ພະແນກອຸດສາຫະກຳ ແລະ ການຄ້າແຂວງຈຳປາສັກ ໄດ້ຈັດກອງປະຊຸມ ປຶກສາຫາລືຮ່ວມກັບ ຂະແໜງການທີ່ກ່ຽວຂ້ອງພາກລັດ ແລະ ພາກທຸລະກິດພາຍໃນແຂວງ ເພື່ອເກັບກຳບັນຫາຂອງທຸລະກິດ ນຳເຂົ້າ – ສົ່ງອອກ ພາຍໃນແຂວງ.
ກອງປະຊຸມ ຈັດຂຶ້ນຢູ່ຫ້ອງປະຊຸມພະແນກອຸດສາຫະກຳ ແລະ ການຄ້າແຂວງ ເມື່ອວັນທີ 6 ສິງຫາ 2024 ໂດຍການເປັນປະທານຂອງ ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະ ການຄ້າແຂວງ ຮອງຫົວໜ້າ ທັງເປັນຜູ້ປະຈຳການ ຄະນະກຳມະການອຳນວຍຄວາມສະດວກທາງດ້ານການຄ້າ ແລະ ການຂົນສົ່ງແຂວງ. ມີການນໍາຂະແໜງການທີ່ກ່ຽວຂ້ອງຂອງພະແນກອຸດສາຫະກໍາ ແລະ ການຄ້າແຂວງ, ການນໍາຫົວໜ່ວຍທຸລະກິດ, ຜູ້ປະກອບການ ດ້ານການນໍາເຂົ້າ - ສົ່ງອອກພາຍໃນແຂວງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ບຸນຍະເດດ ທອງສະຫວັນ ກໍາມະການພັກແຂວງ ຫົວໜ້າພະແນກອຸດສາຫະກໍາ ແລະ ການຄ້າແຂວງ ປະທານກອງປະຊຸມ ມີຄໍາເຫັນວ່າ: ກອງປະຊຸມຄັ້ງນີ້ ສຸດທີ່ມີຄວາມໝາຍສໍາຄັນ ເພາະວ່າຈະໄດ້ປຶກສາຫາລື ເພື່ອເກັບກຳບັນຫາຂອງທຸລະກິດນໍາເຂົ້າ ແລະ ສົ່ງອອກພາຍໃນແຂວງ ທີ່ຕິດພັນກັບການເຄື່ອນຍ້າຍ, ນຳເຂົ້າ – ສົ່ງອອກສິນຄ້າ ໃນ ສປປ ລາວ ທັງເປັນການຈັດຕັ້ງປະຕິບັດແຜນຍຸດທະສາດອຳນວຍຄວາມສະດວກທາງດ້ານການຄ້າ ແລະ ການຂົນສົ່ງ 5 ປີ (2024 – 2028) ເພື່ອປັບປຸງການຄ້າ ແລະ ການຂົນສົ່ງ ໃຫ້ມີຄວາມວ່ອງໄວ, ໂປ່ງໃສ ແລະ ປອດໄພ ໂດຍນຳໃຊ້ລະບົບທັນສະໄໝ, ເປົ້າໝາຍເພື່ອຫຼຸດຜ່ອນເວລາ ໃນການອະນຸຍາດ, ຢັ້ງຢືນການນຳເຂົ້າ ແລະ ສົ່ງອອກສິນຄ້າ ຂອງຂະແໜງການກ່ຽວຂ້ອງຢ່າງໜ້ອຍ 25%, ຫຼຸດຜ່ອນເວລາ ໃນການກວດປ່ອຍສິນຄ້ານຳເຂົ້າ – ສົ່ງອອກ ແລະ ຜ່ານແດນຢູ່ດ່ານສາກົນ ຢ່າງໜ້ອຍ 25%, ຍົກສູງການແຂ່ງຂັນ ແລະ ຄຸນນະພາບການບໍລິການດ້ານໂລຊິດສະຕິກ ເພື່ອກະຕຸກຊຸກຍູ້ໃຫ້ປະລິມານການຂົນສົ່ງສິນຄ້ານຳເຂົ້າ – ສົ່ງອອກ ແລະ ຜ່ານແດນ ຜ່ານທ່າບົກ ແລະ ສະຖານີລົດໄຟລາວ – ຈີນ ໃຫ້ເພີ່ມຂຶ້ນຢ່າງໜ້ອຍ 50%, ຫຼຸດຜ່ອນຈຸດກວດກາຕາມເສັ້ນທາງທີ່ບໍ່ຈຳເປັນ ເພື່ອອຳນວຍຄວາມສະດວກໃຫ້ແກ່ການເຄື່ອນຍ້າຍ ແລະ ການຂົນສົ່ງສິນຄ້າ ຢູ່ພາຍໃນປະເທດ ຢ່າງໜ້ອຍ 50%.
ໃນກອງປະຊຸມ, ທ່ານ ນາງ ອຸໄທທິບ ວົງຈັນທະລາ ຂະແໜງການຄ້າຕ່າງປະເທດ ພະແນກອຸດສາຫະກໍາ ແລະ ການຄ້າແຂວງ ໃນນາມຫ້ອງການປະຈໍາການ ໜ່ວຍງານອຳນວຍຄວາມສະດວກທາງດ້ານການຄ້າໄດ້ຜ່ານບົດສະຫຼຸບການຈັດຕັ້ງປະຕິບັດແກ້ໄຂບັນຫາ ການສະເໜີຂອງພາກທຸລະກິດ ໃນ 6 ເດືອນ ປີ 2024, ວຽກອຳນວຍຄວາມສະດວກທາງດ້ານການຄ້າແຂວງຈຳປາສັກ ໄດ້ຖືກດຳເນີນການຕັ້ງແຕ່ ປີ 2022 ເຊິ່ງສາມາດເກັບກຳບັນຫາທີ່ຕິດພັນກັບ ນິຕິກຳ, ແບບແຜນວິທີຈັດຕັ້ງປະຕິບັດຂອງຂະແໜງ ແລະ ແກ້ໄຂ ໄດ້ຫຼາຍບັນຫາ ທັງຂັ້ນສູນກາງ ແລະ ທ້ອງຖິ່ນ. ໃນ 6 ເດືອນຕົ້ນປີ 2024, ບັນຫາທີ່ໄດ້ຖືກແກ້ໄຂແລ້ວ 2 ບັນຫາ ຄື: ການເກັບຄ່າບໍລິການທ່າບົກທີ່ບໍ່ສອດຄ່ອງກັບອັດຕາແລກປ່ຽນຂອງທະນາຄານທຸລະກິດ ຕາມແຈ້ງການຂອງກົມຄຸ້ມຄອງເງິນຕາຕ່າງປະເທດ ເລກທີ 1566/ກຄງຕ, ລົງວັນທີ 7 ມີນາ 2024; ໄດ້ຈັດຕັ້ງປະຕິບັດ ດຳລັດວ່າດ້ວຍທ່າບົກ ເລກທີ 298/ລບ, ລົງວັນທີ 5 ມີຖຸນາ 2024 ທີ່ໄດ້ຖືກນຳໃຊ້ແຕ່ວັນທີ 11 ກໍລະກົດ 2024. ສ່ວນບັນຫາກຳລັງແກ້ໄຂ ມີ 6 ບັນຫາ ເປັນບັນຫາທີ່ຕິດພັນກັບ ທ່າບົກວັງເຕົ່າ ມີ 2 ບັນຫາທີ່ຈະຖືກຍົກເລີກ ເນື່ອງຈາກບໍ່ໄດ້ຈັດຕັ້ງ ໂດຍສະເພາະແມ່ນການເກັບຄ່າບໍລິການກວດການອກຮອບ ແລະ ການເກັບຄ່າເສຍໂອກາດຂອງລົດຂົນສົ່ງລາວ. ມີ 2 ບັນຫາທີ່ຊຸກຍູ້ໃຫ້ບັນດາທ່າບົກຈັດຕັ້ງປະຕິບັດ ແຈ້ງການເລກທີ 1566/ກຄງຕ ລວມມີການປະຕິບັດອັດຕາແລກປ່ຽນທີ່ທະນາຄານທຸລະກິດກຳນົດອອກໃນແຕ່ລະໄລຍະຢ່າງເຂັ້ມງວດ ແລະ ການເກັບຄ່າບໍລິການເປັນເງິນໂດລາຢ່າງດຽວ; ການເກັບ 30% ຂອງຄ່າບໍລິການທັງໝົດຢູ່ຈຸດຄ່ຽນຖ່າຍ ແລະ ລານຕູ້ຢູ່ທ່າບົກ ສະເໜີໃຫ້ປັບປຸງແຈ້ງການໂຄງສ້າງຄ່າບໍລິການທ່າບົກທົ່ວປະເທດ; ການເກັບຄ່າບໍລິການສຳລັບລົດຂົນສົ່ງສິນຄ້າ ປະເພດ 4 ລໍ້ ທີ່ບໍ່ໄດ້ກຳນົດໃນລາຍການອັດຕາຄ່າບໍລິການຂອງທ່າບົກວັງເຕົ່າ ເຊິ່ງສະເໜີຂໍທິດຊີ້ນຳຈາກກະຊວງໂຍທາທິການ ແລະ ຂົນສົ່ງ ທີ່ມີສອງທາງເລືອກ ຄື: ຄົ້ນຄວ້າອອກແຈ້ງການເພີ່ມເຕີມ ເພື່ອໃຫ້ຖືກລະບຽບ, ເຈລະຈາກັບຝ່າຍໄທ ເນື່ອງຈາກກົດໝາຍ ແລະ ສັນຍາສອງຝ່າຍບໍ່ໄດ້ອະນຸຍາດ ລົດ 4 ລໍ້ເປັນລົດຂົນສົ່ງສິນຄ້າ.
ນອກນີ້ ຍັງມີບັນຫາທີ່ມີຄວາມຄືບໜ້າ ຄື: ການປັບປຸງໂຄງສ້າງລາຄາຄ່າບໍລິການທ່າບົກ 7 ລາຍການ ທີ່ຍັງບ່ໍທັນໄດ້ຈັດກອງປະຊຸມເປີດກວ້າງມີຄຳເຫັນຈາກຜູ້ປະກອບການ ກ່ອນສະເໜີລັດຖະບານເຊັນຮັບຮອງ; ການປັບປຸງແຈ້ງການ 260/ຍທຂ ແລະ 4718/ຫກ ເຊິ່ງຢູ່ໃນຂັ້ນຕອນການມີຄຳເຫັນເປີດກວ້າງ ຂອງພາກລັດ ແລະ ເອກະຊົນ. ສ່ວນບັນຫາທີ່ຊັກຊ້າ ຄື: ຈຸດກວດກາຕາມເສັ້ນທາງຂອງເຈົ້າໜ້າທີ່ກ່ຽວຂ້ອງ ທີ່ສ້າງຄວາມຫຍຸ້ງຍາກໃຫ້ແກ່ການເຄື່ອນຍ້າຍ ແລະ ຂົນສົ່ງສິນຄ້າພາຍໃນປະເທດຂອງພາກທຸລະກິດ.
ຂ່າວ-ພາບ: ທູນທອງໃຈ
