ໃນວັນທີ 2 ສິງຫາ 2024 ບໍລິສັດ ຈໍາປາຫອມການຄ້າ ໄດ້ຈັດສົ່ງເຂົ້າຈໍາປາຫອມລາວ ໄປປະເທດຝຣັ່ງ ໂດຍໃສ່ຊື່ເຂົ້າການົກນ້ອຍ ເພື່ອຕອບສະໜອງໃຫ້ລູກຄ້າທາງປະເທດຝຣັ່ງ ໄດ້ບໍລິໂພກເຂົ້າທີ່ມີຄຸນນະພາບຈາກລາວ ແລະ ເປັນການສ້າງມູນຄ່າເພີ່ມແກ່ຜະລິດຕະພັນກະສິກຳລາວ.
ຕາມຂໍ້ມູນໃຫ້ຮູ້ວ່າ: ການຈັດສົ່ງເຂົ້າໄປປະເທດຝຣັ່ງໃນຄັ້ງນີ້ ແມ່ນມີຈຳນວນທັງໝົດ 25 ໂຕນ ເປັນການປະຕິບັດຕາມຄຳໝັ້ນສັນຍາທີ່ວ່າ ຈະຈັດສົ່ງເຂົ້າໃຫ້ໄດ້ 1.000 ໂຕນຕໍ່ປີ.
ສຳລັບການຈັດສົ່ງເຂົ້າໄປປະເທດຝຣັ່ງ ຂອງບໍລິສັດຈຳປາຫອມ ການຄ້າ ແມ່ນກ່ອນໜ້ານີ້ໄດ້ຮ່ວມມືກັບ ບໍລິສັດ ອາຣີແມັກ ອິນເຕີເນຊັ່ນເນວ ( ARIMEX INTERNATIONAL ) ຈັດພິທີສົ່ງເຂົ້າໄປແລ້ວຄັ້ງໜຶ່ງ ໃນຈໍານວນ 1 ຕູ້ຄອນເທັນເນີ ລວມປະລິມານທັງໝົດ 25 ໂຕນ ເມື່ອກາງເດືອນມີນາປີ 2023 ຜ່ານມາ.
ທ່ານ ນາງ ບຸນຮຽງ ພົມມີໄຊ ປະທານບໍລິສັດຈໍາປາຫອມການຄ້າ ໄດ້ກ່າວວ່າ: ໃນນາມຜູ້ປະກອບການ ໂດຍສະເພາະປະທານ ບໍລິສັດ ຈໍາປາຫອມການຄ້າ ຂາອອກ – ຂາເຂົ້າຈໍາກັດ ຜູ້ດຽວ ສະແດງຄວາມຂອບໃຈ ມາຍັງການຈັດຕັ້ງພາກລັດທຸກຂະແໜງການທີ່ອໍານວຍຄວມສະດວກຕະຫຼອດມາ ເຊິ່ງໃນໄລຍະຜ່ານມາ ທາງບໍລິສັດໄດ້ສົ່ງເຂົ້າໄປປະເທດແບນຊິກ ( ເບວຢ້ຽມ ) 2 ຄັ້ງ; ສ່ວນການຈັດສົ່ງເຂົ້າໄປປະເທດຝຣັ່ງ ແມ່ນເປັນອີກບາດກ້າວໜຶ່ງ ເຊິ່ງເປັນຜົນສໍາເລັດທີ່ໄດ້ເຊັນສັນຍາຮ່ວມກັນ ໃນທ້າຍປີ 2022.
ການສົ່ງເຂົ້າຄັ້ງທຳອິດ ໃນຈໍານວນ 25 ໂຕນ ມີເຂົ້າໜຽວ 12 ໂຕນ, ເຂົ້າຈ້າວ 13 ໂຕນ ທັງເປັນການທົດລອງທາງ, ທົດລອງເອກະສານ ຄາດວ່າໃຊ້ເວລາປະມານ 2 ເດືອນຈຶ່ງຈະເຖິງເປົ້າໝາຍປາຍທາງ ຫຼັງຈາກນັ້ນກໍຈະກຽມຄວາມພ້ອມເພື່ອໃຫ້ສາມາດຈັດຕັ້ງປະຕິບັດ ໃນສັນຍາກັນເບື້ອງຕົ້ນດ້ວຍການສົ່ງອອກ 1 ພັນໂຕນຕໍ່ປີ.
ໂດຍພື້ນຖານແລ້ວ ທາງບໍລິສັດຈຳປາຫອມການຄ້າ ມີ ຄວາມພ້ອມໃນການຮັກສາມາດຕະຖານ ໃນການຜະລິດເຂົ້ານັບແຕ່ການປູກຈົນຮອດຂອດການປຸງແຕ່ງ, ຈະປັບປຸງໄປເລື້ອຍໆ ບໍ່ວ່າຈະເປັນສົ່ງເສີມກຸ່ມຊາວນາເພີ່ມຂຶ້ນ, ເຄື່ອງມືທັນສະໄໝຂຶ້ນ, ມາຮອດປີ 2023 ບໍລິສັດໄດ້ສົ່ງເສີມຊາວນາປູກເຂົ້າໃນເນື້ອທີ່ 600 ກວ່າເຮັກຕາ ມີປະຊາຊົນເຂົ້າຮ່ວມໃນການປູກເຂົ້າ 600 ຄອບຄົວ.
ການມີຕະຫຼາດຮັບຊື້ຢູ່ຕ່າງປະເທດ ຖືເປັນຄວາມຫວັງໃຫ້ບໍລິສັດລວມທັງຊາວນາຜູ້ເຮັດການຜະລິດຕົວຈີງ ໃຫ້ມີກຳລັງສູ້ຕໍ່ໄປ ເພື່ອໝາກຜົນການຜະລິດທີ່ດີມີມາດຕະຖານຂຶ້ນ ແລະໃຫ້ໄດ້ເມັດເງິນເພີ່ມຂຶ້ນໄປຕາມໆກັນ.
