ງານມະຫາກຳກິລາໂອແລມປິກ ເກມ 2024 ຫຼື “ປາຣີ ເກມ 2024” ທີ່ປະເທດຝຣັ່ງ ເປັນເຈົ້າພາບ ປິດສາກລົງຢ່າງຈົບງາມ ໂດຍສະເພາະໃຊ້ຕົວແທນນັກກິລາທີ່ຄວ້າຫຼຽນລາງວັນໃນໂອແລມປິກ ຈາກ 5 ທະວີບ ເປົ່າມອດໄຟໃນຖັງໄຟໂອແລມປິກ, ສ່ວນບົດສະຫຼຸບຫຼຽນສຸດມັນ ສະຫະລັດອາເມຣິກາ ຄອງເຈົ້າຫຼຽນຄໍາໄປຫວຸດຫວິດ ດ້ວຍຜົນງານ 40 ຫຼຽນຄຳ, 44 ຫຼຽນເງິນ ແລະ 42 ຫຼຽນທອງ ລວມ 126 ຫຼຽນ ໂດຍມີຫຼຽນຄໍາເທົ່າກັບອັນດັບ 2 ຢ່າງ ສປ ຈີນ ທີ່ກວາດໄປ 40 ຫຼຽນຄຳ, 27 ຫຼຽນເງິນ ແລະ 24 ຫຼຽນທອງ ລວມ 91 ຫຼຽນ ເຊິ່ງ ເຈົ້າຫຼຽນຄໍາຄັ້ງນີ້ ໄດ້ຮັບທຸງເປັນເຈົ້າພາບຄັ້ງທີ 44 ໃນປີ 2028.
ພິທີປິດງານແຂ່ງຂັນກິລາດັ່ງກ່າວ ໄດ້ມີຂຶ້ນເມື່ອຕອນແລງວັນທີ 11 ສິງຫາ 2024 ຕາມເວລາທ້ອງຖິ່ນ ທີ່ສະໜາມກິລາສະຕ໊າດ ເດີ ຟຣອງ ນະຄອນຫຼວງປາຣີ ປະເທດຝຣັ່ງ ໂດຍໄຮໄລທີ່ອະລັງການທີ່ສຸດໃນງານຢູ່ທີ່ມອບ-ຮັບທຸງເຈົ້າພາບຈັດການແຂ່ງຂັນຄັ້ງຕໍ່ໄປ ທີ່ນະຄອນລອດແອນເຈລິດ ປະເທດສະຫະລັດອາເມຣິກາ ໃນປີ 2028 ໂດຍທ່ານ ຄາເຣນ ເບດ ເຈົ້ານະຄອນລອດແອນເຈລິດ ເປັນຜູ້ຮັບທຸງຈາກ ທ່ານ ແອນ ອິດາວໂກ ເຈົ້າຄອງນະຄອນຫຼວງປາຣີ ກ່ອນໃນສະໜາມຈະຮືຮາ ແລະ ຕື່ນເຕັ້ນ ເມື່ອ ທອມ ຄຣູດ ນັກສະແດງຮໍລີວູດ ອາຍຸ 62 ປີ ປາກົດຕົວໃນສະໜາມ ດ້ວຍການຢ່ອນຕົວລົງມາຈາກຫຼັງຄາສະໜາມ ສະຕ໊າດ ເດີ ຟຣອງ ມາຮັບທຸງໂອແລມປິກຕໍ່ອີກຕໍ່ໜຶ່ງ ພາຍຫຼັງຮັບທຸງແລ້ວ ກໍໄດ້ຂີ່ລົດຈັກອອກຈາກສະໜາມ ແລະ ພາບຕັດໄປທີ່ “ທອມ ຄຣູດ” ຂຶ້ນເຮືອບິນ ເພື່ອນຳທຸງໄປຍັງນະຄອນລອດແອນເຈລິດ ກ່ອນໂດດຈ້ອງລົງໄປທີ່ປ້າຍຂອງ ຮໍລີວູດ ແລນມາກສຳຄັນຂອງເມືອງເຈົ້າພາບໃນປີ 2028 ຫຼັງຈາກນັ້ນ “ທອມ ຄຣູດ” ໄດ້ສົ່ງຕໍ່ທຸງໃຫ້ກັບນັກກິລາຂອງສະຫະລັດອາເມຣິກາອີກຫຼາຍຄົນ ແລະ ສົ່ງຕໍ່ກັນໄປຈົນເຖິງຫາດຊາຍ ແລ້ວມອບຕໍ່ໃຫ້ ເຣດຮອດຊິລີເພບເປີ ວົງຣ໊ອດອາເມຣິກາ ທີ່ສ້າງຕັ້ງວົງໃນລອດແອນເຈລິດ ລວມເຖິງສອງແຣບເປີດັງຢ່າງ ສະນູບ ແລະ ດຣ.ເດຣ ໄດ້ຮ່ວມກັນສະແດງສົດຂ້າມປະເທດມາຍັງສະໜາມກິລາສະຕ໊ອດ ເດີ ຟຣອງ.
ບົດສະຫຼຸບຫຼຽນມີດັ່ງນີ້:
1.ສະຫະລັດອາເມຣິກາ ສາມາດຄອງເຈົ້າຫຼຽນຄຳ ຍາດມາໄດ້ 40 ຫຼຽນຄຳ, 44 ຫຼຽນເງິນ ແລະ 42 ຫຼຽນທອງ ລວມ 126 ຫຼຽນ
2. ອັນດັບທີ 2 ສປ ຈີນ ຍາດໄດ້ 40 ຫຼຽນຄຳ, 27 ຫຼຽນເງິນ ແລະ 24 ຫຼຽນທອງ ລວມ 91 ຫຼຽນ
3. ອັນດັບທີ 3 ຍີ່ປຸ່ນ ຍາດໄດ້ 20 ຫຼຽນຄຳ, 12 ຫຼຽນເງິນ ແລະ 13 ຫຼຽນທອງ ລວມ 45 ຫຼຽນ
ຂະນະທີ່ນັກກິລາ ສປປ ລາວເຮົາ ຈຳນວນ 4 ຄົນ ຈາກ 3 ປະເພດ ບໍ່ຜ່ານຮອບຄັດເລືອກ ແຕ່ສະຖິຕິຄັ້ງນີ້ເຫັນວ່າດີກວ່າຄັ້ງທີ່ຜ່ານມາ.
