ຂ່າວຊີອາໄອ ລາຍງານວ່າ: ຫ້ອງການຖະແຫຼງຂ່າວຂອງລັດຖະບານຈີນ ໄດ້ຈັດກອງປະຊຸມຖະແຫຼງຂ່າວພາຍໃຕ້ຫົວຂໍ້ “ຊຸກຍູ້ການພັດທະນາທີ່ມີຄຸນນະພາບສູງ” ໂດຍຜູ້ຮັບຜິດຊອບທີ່ກ່ຽວຂ້ອງຂອງກະຊວງການຄ້າຈີນ ໄດ້ຖະແຫຼງວ່າ: ນັບແຕ່ຕົ້ນປີນີ້ເປັນຕົ້ນມາ, ການອຸປະ ໂພກ-ບໍລິໂພກຂອງຈີນ ໄດ້ຮັກສາການເຕີບໂຕຢ່າງໝັ້ນທ່ຽງ, ຄຸນນະພາບ ແລະ ປະລິມານຂອງການຄ້າຕ່າງປະເທດຂອງຈີນ ກໍໄດ້ຍົກສູງຂຶ້ນຢ່າງໝັ້ນທ່ຽງເຊັ່ນກັນ. ຕາມການລາຍງານໄດ້ແຈ້ງໃຫ້ຮູ້ວ່າ: ມູນຄ່າການຂາຍຍ່ອຍຂອງເຄື່ອງອຸປະໂພກ-ບໍລິໂພກ ໃນ 6 ເດືອນຕົ້ນປີນີ້ ບັນລຸເຖິງ 23.600 ຕື້ຢວນ ເພີ່ມຂຶ້ນ 3,7%.
ຄຸນນະພາບ ແລະ ປະລິມານຂອງການຄ້າຕ່າງປະເທດຂອງຈີນ ກໍໄດ້ຍົກສູງຂຶ້ນຢ່າງໝັ້ນທ່ຽງ. ໃນ 6 ເດືອນຕົ້ນປີນີ້, ການນຳເຂົ້າ-ສົ່ງອອກສິນຄ້າປະເພດຈັບຕ້ອງໄດ້ຂອງຈີນ ບັນລຸເຖິງ 21.200 ຕື້ຢວນ ເພີ່ມຂຶ້ນ 6,1%. ການນຳເຂົ້າ-ສົ່ງອອກການບໍລິການເພີ່ມຂຶ້ນ 14%. ອັດຕາການປະກອບສ່ວນຂອງການນຳເຂົ້າ-ສົ່ງອອກສິນຄ້າປະເພດຈັບຕ້ອງໄດ້ ແລະ ການບໍລິການທີ່ມີຕໍ່ການເຕີບໂຕຂອງເສດຖະກິດມີເຖິງ 13,9%.
ນອກນີ້, ຈຳນວນວິສາຫະກິດຕ່າງປະເທດທີ່ສ້າງຕັ້ງຂຶ້ນໃໝ່ຢູ່ຈີນໃນ 6 ເດືອນຕົ້ນປີນີ້ ມີເຖິງ 27.000 ແຫ່ງ, ອັດຕາຂອງການນຳໃຊ້ທຶນຕ່າງປະເທດຂອງອຸດສາຫະກຳການຜະລິດເຕັກໂນໂລຊີລະດັບສູງໄດ້ເພີ່ມຂຶ້ນ 2,4% ເມື່ອທຽບໃສ່ໄລຍະດຽວກັນຂອງປີກາຍ, ໂຄງປະກອບຂອງການນຳໃຊ້ທຶນຕ່າງປະເທດໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ. ການຮ່ວມມືກັບຕ່າງປະເທດດ້ານການລົງທຶນໄດ້ເພີ່ມຂຶ້ນຢ່າງວ່ອງໄວ.
