ການເລືຶອກຜົວເລືອກເມຍສະໄໝນີ້ ປານງົມເຂັມໃນມະຫາສະໝຸດ ໄດ້ຄົນດີກໍ່ໂຊກດີໄປບາງຄົນທຳອິດດີໆພໍໄດ້ຜົວໄດ້ເມຍພັດໄປຕິດໝູ່ພວກມັກມົ່ວສຸໃກໍ່ເສຍຜູ້ເສຍຄົນຍ້ອນ ບາງຄົນຕິເຮັດເປັນຄົນດີໃນເບື້ອງຕົ້ນພໍໄດ້ຢູ່ກິນເປັນຜົວເມຍແລ້ວອອກລາຍສ້າງຄວາມສຸກໃຫ້ໂຕເອງບົນຄວາມທຸກຄົນຄູ່ຄອງຄືກັບເຫດການທີ່ເອົາມານຳສະເໜີໃນຂ່າວນີ້.
ໃນວັນທີ 07 ສິງຫາ 2024ເວລາ ປະມານ 03:00 ໂມງ ໄດ້ເກີດເຫດຄາດຕະກຳຄົນໃນຄອບຄົວ ແລະ ຍິງຕົວຕາຍ ຢູ່ບ້ານຫຼັງຄັງ ເມືອງບົວລະພາ ແຂວງຄຳມ່ວນ ຈາກການແຕ່ງຕັ້ງກຳລັງວິຊາສະເພາະລົງສັນລະສູດສະຖານທີ່ເກີດເຫດຕົວຈິງ, ພົບເຫັນຜູ້ເສຍຊີວິດຈຳນວນ 04 ຄົນ ຍິງ 01 ຄົນ ແລະ ປືນ AK 1 ກະບອກ ທີ່ໃຊ້ກໍ່ເຫດ.
ຜ່ານການເກັບກຳຂໍ້ມູນ ຫຼັກຖານ ແລະ ເອົາຄຳໃຫ້ການຈາກພີ່ນ້ອງຜູ່ເສຍຊີວິດ ຈຶ່ງຮູ້ໄດ້ວ່າ ໜຶ່ງໃນຜູ່ເສຍຊີວິດ ຊື່ ທ້າວ ແກ້ວອຸດອນ ອາຍຸ 36 ປີເປັນຜູ້ກໍ່ເຫດ, ຜູ່ກ່ຽວໄດ້ສັງຫານນາງ ແພງຕາ ອາຍຸ 34 ປີ (ເມຍ), ທ້າວ ບຸນຊ່ອງ (ອ້າຍເມຍ)ອາຍຸ 36 ປີ ແລະ ທ້າວ ຄອນສະຫວັນ (ນ້ອງເມຍ) ອາຍຸ 20 ປີ, ນອນເສຍຊີວິດຢູ່ເຮືອນຂອງ ນາງ ແພງຕາ.
ສາຍເຫດ ແລະ ແຮງຈູງໃຈໃນການກໍ່ເຫດ ຄັ້ງນີ້ແມ່ນຍ້ອນ: ໃນຊ່ວງເດືອນ ທັນວາ 2023 ທ້າວ ແກ້ວອຸດອນ ແມ່ນໄດ້ມາພົວພັນມັກຮັກກັບ ນາງ ແພງຕາ ແບບບ່າວ – ສາວ ຈາກນັ້ນກໍ່ໄດ້ໃຫ້ພໍ່ – ແມ່, ຍາດພີ່ນ້ອງ ມາສູ່ຂໍ ນາງແພງຕາ ຕາມຮີດຄອງປະເພນີ ແລະ ໄດ້ຢູ່ຮ່ວມກັນຢູ່ບ້ານຫຼັງຄັງ ເມືອງບົວລະພາ ແຂວງຄຳມ່ວນ. ຕໍ່ມາວັນທີ 05 ສິງຫາ 2024 ນາງແພງຕາ ໄດ້ມາບອກ ນາງ ສີອຳພອນ ແລະ ນາງ ບຸນມາກ (ທັງສອງເປັນພີ່ນ້ອງກັບນາງແພງຕາ) ຢູ່ບ້ານດຽວກັນວ່າ ຢາກຢ່າຮ້າງກັບ ທ້າວ ແກ້ວອຸດອນ(ຜູ້ເປັນຜົວ) ດັ່ງນັ້ນຈຶ່ງມາຂໍໃຫ້ທັງສອງເຂົ້າຮ່ວມຮັບຟັງ ແລະ ເປັນສັກຂີພະຍານ ຢູ່ຫ້ອງການບ້ານ ພາຍຫຼັງການຈັດຕັ້ງບ້ານໄກ່ເກ່ຍໂດຍຊ່ອງໜ້າຍາດພີ່ນ້ອງ ສາເຫດຍ້ອນ ທ້າວ ແກ້ວອຸດອນ ເອົາເງິນໃນຄອບຄົວໄປໃຊ້ຈ່າຍສ່ວນຕົວໂດຍບໍ່ມີເຫດຜົນຈຳນວນຫຼາຍຄັ້ງໆ ແລະ ພົວພັນເສບຢາເສບຕິດ ຄັ້ງລ່າສຸດ ເປັນຈຳນວນເງິນ 12,000,000 ກີບ(ສີບສອງລ້ານກີບ) ໄປໃຊ້ຈ່າຍຈົນໝົດ ຈາກນັ້ນການຈັດຕັ້ງບ້ານຈຶ່ງໄດ້ສ້າງບົດບັນທຶກຢ່າຮ້າງໃຫ້ພວກກ່ຽວທັງ 2 ຂາດຈາກການເປັນຜົວ – ເມຍກັນ.
ດັ່ງນັ້ນ ທ້າວ ແກ້ວອຸດອນ ຈຶງເກີດຄວາມບໍ່ພໍໃຈ ຕໍ່ມາ ວັນທີ 06 ສິງຫາ 2024 ທ້າວ ແກ້ວອຸດອນ ຈຶ່ງໄດ້ກັບມາ ບ້ານ ນາບໍ່ ເມືອງຍົມມະລາດ ແຂວງຄຳມ່ວນ ແລ້ວລັກເອົາປືນ AK ຢູ່ໃນຫ້ອງນອນຂອງພໍ່ (ເຊິ່ງພໍ່ເປັນພະນັກງານບຳນານ) ເພື່ອຈະໄປຄາດຕະກຳນາງ ແພງຕາ ພໍມາຮອດຈຸດກໍ່ເຫດ ໃນຄະນະນັ້ນ ທ້າວ ບຸນຊ່ອງ(ອ້າຍເມຍ) ທີ່ຢູ່ເຮືອນໄກ້ຄຽງກັນ ໄດ້ຖືໄມ້ຄ້ອນ ເພື່ອຈະເຂົ້າໄປຫ້າມ. ເມື່ອທ້າວ ແກ້ວອຸດອນ ເຫັນ ຈຶ່ງຍິງທ້າວ ບຸນຊ່ວງ (ອ້າຍເມຍ) ຈຳນວນ 1 ລູກ ຖືກໜ້າເອິກຊອດອອກຫຼັງ ແລ້ວຍິງທ້າວ ຄອນສະຫວັນ(ນ້ອງເມຍທີ່ຢູ່ເຮືອນກັບນາງແພງຕາ) ຈຳນວນ 2 ລູກ ຖືກນົມເບື້ອງຂວາຊອດອອກບ່າໄລ່ ແລະ ຖືກຫົວຊອດອອກງ່ອນ, ຍິງ ນາງ ແພງຕາ (ຜູ້ເປັນເມຍ)ຈຳນວນ 1 ລູກ ຖືກນົມເບື້ອງຂວາຊອດອອກບ່າໄລ່ ທັງສາມຄົນແມ່ນເສຍຊີວິດຄາທີ່.
ພາຍຫຼັງກໍ່ເຫດເພື່ອໜີຄວາມຜິດ ທ້າວ ແກ້ວອຸດອນ ກໍ່ໄດ້ຍິງໂຕເອງຈຳນວນ 1 ລູກ ຖືກຄາງຊອດອອກງ່ອນເສຍຊີວິດຄາທີ່. ປະຈຸບັນທາງເຈົ້າໜ້າທີ່ຕຳຫຼວດຍັງດຳເນີນເກັບກຳຂໍ້ມູນເພີ່ມເຕີມໃນເຫດການດັ່ງກ່າວ.
ພາບ-ຂ່າວ: ປກສ ແຂວງຄຳມ່ວນ
