ເນື່ອງໃນໂອກາດສະເຫຼີມສະຫຼອງວັນສື່ມວນຊົນ-ການພິມຈຳໜ່າຍລາວ ຄົບຮອບ 74 ປີ (13 ສິງຫາ 1950-13 ສິງຫາ 2024) ດັ່ງນັ້ນກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມສຳມະນາວິທະຍາສາດ ການຕ້ານຂ່າວປອມ ໃນສື່ສັງຄົມອອນລາຍ ແລະ ບົດບາດຂອງສື່ທາງການໃນການຕ້ານກັບຂ່າວປອມ ຂຶ້ນ, ເຊິ່ງເປັນໜຶ່ງໃນກິດຈະກຳສະຫຼອງວັນດັ່ງກ່າວ.
ໂດຍການເປັນປະທານຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ, ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ, ພ້ອມມີບັນດາຕາງໜ້າຈາກພະແນກ ຖວທ, ຕາງໜ້າຈາກບັນດາສຳນັກຂ່າວ ແລະ ບັນດານັກຂ່າວ-ສື່ມວນຊົນເຂົ້າຮ່ວມ.
ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກ່າວບາງຕອນວ່າ: ກອງປະຊຸມສຳມະນາຄັ້ງນີ້ແມ່ນຈັດຂຶ້ນເພື່ອສ້າງຄວາມເຂົ້າໃຈກ່ຽວກັບຂ່າວປອມໃນສື່ສັງຄົມອອນລາຍ ແລະ ບົດບາດຂອງສື່ທາງການໃນການຕ້ານຂ່າວປອມ ໃຫ້ແກ່ບັນດາສື່ມວນຊົນລາວ. ເນື່ອງຈາກປະຈຸບັນສື່ສັງຄົມອອນລາຍແມ່ນມີບົດບາດ ຫຼື ອິດທິພົນຕໍ່ການບໍລິໂພກຂໍ້ມູນຂ່າວສານຂອງພໍ່ແມ່ປະຊາຊົນ, ທີ່ຄັດຕໍ່ລະບອບ, ສາມາດນຳໃຊ້ສື່ອອນລາຍໃນການທຳລາຍ ຫຼື ໃສ່ຮ້າຍປ້າຍສີພາກສ່ວນໃດໜຶ່ງ, ບຸກຄົນໃດໜຶ່ງ, ສ້າງຄວາມແຕກແຍກໃຫ້ແກ່ສັງຄົມ, ສ້າງຄວາມບໍ່ສະຫງົບແກ່ສັງຄົມ, ສ້າງຄວາມຢ້ານກົວຕໍ່ສັງຄົມ. ດັ່ງນັ້ນສື່ສັງຄົມອອນລາຍຈຶ່ງຖືກນຳມາເປັນເຄື່ອງມືເພື່ອສະໜອງຄວາມຕ້ອງການຂອງບຸກຄົນທີ່ສ້າງຂ່າວປອມຂຶ້ນ ເຊິ່ງໂດຍລວມແລ້ວອາດຈະເບິ່ງຄືກັບບໍ່ມີໄພ ແຕ່ບາງເນື້ອໃນ ຫຼື ບາງຂ່າວກໍໄພແອບແຝງເຊັ່ນດຽວກັນ.
ທ່ານກ່າວຕື່ມວ່າ: ເຊິ່ງການສຳມະນາມື້ນີ້ແມ່ນບັນດາສື່ມວນຊົນໄດ້ສ້າງຄວາມເຂົ້າໃຈກ່ຽວກັບຂ່າວປອມ, ຮູບແບບຂອງຂ່າວປອມ, ການຕອບໂຕ້ຂ່າວປອມ, ຜົນກະທົບຂອງຂ່າວປອມ, ວິທີປ້ອງກັນ, ການຕ້ານຂ່າວປອມໃນອອນລາຍ, ບົດບາດຂອງສື່ມວນຊົນທາງການໃນການຕ້ານກັບຂ່າວປອມ.
ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ກ່າວບາງຕອນວ່າ: ວິໄສທັດ ໃນຕໍ່ໜ້າຂອງວຽກງານສື່ມວນຊົນລາວ: ພັດທະນາສື່ມວນຊົນລາວໃຫ້ກ້າວສູ່ຄຸນນະພາບ, ທັນສະໄໝ, ວ່ອງໄວ, ຊັດເຈນ, ທັນເຫດການ, ທັນເວລາ ສາມາດເຂົ້າເຖິງໄດ້ທຸກພື້ນທີ່ທົ່ວປະເທດ; ມີຄວາມຫຼາກຫຼາຍ ຄົບຖ້ວນດ້ານເນື້ອໃນ, ເປັນແຫຼ່ງສະໜອງຂໍ້ມູນຂ່າວສານ ແລະ ໃຫ້ ສາລະຄວາມຮູ້ຢ່າງຮອບດ້ານໃຫ້ແກ່ພັກ-ລັດ ແລະ ປະຊາຊົນບັນດາເຜົ່າທຸກຊັ້ນຄົນ, ຊຸກຍູ້ສົ່ງເສີມສ້າງບຸກຄະລາກອນສື່ມວນຊົນ ທີ່ມີຄຸນທາດທາງດ້ານການເມືອງໜັກແໜ້ນ ແລະ ມີວຸດທິສື່ສານມວນຊົນທີ່ກ້າວໜ້າ ສົມຄູ່ກັບຍຸກສະໄໝ; ສ້າງຄວາມເຂັ້ມແຂງ ແລະ ຫັນໄປສູ່ກຸ້ມຕົນເອງໃນລະດັບທີ່ແນ່ນອນ; ສົ່ງເສີມການຮ່ວມມືລະຫວ່າງ ພາກລັດ ແລະ ພາກເອກະຊົນ, ການຮ່ວມມືກັບ ຕ່າງປະເທດ ໃນການສົ່ງເສີມການລົງທຶນໃນວຽກງານຖະແຫຼງຂ່າວໃຫ້ກວ້າງ, ຂະຫຍາຍຂອບເຂດການພົວພັນ, ເຊື່ອມໂຍງກັບເວທີສື່ມວນຊົນສາກົນໃຫ້ນັບມື້ນັບກວ້າງຂວາງ, ມີ ຄວາມໝັ້ນຄົງຍືນຍົງ.
ການພັດທະນາສື່ມວນຊົນໃຫ້ມີຄວາມຫຼາກຫຼາຍ ຄົບຖ້ວນດ້ານເນື້ອໃນ, ເປັນແຫຼ່ງສະ ໜອງຂໍ້ມູນຂ່າວສານ ແລະ ໃຫ້ສາລະຄວາມຮູ້ຢ່າງຮອບດ້ານໃຫ້ແກ່ພັກ-ລັດ ແລະ ປະຊາຊົນບັນດາເຜົ່າທຸກຊັ້ນຄົນ, ປັບປຸງເນື້ອໃນຂ່າວ ແລະ ຂະຫຍາຍຊ່ອງໂທລະພາບ, ວິທະຍຸ, ໜັງສືພິມ ໃຫ້ມີຄວາມ ຫຼາກຫຼາຍ, ວ່ອງໄວ ແລະ ທັນເຫດການ; ມີຫຼາຍຮູບ ຫຼາຍແບບ. ພ້ອມສ້າງຄວາມເຂັ້ມແຂງ ແລະ ຫັນໄປສູ່ກຸ້ມຕົນເອງໃນ ລະດັບທີແນ່ນອນ, ສ້າງເຄືອຄ່າຍສື່ມວນຊົນ, ພັດທະນາລາຍການວິທະຍຸ, ໂທລະພາບ,ສື່ສີ່ງພິມ ໃຫ້ມີຄວາມຫຼາກຫຼາຍເພື່ອດຶງດູດຄວາມສົນໃຈຂອງມວນຊົນທັງພາຍໃນ ແລະ ຕ່າງປະເທດ; ປັບປຸງ, ເປີດກວ້າງຕະຫຼາດສື່ມວນຊົນລາວໃຫ້ກວ້າງຂວາງ ໂດຍການ ພັດທະນາຜະລິດຕະພັນສື່ມວນຊົນໃຫ້ມີຄວາມຫຼາກຫຼາຍ, ທັນສະໄໝ; ສ້າງກິດຈະກໍາທາງດ້ານສື່ມວນຊົນໃຫ້ມີຄວາມຫຼາກຫຼາຍ ທັງພາຍໃນ ແລະ ຕ່າງປະເທດ ເພື່ອໂຄສະນາສື່ມວນຊົນລາວໃນເວທີສາກົນ.
