ວິຖີທໍາມະຊາດ ແລະ ວັດທະນະທໍາ ເປັນສິ່ງທີ່ທຸກຄົນໂຫຍຫາຢູ່ແລ້ວ ບໍ່ວ່າຈະເປັນຄົນລາວເຮົາເອງ ລວມທັງນັກທ່ອງທ່ຽວຕ່າງປະເທດທີ່ເຂົ້າມາທ່ຽວຊົມໃນປະເທດເຮົາ ເຊິ່ງຈຸດນີ້ ທ່ານ ພູວົງ ພະມີສິດ ຫຼິງເຫັນໂອກາດ ຈຶ່ງໄດ້ລົງທຶນພັດທະນາມາ ໃສ່ຊື່ວ່າສວນພຶກສາ ເຊິ່ງສ້າງຄວາມປະທັບໃຈແກ່ຜູ້ເຂົ້າມາທ່ຽວຊົມ ຫຼ້າສຸດແມ່ນໃຫ້ບໍລິການຫໍວາງສະແດງມູນເຊື້ອ ບັນດາຊົນເຜົ່າໃນປະເທດເຮົາ.
ທ່ານ ພູວົງ ພະມີສິດ ປະທານສວນພຶກສາ ໄດ້ກ່າວວ່າ: ໃນໄລຍະເຄິ່ງປີຜ່ານມາ ສວນພຶກສາໄດ້ສໍາເລັດຫຼາຍໜ້າວຽກໃນການຍົກລະດັບຄວາມສາມາດໃນການໃຫ້ບໍລິການນັກທ່ອງທ່ຽວ ເຊິ່ງມີທັງແຂກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ຄວາມສົນໃຈເຂົ້າມາທ່ຽວຊົມໄດ້ຫຼາຍທີ່ສຸດ ໂດຍສະເພາະແມ່ນການເປີດໃຫ້ບໍລິການຫໍວາງສະແດງຊົນເຜົ່າຕ່າງໆໃນປະເທດລາວ ສ່ວນຫຼາຍປະຊາຊົນຈໍານວນໜຶ່ງຮູ້ ແລະ ມາທ່ຽວຊົມ ສ້າງຄວາມຕື່ນຕາຕື່ນໃຈໃຫ້ຜູ້ໄດ້ຮັບຊົມບໍ່ໜ້ອຍ ເນື່ອງຈາກວ່າເຂົາເຈົ້າບໍ່ເຄີຍເຫັນຈັກເທື່ອ ເຊິ່ງສວນພຶກສາເຮົາໄດ້ຈັດອອກມາວາງສະແດງ ເພື່ອສົ່ງເສີມວັດທະນະທໍາລາວ ສົ່ງເສີມການຮັກສາວັດທະນະທໍາອັນດີງາມ ທັງໃຫ້ເປັນບ່ອນທັດສະນະສຶກສາ ຂອງນັກຮຽນ – ນັກສຶກສາໃນປະເທດເຮົາ ພ້ອມທັງໃຫ້ນັກທ່ອງທ່ຽວຕ່າງປະເທດມາທ່ຽວປະເທດເຮົາໃຫ້ຫຼາຍທີ່ສຸດ ເພື່ອດຶງເມັດເງິນຕາເຂົ້າມາປະເທດ.
ທ່ານກ່າວວ່າ: ໃນໄລຍະໜ້າຈະມີການພັດທະນາອີກຫຼາຍຢ່າງ ເປັນຕົ້ນແມ່ນຮ້ານອາຫານທີ່ສວຍງາມ ພວກເຮົາຈະເພີ່ມທາງເລືອກຫຼາຍຢ່າງ, ພ້ອມນັ້ນກໍກໍາລັງກະກຽມຈັດກິດຈະກໍາເທສະການໂຄມໄຟ ເຊິ່ງຄາດວ່າຈະເປີດໃຫ້ບໍລິການໃນທ້າຍເດືອນຕຸລາທີ່ຈະມາເຖິງ ເພື່ອສະເຫຼີມສະຫຼອງບຸນປະເພນີອອກພັນສາ ປັດຈຸບັນຢູ່ໃນຂັ້ນຕອນການກະກຽມໜ້າວຽກສ່ວນຕ່າງໆ ເຊິ່ງເປັນໂຄມໄຟໃນສວນ ເຊິ່ງນັບຕັ້ງແຕ່ເຂົ້າປະຕູສວນ, ໂຊນຕ່າງໆຂອງສວນ, ໜອງນໍ້າ, ຕາມຕົ້ນໄມ້ ແມ່ນຈະໄດ້ປະດັບປະດາໃຫ້ເຕັມໄປດ້ວຍໂຄມໄຟທີ່ສວຍງາມ ຫຼັກໆແມ່ນຢູ່ເຂດເຮືອນຊົນເຜົ່າ ແລະ ຫໍມູນເຊື້ອ ເປັນກິດຈະກໍາໜຶ່ງກະຕຸ້ນການທ່ອງທ່ຽວ.
ໃນໂອກາດທີ່ ສປປ ລາວ ເປັນເຈົ້າພາບສຸດຍອດກອງປະຊຸມອາຊຽນ 2024 ທາງສວນພຶກສາ ຍິນດີຕ້ອນຮັບບັນດາແຂກ, ຄະນະນໍາຂອງລັດຖະບານ ຢາກໃຫ້ຖືໂອກາດນີ້ໂຄສະນາປີທ່ອງທ່ຽວລາວ ພວກເຮົາຜູ້ພັດທະນາ ແລະ ພະນັກງານສວນພຶກສາ ຍິນດີຕ້ອນຮັບ ໂດຍສະເພາະແຂກການນໍາຂອງບັນດາສະມາຊິກອາຊຽນ ພວກເຮົາພູມໃຈນໍາສະເໜີທໍາມະຊາດ, ວັດທະນະທໍາບັນດາຊົນເຜົ່າໃນລາວ, ວັດທະນະທໍາຂອງລາວເຮົາ ເຊິ່ງເປັນມໍລະດົກທີ່ຍັງສາມາດຂາຍໄດ້ ແລະ ບໍ່ມີວັນບົກແຫ້ງ ຍິ່ງນັບວັນໄປດົນເທົ່າໃດ ສິ່ງເຫຼົ່ານີ້ຍິ່ງເພີ່ມຄຸນຄ່າຂຶ້ນເປັນທະວີຄູນ ເຊິ່ງພວກເຮົາໄດ້ຮິບໂຮມເອົາມາໄວ້ຈຸດດຽວ ກາຍເປັນສິ່ງທີ່ນັກທ່ອງທ່ຽວຕ່າງປະເທດໃຫ້ຄວາມສົນໃຈທີ່ສຸດ, ທ່ານ ພູວົງ ກ່າວ.
