ກໍຖືວ່າສໍາເລັດໄປແລ້ວສໍາລັບການສອບເສັງ ຄັດເລືອກເອົານັກສຶກສາເຂົ້າສູ່ມະຫາວິທະຍາໄລແຫ່ງຊາດ ສົກສຶກສາ 2024-2025 ໄດ້ຈັດຂຶ້ນໃນວັນທີ 10 ສິງຫາ 2024 ເຊົ້າແລ້ວ 2 ຫົວຂໍ້ A ມີວິຊາ ຄະນະນິດສາ + ຟິຊິກສາດ ແລະ ພາສາລາວ-ວັນນະຄະດີ+ເຄມີສາດ+ຊີວະສາດ+ພາສາອັງກິດ, ສ່ວນຫົວຂໍ້ B ມີວິຊາ ຄະນິດສາດ+ພາສາລາວ-ວັນນະຄະດີ ແລະ ພູມີສາດ+ປະຫວັດສາດ+ພາສາອັງກິດ.
ກ່ອນໜ້ານີ້ ທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມະຫາວິທະຍາໄລແຫ່ງຊາດ ໄດ້ເຜີຍເຜີດໃນສື່ຂອງ Lao National Radio ໃຫ້ຮູ້ວ່າ : ການສອບເສັງເຂົ້າຮຽນໃນມະຫາວິທະຍາໄລແຫ່ງຊາດ ແມ່ນມີຫຼາຍລະບົບ ສະເພາະສອບເສັງໃນວັນທີ 10 ສິງຫາ 2024 ແມ່ນລະບົບຮຽນ 4 – 5 ປີ ແລະ ຜູ້ທີ່ຮຽນຊັ້ນສູງ ຕາມແຜນຮັບນັກສຶກສາ ແມ່ນ 7.685 ຄົນ ແລະ ຈະມີການສອບເສັງເພີ່ມຕື່ມອີກໃນລະບົບອື່ນ.
ການສອບເສັງໃນຄັ້ງນີ້ ຈັດຂຶ້ນຢູ່ສູນດຽວ ຄື ຢູ່ວິທະຍາ ເຂດດົງໂດກ ມີ 140 ຫ້ອງສອບເສັງ ຕາມແຕ່ລະວິຊາດັ່ງນີ້ : ຄະນະເສດຖະສາດ ສາຍທໍາມະຊາດ 59 ຫ້ອງ, ຄະນະວິທະຍາ ສາດທຳມະຊາດ ສາຍສັງຄົມ 29 ຫ້ອງ, ຄະນະວິທະຍາສາດສັງຄົມ ສາຍສັງຄົມ 28 ຫ້ອງ,ຄະນະອັກສອນສາດ ສາຍສັງຄົມ 72 ຫ້ອງ, ຄະນະສະຖາປັດຕະຍະກຳສາດ ສາຍສັງຄົມ 18 ຫ້ອງ, ຄະນະວິທະຍາສາດສິ່ງແວດລ້ອມ ສາຍສັງຄົມ 24 ຫ້ອງ.
ຫຼ້າສຸດວັນທີ 11 ສິງຫາ 2024 ມີການເປີດເຜີຍວ່າ: ມີນັກຮຽນມາເສັງຕົວຈິງຈໍານວນ 5.457 ຄົນ ແນ່ນອນເປັນຕົວເລກທີ່ຕໍ່າກວ່າແຜນທີ່ທາງ ມຊ ຕ້ອງການຫຼາຍພໍສົມ ເຮັດໃຫ້ໂອກາດທີ່ນັກຮຽນຈະຕິດໝົດມີສູງ, ແຕ່ອາດຈະຍ້າຍໃສ່ໂກຕ້າສາຂາອື່ນໆ ກໍລະນີທີ່ເສັງສາຍຫຼັກບໍ່ໄດ້ ຄືກັບປີທີ່ຜ່ານມາ.
ສ່ວນສະຖິຕິກ່ອນໜ້ານີ້ ທີ່ທາງເວັບໄຊທ໌ ມຊ ໄດ້ມີການເປີດຮັບຕົວເລກນັກຮຽນປາກົດວ່າ ສາຍ A ຄະນະວິສະວະກໍາສາດ ສາຂາວິຊາ ວິສະວະກໍາຄອມພິວເຕີ ມີນັກຮຽນມາສະໝັກເສັງຫຼາຍທີ່ສຸດເກືອບສາຂາດຽວເກືອບ 500 ຄົນ, ສ່ວນ ສາຂາວິຊາ ຄູຟິກຊິກສາດ ຂອງຄະນະສຶກສາສາດ ເປັນສາຂາວິຊາດຽວທີ່ຍັງບໍ່ມີຜູ້ສະໝັກຮຽນເລີຍ.
ຂະນະທີ່ ກຸ່ມ B ຄະນະສຶກສາສາດ ສາຂາພາສາຈີນ ມີນັກສຶກສາມາສະໝັກເຖິງ 1.063 ຄົນ, ສ່ວນ ຄູພາສາຝຣັ່ງ ຄະນະສຶກສາສາດ ເປັນສາຂາດຽວທີ່ບໍ່ມີນັກຮຽນມາສະໝັກເລີຍ.
ຢ່າງໃດກໍຕາມ, ນີ້ເປັນພຽງສະຖິຕິກ່ອນໜ້ານີ້ຖ້າຕິດຕາມຜົນການສອບເສັງເບິ່ງວ່າປີນີ້ຈະມີນັກຮຽນຕິດຈັກຄົນໃນໄວໆນີ້ ຂໍໃຫ້ນ້ອງໆທຸກຄົນໂຊກດີ.
