີໂອກາດມາຮ່ວມງານທໍາອິດນຳ Lao Fashion Week ເຊິ່ງເປັນຈຸດເລິ່ມຕົ້ນທີ່ໄດ້ຮັບງານຖ່າຍແບບມາເລື້ອຍໆ, ສ່ວນ ຜົນງານທີ່ຜ່ານມາກໍມີເດີນແບບໃຫ້ເສື້ອຜ້າຫຼາຍແບຣນໃນງານ Lao Fashion Week, ໄດ້ມີໂອກາດຖ່າຍໂຄສະນານຳ BeerLao,ໄດ້ເປັນແຂກຮັບເຊີນ ເປີດໂຕຄັ້ງແລກໃນລາຍການ Er…Mun DEE ໃນຊ່ອງ JAY LOLEY ຂອງລຸ້ນເອື້ອຍໃນຄ່າຍ A-list ແລະຍັງຈະມີຜົນງານຕາມມາອີກເລື້ອຍໆໃຫ້ຕິດຕາມ.
