ກະຊວງເຕັກໂນໂລຊີ ແລະ ການສື່ສານ ຮ່ວມກັບ ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ຈັດກອງປະຊຸມການຮ່ວມມືດ້ານເສດຖະກິດດີຈີຕອນ ລາວ – ຈີນ, ເປີດແພລັດຟອມຂໍ້ມູນຂ່າວສານ ຄວາມໜ້າເຊື່ອຖືວິສາຫະກິດລາວ ແລະ ເຊັນສັນຍາການຮ່ວມມືດ້ານດີຈີຕອນ ທີ່ໂຮງແຮມແລນມາກ ໃນວັນທີ 7 ສິງຫາ 2024.
ເຂົ້າຮ່ວມຂອງ ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ທ່ານ ຈ້າວ ຈື້ກ່າງ ( Zhao Zhigang ) ຮອງເລຂາທິການອົງການປົກຄອງຕົນເອງເຜົ່າຈ້ວງ ແຂວງກວາງຊີ ສປ ຈີນ ທັງເປັນຫົວໜ້າກົມພັດທະນາ Big data, ທ່ານ ນາງ ຟ່າງຫົງ ເອກອັກຄະລັດຖະທູດ ສປ ຈີນ ປະຈຳລາວ, ພ້ອມບັນດາການນຳຈາກບັນດາກະຊວງ, ມີຕາງໜ້າຈາກສະພາການຄ້າ ແລະ ອຸດສາຫະກຳແຫ່ງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ ທັງແບບເຊິ່ງໜ້າ ແລະ ຜ່ານວີດີໂອ.
ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ກ່າວບາງຕອນວ່າ: ສປປ ລາວ ໄດ້ເລີ່ມເອົາເຕັກໂນໂລຊີດີຈີຕອນຕ່າງໆ ເຂົ້າມານຳໃຊ້ໃນບັນດາຂົງເຂດວຽກງານຕ່າງໆ ເພື່ອຊຸກຍູ້ສົ່ງເສີມການພັດທະນາເສດຖະກິດ ແລະ ສັງຄົມ, ໃນນັ້ນວຽກງານການບໍລິຫານ ແລະ ການບໍລິການລັດ ກໍໄດ້ຮັບການພັດທະນາຢ່າງວ່ອງໄວພໍສົມຄວນ ແຕ່ກໍຍັງບໍ່ທັນສາມາດຕອບສະໜອງທັນກັບຄວາມຕ້ອງການຢູ່ສູນກາງ ແລະ ທ້ອງຖິ່ນ.
ໃນພິທີໄດ້ມີການລົງນາມຮ່ວມມື 2 ເອກະສານສໍາຄັນ ຄື: ສະບັບທີ 1 ແມ່ນບົດບັນທຶກຄວາມເຂົ້າໃຈ ລະຫວ່າງ ກະຊວງເຕັກໂນໂລຊີ ແລະ ການສື່ສານ ກັບ ສຳນັກງານພັດທະນາຂໍ້ມູນຂະໜາດໃຫຍ່ຂອງແຂວງ ກວາງຊີ ສປ ຈີນ ໃນວຽກງານການພັດທະນາລັດດີຈີຕອນ ແລະ ເສດຖະກິດດີຈີຕອນ; ສ່ວນສະບັບທີ 2 ແມ່ນສັນຍາຮ່ວມມື ລະຫວ່າງ ສູນບໍລິຫານລັດດີຈີຕອນ ກະຊວງເຕັກໂນໂລຊີ ແລະ ການສື່ສານ ກັບບໍລິສັດທ່າຂໍ້ມູນຂ່າວສານຈີນອາຊຽນ ( CAIH ) ແລະ ບໍລິສັດອາໂລ.
ເນື້ອໃນຂອງການຮ່ວມມືດັ່ງກ່າວ ເນັ້ນໃສ່ບາງດ້ານດັ່ງນີ້:
1. ຮ່ວມມືໃນການພັດທະນາວຽກງານບໍລິຫານລັດທັນສະໄໝ ແລະ ວຽກງານເສດຖະກິດດີຈີຕອນ ເຊິ່ງຈະປະກອບມີການໄປຖອດຖອນແລກປ່ຽນບົດຮຽນໃນການວາງນະໂຍບາຍ ແລະ ລະບຽບການ ທາງດ້ານການຫັນເປັນລັດດີຈີຕອນ, ເສດຖະກິດດີຈີຕອນ, ຄົ້ນຄວ້າ ພັດທະນາວຽກງານສົ່ງ – ຮັບຂໍ້ມູນຂ້າມແດນ ລາວ – ຈີນ ແລະ ຊຸກຍູ້ສົ່ງເສີມການພັດທະນາບັນດາແພລັດຟອມ ໃນການສະໜັບສະໜູນວຽກງານຫັນເປັນລັດດີຈີຕອນ ແລະ ເສດຖະກິດດີຈີຕອນ.
2. ຮ່ວມມືໃນການຍົກລະດັບ ລະບົບການສື່ສານພາກລັດ G-Chat ເພື່ອໃຫ້ສາມາດຂະຫຍາຍການນໍາໃຊ້ໃຫ້ພະນັກງານລັດ ໃນອົງການສໍານັກງານທັງສູນກາງ ແລະ ທ້ອງຖິ່ນ ໃຫ້ມີປະສິດທິພາບສູງຂຶ້ນ, ເພີ່ມຄວາມປອດໄພ ແລະ ອຳນວຍຄວາມສະດວກ ໃຫ້ຜູ້ຊົມໃຊ້ຫຼາຍຂຶ້ນ.
3. ຮ່ວມມືໃນການພັດທະນາລະບົບຫ້ອງການລັດທັນສະໄໝ ( E-government Smart Office Platform ) ໂດຍ ບໍລິສັດ CAIH ຈະມອບລະບົບ Software ດັ່ງກ່າວ ຈຳນວນ 20.000 ບັນຊີ ໃຫ້ຫ້ອງວ່າການສຳນັກງານນາຍົກລັດຖະມົນຕີ ແລະ ບັນດາກະຊວງນໍາໃຊ້ ເພື່ອເພີ່ມປະສິດທິພາບໃນການດໍາເນີນງານ, ການສື່ສານ, ການຕິດຕາມວຽກ, ການຈັດສັນຊັບພະຍາກອນ, ຮັບປະກັນຄວາມປອດໄພຂອງລະບົບ ແລະ ຂໍ້ມູນ.
ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ ກ່າວບາງຕອນວ່າ: ກອງປະຊຸມຄັ້ງນີ້ ແມ່ນເນັ້ນໜັກໃນຫົວຂໍ້ ” ສ້າງເສັ້ນທາງສາຍໄໝດີຈີຕອນ ແລະ ສ້າງອະນາຄົດດ້ານດີຈີຕອນຮ່ວມກັນ ” ເຊິ່ງສະແດງໃຫ້ເຫັນເຖິງຄວາມມຸ່ງໝັ້ນໃນການພັດທະນາພື້ນຖານໂຄງລ່າງດ້ານດີຈີຕອນ ໃຫ້ເຂັ້ມແຂງທີ່ສະໜັບສະໜູນນະວັດຕະກໍາໃໝ່, ການດໍາເນີນທຸລະກິດຮູບແບບໃໝ່ໆທີ່ທັນສະໄໝ, ຊ່ວຍປັບປຸງ ຄວາມອາດສາມາດຂອງຫົວໜ່ວຍທຸລະກິດໃຫ້ມີຄວາມພ້ອມ ແລະ ສາມາດແຂ່ງຂັນທັງພາຍໃນ ແລະ ສາກົນ.
