ແກບແມ່ນມີຢ່າງຫຼວງຫຼາຍຢູ່ຕາມໂຮງສີເຂົ້າ ຫຼັງຈາກການສີເຂົ້າແລ້ວ. ໃນໄລຍະຜ່ານມາ ຊາວນາມັກນຳແກບ ໄປຈູດ ຫຼື ຂົນໄປຖິ້ມ ໂດຍບໍ່ຮູ້ວ່າແກບຍັງມີປະໂຫຍດຫຼາຍ ຖ້າຮູ້ຈັກປະຍຸກ ໃຫ້ເກີດປະໂຫຍດ ເປັນຕົ້ນແມ່ນ ການນຳແກບມາເຮັດຝຸ່ນບົ່ມ ເພື່ອ ປັບປຸງ ບຳລຸງດິນ, ຫລຸດຜ່ອນຕົ້ນທຶນໃນການຊື້ຝຸ່ນເຄມີ ແລະ ອີກຫລາກຫຼາຍ
ຝຸ່ນບົ່ມແກບ ແມ່ນຝຸ່ນທຳມະຊາດຊະນິດໜື່ງ ເຊິ່ງໄດ້ມາຈາກແກບທີ່ຖືກໝັກ ຫຼື ບົ່ມໃຫ້ຍ່ອຍສະລາຍກາຍມາເປັນຝຸ່ນ ເຊິ່ງມີຄຸນສົມບັດເຊັ່ນດຽວກັນກັບອິນຊີວັດຖຸໃນດິນທຸກຢ່າງ ເມື່ອໃສ່ລົງໄປໃນດິນກໍ່ຈະຊ່ວຍບຳລຸງ ແລະ ຮັກສາລະດັບອິນຊີວັດຖຸໃນດິນໄວ້ ເພີ່ມການທຳງານຂອງຈຸລິນຊີດິນ.
ວັດຖຸທີ່ໃຊ້ໃນການເຮັດຝຸ່ນບົມມີດັ່ງນີ້:
– ແກບດິບ ປະມານ 100 ໂລ
– ຝຸ່ນຄອກແຫ້ງ (ຂີ້ງົວ, ຂີ້ຄວາຍ, ຂີ້ໝູ) 50-100 ກິໂລ
– ຝຸ່ນເຄມີຢູເຣຍ (46-0-0) 0.5 ກິໂລ
– ປູນຂາວ 0,2 ກິໂລ
– ນໍ້າສະກັດຊີວະພາບ ຫຼື ກາກນໍ້າຕານ 0,2 ລິດ
▶ຂັ້ນຕອນໃນການເຮັດຝຸ່ນບົ່ມ:
– ນໍາເອົາແກບດິບມາຕາມປະລິມານທີ່ຕ້ອງການ ຫຼັງຈາກນັ້ນຫົດນໍ້າໃຫ້ປຽກ, ໂຮຍຝຸ່ນຄອກ, ປູນຂາວ, ຝຸ່ນເຄມີ ໃນອັດຕາ ¼ ຂອງນໍ້າໝັກທີ່ກຽມໄວ້ໃສ່ໃຫ້ທົ່ວ
– ອີເອັມ (EM) ໃສ່ຕາມອັດຕາສ່ວນທີ່ແນະນຳ ໂດຍປະສົມກັບນໍ້າ 10 ລິດ ແລະ ຝຸ່ນ 46-0-0 ປະໄວ້ 20 ນາທີ ແລ້ວຫົດໃຫ້ທົ່ວ ແລະ ຫົດໃຫ້ປຽກ.
– ພາຍຫຼັງເຮັດສຳເລັດແລ້ວໃຫ້ເອົາຜ້າຢາງປົກຄຸມໄວ້ເອົາກ້ອນຫີນເຕັງເທິງຜ້າຢາງ
▶ການບົວລະບັດຮັກສາ:
– ຕ້ອງເອົາໃຈໃສ່ຕິດຕາມກອງຝຸ່ນບົ່ມຢູ່ເລື່ອຍໆ, ຫົດນໍ້າໃຫ້ປຽກຊຸ່ມຢູ່ສະເໝີ, ແຕ່ບໍ່ໃຫ້ຫົດຫຼາຍຈົນນໍ້າແຊຂັງ ແລະ ບໍ່ຄວນເປີດກອງຝຸ່ນເລື້ອຍໆ
– ຫຼັງຈາກບົ່ມໄດ້ 2-3 ອາທິດ ຕ້ອງປີ້ນກອງຝຸ່ນ ເພື່ອໃຫ້ອາກາດຖ່າຍເທ ແລະ ເຮັດໃຫ້ແກບຂ້າງນອກທີ່ຍັງບໍ່ທັນເປື່ອຍ ປີ້ນກັບເຂົ້າໄປທາງໃນກອງຝຸ່ນບົ່ມ
– ຍາມຮ້ອນໃຊ້ເວລາໃນການບົ່ມ 60 ວັນ ກໍ່ສາມາດເອົາໄປນໍາໃຊ້ໄດ້
– ຍາມໜາວໃຊ້ເວລາບົ່ມຢ່າງໜ້ອຍ 90 ວັນ
▶ຂໍ້ສັງເກດຂອງຝຸ່ນບົ່ມທີ່ເປັນແລ້ວ
– ອຸ່ນຫະພູມພາຍໃນ ແລະ ພາຍນອກຂອງກອງຝຸ່ນບົ່ມໃກ້ຄຽງກັນ ໝາຍຄວາມວ່າ ຝຸ່ນສາມາດນໍາເອົາໄປໃຊ້ໄດ້ແລ້ວ, ບໍ່ຄວນປະໄວ້ດົນເກີນໄປເພາະຈະເຮັດໃຫ້ທາດອາຫານພືດຫຼຸດລົງໄດ້ຄວນເກັບໄວ້ໃນຮົ່ມ
– ສີຂອງຝຸ່ນບົ່ມຈະເປັນສີນໍ້າຕານເຂັ້ມເວລາຈັບ ຫຼື ບີບ ຈະເປື່ອຍຜຸຜຸ່ຍດີ, ບໍ່ມີກິ່ນເໝັນ;
▶ວິທີການໃສ່ຝຸ່ນບົ່ມ:
– ຫວ່ານຝຸ່ນບົ່ມທົ່ວແປງ ສໍາລັບປູກເຂົ້າ, ພືດຜັກໃນອັດຕາສ່ວນ 0,5 – 1 ກິໂລ/1 ແມັດ (ກ່ອນການກຽມດິນ) ແລ້ວ ໄຖກົບໄວ້ທັນທີ.
– ໃສ່ແບບເປັນແຖວຕາມແຖບທີ່ຈະປູກພືດ (ເໝາະແກ່ການປູກສາລີ ແລະ ຖົ່ວຕ່າງໆ)
– ໃສ່ແບບເປັນຂຸມສຳລັບໄມ້ກິນໝາກ ຂຸດຂຸມປູກ ຕອນກຽມດິນ ຄົນໃຫ້ ເຂົ້າກັບດິນແລ້ວປູກໄມ້.
– ສຳລັບໄມ້ກິນໝາກທີ່ຈະເລີນເຕີບໂຕແລ້ວ ຂຸດຕາມຊົງຜຸ່ມແລ້ວອ້ອມຕາມຊົງຜຸ່ມ
[ຂໍ້ມູນ: ສູນພັດທະນາທີ່ດິນ ແລະ ຄຸ້ມຄອງການນຳໃຊ້ຝຸ່ນ.ກົມຄຸ້ມຄອງ ແລະ ພັດທະນາທີ່ດິນກະສິກຳ]
