ເນື່ອງໃນໂອກາດສະເຫຼີມສະຫຼອງ ວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ (13 ສິງຫາ 1950 – 13 ສິງຫາ 2024) ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດພິທີໂຮມຊຸມນຸມເພື່ອສະເຫຼີມສະຫຼອງວັນດັ່ງກ່າວຂຶ້ນ, ໂດຍການເຂົ້າຮ່ວມຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງ ຖວທ, ມີທ່ານບັນດາຮອງລັດຖະມົນຕີ, ຫົວໜ້າກົມ-ຮອງກົມ, ຫົວໜ້າອຳນວຍການ, ຫົວໜ້າບັນນາທິການ, ພະນັກງານປະຕິວັດ, ອາວຸໂສບຳນານ, ແຂກຖືກເຊີນ ບັນດາຂະແໜງການກ່ຽວຂ້ອງ ແລະ ສື່ມວນຊົນຈາກທຸກສຳນັກເຂົ້າຮ່ວມ. ທີ່ຫໍວັດທະນະທໍາແຫ່ງຊາດ, ວັນທີ 9 ສິງຫາ 2024.
ໃນພິທີ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ໄດ້ຫວນຄືນປະຫວັດ, ມູນເຊື້ອສື່ມວນຊົນ ແລະ ການພິມຈຳໜ່າຍ ບາງຕອນວ່າ: ຕະຫຼອດໄລຍະ ແຫ່ງການນຳພາຂະບວນການຕໍ່ສູ້ປົດປ່ອຍຊາດ, ຍາດເອົາເອກະລາດແຫ່ງຊາດ ແລະ ອິດ ສະຫຼະພາບມາສູ່ປະຊາຊົນ ກໍຄືໄລຍະ 49 ປີ ແຫ່ງພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນລະບອບ ປະຊາທິປະໄຕ ປະຊາຊົນ, ພັກປະຊາຊົນ ປະຕິວັດລາວ ຍາມໃດກໍຖືເອົາວຽກງານໂຄສະນາສຶກສາອົບຮົມ, ຂົນຂວາຍ ແລະ ຈັດຕັ້ງປະຊາຊົນ ເປັນວິທີປະຕິວັດອັນໜຶ່ງ, ໃນນັ້ນວຽກງານສື່ມວນຊົນ ແລະ ການພິມຈຳໜ່າຍ ເວົ້າລວມ, ເວົ້າສະເພາະ ແມ່ນສື່ສິ່ງພິມ ແລະ ສື່ເອເລັກໂຕຼນິກ ຕ່າງໆ ໄດ້ກາຍເປັນເຄື່ອງມືອາວຸດອັນແຫຼມຄົມ ແລະ ປະກອບສ່ວນຢ່າງຕັ້ງໜ້າເຂົ້າໃນໄຊຊະນະລວມ ຂອງການປະຕິວັດ. ເພື່ອປະຕິບັດຕາມແນວທາງ-ແຜນນະໂຍບາຍ “ເປີດກວ້າງຂະຫຍາຍແນວໂຮມ, ຂະຫຍາຍສົງຄາມປະຊາຊົນຢ່າງແຂງແຮງ, ໜີບຮັດກຳລັງສັດຕູ” ພັກເຮົາໄດ້ຮຽກໂຮມຜູ້ແທນຫຼາຍກວ່າ 150 ທ່ານ ທີ່ຕາງໜ້າໃຫ້ກຳລັງປະກອບອາວຸດ, ອົງການຈັດຕັ້ງມະຫາຊົນ, ສາສະໜາ, ປະຊາຊົນບັນດາເຜົ່າຈາກເຂດຕໍ່ຕ້ານ ແລະ ເຂດປົກຄອງຊົ່ວຄາວຂອງສັດຕູ ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ໃນວັນທີ 13 ສິງຫາ 1950. ກອງປະຊຸມໄດ້ຕົກລົງສ້າງຕັ້ງ “ແນວລາວອິດສະຫຼະ” ແລະ “ລັດຖະບານລາວຕໍ່ຕ້ານ”, ໂດຍມີ ສະເດັດເຈົ້າ ສຸພາ ນຸວົງ ເປັນປະທານແນວລາວອິດສະຫຼະ ແລະ ນາຍົກລັດຖະມົນຕີ ຂອງລັດຖະບານລາວຕໍ່ຕ້ານ; ໃນມື້ດຽວກັນນັ້ນ, ກອງປະຊຸມໄດ້ຕົກລົງສ້າງຕັ້ງໜັງສືພິມປະຕິວັດຂອງຕົນຂຶ້ນ ໂດຍໃສ່ຊື່ວ່າ: ໜັງສືພິມ “ລາວອິດສະຫຼະ”. ໜັງສືພິມນີ້, ຮູບນອກແມ່ນເປັນສຽງຂອງແນວລາວອິດສະຫຼະ ແລະ ລັດຖະບານລາວຕໍ່ຕ້ານ ໃນເວລານັ້ນ, ຊຶ່ງເນື້ອແທ້ ກໍແມ່ນໜັງສືພິມຂອງພັກ.
ທ່ານກ່າວຕື່ມວ່າ: ຜົນງານທີ່ພົ້ນເດັ່ນ ຕະຫຼອດໄລຍະ 74 ປີຜ່ານມາ ວຽກງານສື່ມວນຊົນ ແລະ ການພິມຈຳໜ່າຍ ໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວເປັນກ້າວໆມາ. ສະເພາະຜົນງານທີ່ພົ້ນເດັ່ນປະຈໍາປີ 2024 ເຊິ່ງສະແດງອອກ ມີດັ່ງນີ້:
1). ຂົງເຂດສື່ມວນຊົນ:
ອັນພົ້ນເດັ່ນ ແມ່ນໄດ້ໂຄສະນາ ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຂອງພັກ ຄັ້ງທີ XI ຂອງພັກ ໃນໄລຍະທ້າຍສະໄໝ ໂດຍສະເພາະການໂຄສະນາຊຸກຍູ້ການຈັດຕັ້ງປະຕິບັດມະຕິຂອງພັກໃນແຕ່ລະໄລຍະ ເປັນຕົ້ນມະຕິວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່;
ໄດ້ໂຄສະນາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ເປັນຕົ້ນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ການສົ່ງເສີມການຜະລິດສິນຄ້າພາຍໃນ ແລະ ການສົ່ງເສີມການຊົມໃຊ້ສິນຄ້າຂອງຕົນ, ຫຼຸດການນໍາເຂົ້າສິນຄ້າທີ່ບໍ່ຈໍາເປັນ ແລະ ອື່ນໆ;
ໂຄສະນາການດໍາເນີນ ແລະ ຜົນກອງປະຊຸມສະພາແຫ່ງຊາດ ແລະ ການຮັບຮອງມະຕິ, ການປັບປຸງ ແລະ ສ້າງກົດໝາຍ ພ້ອມທັງການຕິດຕາມການຈັດຕັ້ງປະຕິບັດມະຕິຂອງສະພາແຫ່ງຊາດ ໃນແຕ່ລະໄລຍະ;
ໄດ້ໂຄສະນາກອງປະຊຸມລັດຖະບານ ປະຈໍາແຕ່ລະເດືອນ ເປັນຕົ້ນ ການຈັດຕັ້ງປະຕິບັດວຽກງານສອງວາລະແຫ່ງຊາດ ແລະ ການກໍາມາດຕະການຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ ກໍຄືວຽກດີຄົນເດັ່ນ ແລະ ການສົ່ງເສີມການນໍາໃຊ້ຜະລິດຕະພັນພາຍໃນປະເທດ;
ໄດ້ເອົາໃຈໃສ່ໂຄສະນາໃຫ້ແກ່ວັນສໍາຄັນຕ່າງໆຂອງພັກ, ຂອງຊາດ ຢ່າງກວ້າງຂວາງ, ເລິກເຊິ່ງ ແລະ ເປັນລະບົບຕໍ່ເນື່ອງ ເປັນຕົ້ນການເຄື່ອນໄຫວວຽກງານການເປັນປະທານອາຊຽນປີ 2024 ຂອງສປປ ລາວ ເປັນເຈົ້າພາບ, ການໂຄສະນາດືງດູດນັກທ່ອງທ່ຽວ ໃນໂອກາດເປີດປີທ່ອງທ່ຽລາວ 2024 ແລະ ການນໍາໃຊ້ເສັ້ນທາງ ລົດໄຟລາວ-ຈີນ;
ໄດ້ມີຄວາມເປັນເຈົ້າການ, ຕື່ນຕົວ ໂຄສະນາຕອບໂຕ້, ຕອບຕ້ານ ປະກົດການຫຍໍ້ທໍ້ຕ່າງໆ ໃນສັງຄົມ ເປັນຕົ້ນການແກ້ໄຂບັນຫາການຄ້າຂາຍຢາເບຕິດ, ບັນດາຂໍ້ມູນບິດເບື່ອນ, ຂ່າວທີ່ບໍ່ມີມູນຄວາມຈິງ, ການກ່າວໃສ່ຮ້າຍປ້າຍສີຂອງກຸ່ມຄົນບໍ່ດີ ແລະ ອິດທິກໍາລັງປໍລະປັກ ຕໍ່ການນໍາພາຂອງພັກ, ລັດ ກໍຄື ວຽກງານການປົກປັກຮັກສາ ແລະ ພັດທະນາປະເທດຊາດ ເປັນຕົ້ນການນໍາໃຊ້ເສັ້ນທາງລົດໄຟລາວ-ຈີນ, ບັນຫາເງິນເຟີ້ ເຊິ່ງກຸ່ມຄົນບໍ່ດີ ໄດ້ພະຍາຍາມສ້າງຂ່າວບິດເບືອນຄວາມຈິງ, ຂ່າວປອມ ພ້ອມທັງຕັ້ງຂໍ້ກ່າວຫາກ່ຽວກັບສິດທິມະນຸດ, ປະຊາທິປະໄຕ, ເຜົ່າ ແລະ ສາສະໜາ.
ຂົງເຂດການພິມຈຳໜ່າຍ:
ອັນພົ້ນເດັ່ນຂອງວຽກງານພິມຈຳໜ່າຍ ໃນໄລຍະຜ່ານມາ ໄດ້ເອົາໃຈໃສ່ຢ່າງຕັ້ງໜ້າໃນການຄຸ້ມຄອງ, ຊຸກຍູ້ ສົ່ງເສີມ, ສ້າງແຜນພັດທະນາວຽກງານພິມຈຳໜ່າຍ ໃຫ້ມີບາດກ້າວຂະຫຍາຍຕົວເລື້ອຍໆມາ, ສາມາດປະຕິບັດໜ້າທີ່ການເມືອງ ໃນການພິມປຶ້ມ, ສິ່ງພິມ ທີ່ມີຄຸນຄ່າສູງ ແລະ ຈຳໜ່າຍດ້ວຍຮູບການຕ່າງໆ ເພື່ອສົ່ງເສີມການອ່ານ, ທັງເປັນການເຜີຍແຜ່ ຜົນງານດ້ານຊັບສິນປັນຍາ, ສະໜອງຄວາມຮູ້ດ້ານຕ່າງໆໃຫ້ສັງຄົມ, ສ້າງວິໄສທັດ, ສຶກສາອົບຮົມຄຸນສົມບັດ, ແບບແຜນດຳລົງຊີວິດທີ່ປອດໃສໃຫ້ແກ່ຜູ້ອ່ານ, ສາມາດຈຳກັດບັນຫາ ແລະ ປາກົດການຫຍໍ້ທໍ້ທາງສັງຄົມ, ປະກອບສ່ວນໃນການພັດທະນາຊັບພະຍາກອນມະນຸດ, ປົກປັກຮັກສາ ແລະ ສ້າງສາປະເທດຊາດຢ່າງຕໍ່ເນື່ອງ. ນອກນັ້ນ, ໄດ້ສົມທົບກັບອົງການຈັດຕັ້ງສັງຄົມ, ສາກົນ ເຄື່ອນໄຫວວຽກສົ່ງເສີມການອ່ານເປັນຕົ້ນແມ່ນ: ອົງການ ອີຟາເຈແປນ, ສະມາຄົມຮ່ວມນ້ຳໃຈເດັກນ້ອຍລາວຍີ່ປຸ່ນ (ALC), ອົງການຣູມທູຣີດ, ມູນນິທິເອເຊຍ (Asia foundation) ລົງໄປທ້ອງຖິ່ນ ເພື່ອຈັດຕັ້ງຫ້ອງຮັກອ່ານ ຢູ່ບັນດາເມືອງຈຳນວນໜຶ່ງ ຂອງນະຄອນຫຼວງວຽງຈັນ, ແຂວງໄຊຍະບູລີ, ແຂວງຫຼວງພະບາງ, ຊຽງຂວາງ ແລະ ອຸດົມໄຊ. ໃນປີ 2024, ວຽກງານການຈັດພິມປຶ້ມ ສາມາດອອກທະບຽນພິມປຶ້ມໄດ້ 704 ຫົວເລື່ອງ ມີຈໍານວນ 3.049.549 ຫົວ ແລະ ສິ່ງພິມອື່ນ ໄດ້ 319.900 ສະບັບ.
ສະມາຄົມນັກຂ່າວແຫ່ງ ສປປ ລາວ; ສະມາຄົມນັກປະພັນ; ສະມາຄົມການພິມ ແລະ ສະມາຄົມຫໍສະມຸດ ເປັນອົງການຈັດຕັ້ງການເມືອງ, ສັງຄົມ, ວິຊາຊີບຂອງຜູ້ເຮັດວຽກງານເຫຼົ່ານີ້ ກໍໄດ້ສະແດງບົດບາດສໍາຄັນຂອງຕົນ ເພື່ອຊ່ວຍສະໜັບສະໜູນ ແລະ ຊຸກຍູ້ລັດ ກໍຄືກະຊວງພວກເຮົາໃນການຄຸ້ມຄອງສື່ມວນຊົນ ແລະ ການພິມຈໍາໜ່າຍບົນພື້ນຖານເນື້ອໃນທີ່ໄດ້ກຳນົດໄວ້ໃນນິຕິກຳ ແລະ ກົດໝາຍຂອງສອງຂະແໜງການດັ່ງກ່າວ.
ໃນໂອກາດນີ້ ທ່ານນາງ ສວນສະຫວັນ ວິຍະເກດ ລັດຖະມົນຕີ ກະຊວງ ຖວທ ກ່າວບາງຕອນວ່າ: ຜ່ານການຮັບຟັງບົດລາຍງານຫຍໍ້ ກ່ຽວກັບປະຫວັດຄວາມເປັນມາ, ມູນເຊື້ອ ແລະ ຜົນງານທີ່ພົ້ນເດັ່ນຂອງການເຄື່ອນໄຫວວຽກງານສື່ມວນ ແລະ ການພິມຈໍາໜ່າຍ ໃນໄລຍະທີ່ຜ່ານມາ ແລະ ແຜນວຽກຈຸດສຸມໃນຕໍ່ໜ້າ. ດັ່ງນັ້ນ ເພື່ອສືບຕໍ່ປະຕິບັດໜ້າທີ່ການເມືອງທີ່ພັກ, ລັດ ແລະ ປະຊາຊົນ ມອບໝາຍໃຫ້ ໃນນັ້ນ ຂ້າພະເຈົ້າກໍຍົກເອົາບາງທິດທາງລວມ ຂອງກະຊວງຖວທ ທີ່ພວກເຮົາ ຈະຕ້ອງໄດ້ພ້ອມກັນສຸມໃສ່ຈັດຕັ້ງປະຕິບັດດັ່ງນີ້:
ສືບຕໍ່ຫັນການເຄື່ອນໄຫວວຽກງານຖະແຫຼງຂ່າວ-ສື່ມວນຊົນ ແລະ ການພິມຈໍາໜ່າຍ ໄປຕາມທິດຂ່າວສານທັນສະໄໝ, ວ່ອງໄວທັນການ ກາຍເປັນກະບອກສຽງທີ່ແຫຼມຄົມຂອງພັກ, ເປັນເວທີແຫ່ງການສະແດງອອກຄໍາເຫັນທີ່ສ້າງສັນຂອງສັງຄົມ ກໍຄືປະຊາຊົນ ແລະ ສ້າງນິຕິກໍາ, ກົດໝາຍ ເພື່ອຄຸ້ມຄອງໃຫ້ເຂັ້ມງວດ;
ເອົາໃຈໃສ່ສົ່ງເສີມໃຫ້ສະມາຄົມວິຊາຊີບ ທີ່ກ່ຽວຂ້ອງກັບສື່ມວນຊົນ, ການພິມຈໍາໜ່າຍໄດ້ເຂົ້າຮ່ວມເຄື່ອນໄຫວປະກອບສ່ວນພັດທະນາໃນຂົງເຂດຖະແຫຼງຂ່າວ ແລະ ການພິມຈໍາໜ່າຍ ໃຫ້ເປັນລະບົບຕໍ່ເນື່ອງ; ຊຸກຍູ້ພະນັກງານອາວຸໂສບໍານານທີ່ມີຄວາມຮູ້ ແລະ ບົດຮຽນ ໃຫ້ປະກອບສ່ວນຖ່າຍທອດຄວາມຮູ້ ແລະ ເຮັດວຽກຄົ້ນຄວ້າຜ່ານໂຄງການຕ່າງໆ;
ສ້າງລະບົບທີ່ຢູ່ໃນການຄຸ້ມຄອງຂອງລັດໃຫ້ມີຄວາມເຂັ້ມແຂງ, ສາມາດປະຕິບັດບົດບາດນໍາສະເໜີ ການຕົກລົງບັນຫາສໍາຄັນຕ່າງໆ ຂອງລັດ ໄດ້ຮັບການສື່ສານຢ່າງເປັນລະບົບຕໍ່ເນື່ອງ, ຖືກຕ້ອງ, ວ່ອງໄວ ໄປເຖິງທຸກເປົ້າໝາຍໃນສັງຄົມ; ສ້າງສື່ໃຫ້ກາຍເປັນຊ່ອງທາງແຫ່ງການສະແດງຄວາມຄິດເຫັນທີ່ສ້າງສັນຂອງສັງຄົມຕໍ່ການບໍລິຫານຕ່າງໆ ຂອງລັດ;
ສືບຕໍ່ຍົກລະດັບຂ່າວສານ ໃຫ້ມີຄຸນນະພາບ ແລະ ທັນສະໄໝຕາມທິດທາງລວມຂອງການພັດທະນາ ສື່ມວນຊົນ ແລະ ການພິມຈໍາໜ່າຍ ກ້າວສູ່ຄຸນນະພາບຕາມລັກສະນະ ແລະ ຈັນຍາບັນວິຊາຊີບ, ເປັນກະບອກສຽງອັນແຫຼມຄົມຂອງພັກ-ລັດ ທັງລວງເລິກ ແລະ ລວງກວ້າງ, ເປັນ ເຄື່ອງມືຮັບໃຊ້ການຄຸ້ມຄອງ ແລະ ກວດກາລັດຕາມກົດໝາຍ.
