ຂ່າວຕ່າງປະເທດລາຍງານວ່າ: ໃນວັນທີ 5 ສິງຫາ ທ່ານ ຮຸນມາເນັດ ນາຍົກລັດຖະມົນຕີກຳປູເຈຍ ໄດ້ເຂົ້າຮ່ວມພິທີວາງສີລາລືກໂຄງການລະບົບຂົນສົ່ງທາງນໍ້າ ແລະ ໂລຈິສ ຕິກໂຕນເລ ບາສັກ ຂຸດຄອງຟູນັນ ເຕໂຊ ທີ່ຈະກາຍເປັນເສັ້ນທາງຄົມມະນາຄົມຂົນສົ່ງທາງນໍ້າ ເຊື່ອມຕໍ່ແມ່ນໍ້າບາສັກ ແມ່ນໍ້າສາຂາຂອງແມ່ນໍ້າຂອງ ທີ່ຢູ່ໃກ້ນະຄອນຫຼວງພະນົມເປນ ເຂົ້າກັບອ່າວໄທ.
ພິທີວາງສີລາລືກ ຈັດຂຶ້ນກົງກັບວັນເກີດຂອງ ທ່ານ ຮຸນແຊນ ອະດີດນາຍົກລັດຖະມົນຕີກຳປູເຈຍ ເຊິ່ງເປັນຜູ້ລິເລີ່ມໂຄງການນີ້ ໂດຍຄອງແຫ່ງນີ້ຈະມີຄວາມກວ້າງ 100 ແມັດ ເລິກ 5,4 ແມັດ ແລະ ມີຄວາມຍາວ 180 ກິໂລແມັດ ເຊື່ອມຕໍ່ການຂົນສົ່ງສິນຄ້າຈາກແມ່ນໍ້າບາສັກ ໃກ້ກັບນະຄອນຫຼວງພະນົມເປນ ມາຍັງແຂວງແກບ ແຄມຝັ່ງທາງໃຕ້ຂອງປະເທດ ເຊິ່ງຈະເຮັດໃຫ້ສາມາດເຊື່ອມຕໍ່ເຂົ້າເຖິງອ່າວໄທໄດ້ ແລະ ເປັນທາງເລືອກນອກເໜືອຈາກທ່າເຮືອນໍ້າເລິກແຫ່ງດຽວຂອງປະເທດເຊັ່ນ: ສີໜຸວິລ. ນອກຈາກນີ້ຍັງຈະຊ່ວຍຫຼຸດການອາໄສໃຊ້ທ່າເຮືອບໍລິເວນປາກແມ່ນໍ້າຂອງ ຂອງຫວຽດນາມ.
ໂຄງການກໍ່ສ້າງຄອງນີ້ ມີມູນຄ່າ 1,7 ຕື້ໂດລາ ຄາດວ່າຈະສຳເລັດໃນຕົ້ນປີ 2028 ແລະ ເມື່ອຂຸດສຳເລັດ ຈະຊ່ວຍຫຼຸດຕົ້ນທຶນການຄົມມະນາຄົມຂົນສົ່ງສິນຄ້າເຂົ້າສູ່ກຳປູເຈຍ.
ທ່ານ ຮຸນມາເນັດ ລະບຸວ່າ: ທີ່ຜ່ານມາ ກຳປູເຈຍ ເຄີຍດຳເນີນໂຄງການໂຄງສ້າງພື້ນຖານທີ່ໃຫຍ່ກວ່ານີ້ ແລະ ມີມູນຄ່າຫຼາຍກວ່ານີ້ມາແລ້ວ ແຕ່ຄອງຟູນັນ ເຕໂຊ ແຫ່ງນີ້ ຈະຖືເປັນປະຫວັດສາດທີ່ແຕກຕ່າງອອກໄປ ແລະ ຍັງເປັນໂຄງການທີ່ເຮັດເພື່ອປະຊາຊົນ ແລະ ຮັບການສະໜັບສະໜູນຈາກປະຊາຊົນທົ່ວປະເທດ.
