ເນື່ອງໃນໂອກາດວັນສື່ມວນຊົນ 13 ສິງຫາ ຄົບຮອບ 74 ປີ (13 ສິງຫາ 1950-13 ສິງຫາ 2024) ທ່ານ ສະຫວັນຄອນ ຣາຊະມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ, ທັງເປັນອະດີດ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮັບຜິດຊອບວຽກງານສື່ມວນຊົນ ໄດ້ໃຫ້ສຳພາດກ່ຽວກັບຄວາມເປັນມາ ແລະ ຄວາມສຳຄັນຂອງສື່ມວນຊົນຕໍ່ການພັດທະນາປະເທດຊາດ.
ທ່ານ ສະຫວັນຄອນ ຣາຊະມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ, ທັງເປັນອະດີດ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮັບຜິດຊອບວຽກງານສື່ມວນຊົນ ໄດ້ໃຫ້ສຳພາດບາງຕອນກ່າວວ່າ: ວັນທີ 13 ສິງຫາ ແມ່ນວັນທີ່ມີຄວາມສຳຄັນທາງປະຫວັດສາດທີ່ເປັນວັນສ້າງຕັ້ງແນວລາວອິດສະຫຼະ ທັງເປັນວັນສ້າງຕັ້ງວັນສື່ມວນຊົນລາວ ເຊິ່ງເມື່ອກ່ອນແມ່ນໜັງສືພິມປະຊາຊົນ ເປັນໜັງສືພິມຂອງພັກຂອງແນວລາວອິດສະຫຼະ, ເນື່ອງຈາກສື່ມວນຊົນ ແມ່ນມີຄວາມສຳຄັນໃນພາລະກິດຕໍ່ສູ້ກູ້ຊາດ ເພື່ອຮັບໃຊ້ໃນການໂຄສະນາແນວທາງປະຕິວັດ, ຈຸດປະສົງ, ອຸດົມການຂອງການປະຕິບັດ ເພື່ອໃຫ້ຄົນລາວບັນດາເຜົ່າໄດ້ຮັບຮູ້, ເຂົ້າໃຈ ແລະ ຕື່ນຕົວເຂົ້າຮັບໃຊ້ໃນພາລະກິດຮັບໃຊ້ປະເທດຊາດ. ສື່ມວນຊົນແມ່ນໄດ້ຕິດພັນສະໜິດແໜ້ນ, ທຸກບາດກ້າວ, ທຸກຂະບວນການຂອງການນຳພາຕໍ່ສູ້ປົດປ່ອຍປະເທດຊາດຂອງຜູ້ນຳປະຕິວັດໃນເມື່ອກ່ອນ. ເວລານັ້ນສື່ມວນຊົນ (ນັກຂ່າວ) ກໍມີບໍ່ຫຼາຍ, ເຄື່ອງມືກໍປະຖົມປະຖານທີ່ສຸດ, ຕໍ່ມາຈຶ່ງມີວິທະຍຸປະເທດລາວ. ເຊິ່ງໄລຍະຂ້າມຜ່ານກໍມີຕ່າງປະເທດເຂົ້າມາຮຸກຮານ ດັ່ງນັ້ນການທີ່ຈະເຮັດໃຫ້ປະເທດລາວໄດ້ຮັບການພັດທະນາຄືກັບປະເທດອື່ນແມ່ນມີຄວາມທ້າທາຍຫຼາຍ ແລະ ສື່ມວນຊົນກໍໄດ້ຄຽງບ່າຄຽງໄຫຼ່ກິ້ງເກືອກລີເລືອໃນສະໜາມຮົບເພື່ອເກັບພາບຖືວ່າເປັນບຸກຄົນທີ່ມີນ້ຳໃຈເຂັ້ມແຂງ ແລະ ເສຍສະຫຼະທັງຊີວິດໃນເວລານັ້ນ.
ຫຼັງຈາກປະເທດຊາດໄດ້ຮັບການປົດປ່ອຍພ້ອມສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ປະເທດຊາດເລີ່ມມີການພັດທະນາ ວຽກສື່ມວນຊົນກໍເລີ່ມມີການເຕີບໃຫຍ່ຂະຫຍາຍຕົວ ໂດຍມີສື່ໂທລະພາບທີ່ເປັນແບບຂາວ-ດຳ, ຕໍ່ມາກໍເປັນແບບສີ, ມີວາລະສານ, ໜັງສືພິມພາສາຕ່າງປະເທດ ຈົນເຖິງປັດຈຸບັນ ບັນດາອົງການຕ່າງໆກໍໄດ້ມີສື່ເປັນຂອງຕົນເອງ ຄຽງຄູ່ກັນນີ້ກໍໄດ້ມີສື່ໃໝ່ເກີດຂຶ້ນຜ່ານອິນເຕີເນັດ ຫຼື ເຮົາເອີ້ນວ່າ: ສື່ສັງຄົມອອນລາຍ ເຊິ່ງປັດຈຸບັນກໍມີຫຼາຍແພລັດຟອມ ຫຼື ຫຼາຍຊ່ອງທາງໃນການເຜີຍແຜ່ຂໍ້ມູນຂ່າວສານ.
ການກຳເນີດມີສື່ສັງຄົມອອນລາຍ ມີທັງຂໍ້ດີ ແລະ ສິ່ງທ້າທາຍ ເຊິ່ງຂໍ້ດີແມ່ນສາມາດຮັບຮູ້ຂ່າວສານວ່າມີຫຍັງເກີດຂຶ້ນຢູ່ທັງພາຍໃນ ແລະ ຕ່າງປະເທດທົ່ວໂລກໄດ້ຢ່າງວ່ອງໄວ ພ້ອມກັນນີ້ກໍສາມາດເຜີຍແຜ່ຂໍ້ມູນຂ່າວສານຢູ່ພາຍໃນປະເທດອອກໄປໃຫ້ບັນດາປະເທດໃນທົ່ວໂລກໄດ້ຮັບຮູ້ຢ່າງວ່ອງໄວ, ສາມາດແລກປ່ຽນຂໍ້ມູນຂ່າວສານຮ່ວມກັນໄດ້ອີກດ້ວຍ. ແຕ່ຄຽງຄູ່ ກັນນີ້ມັນກໍເປັນສິ່ງທ້າທາຍຫຼາຍດ້ານ ເພາະທຸກຄົນສາມາດເຜີຍແຜ່ຂໍ້ມູນໄດ້ ໂດຍທີ່ບໍ່ແມ່ນສື່ມວນຊົນ ຫຼື ຂໍ້ມູນອາດຈະບໍ່ຄົບຖ້ວນ ຫຼື ບໍ່ຖືກຕ້ອງ. ດັ່ງນັ້ນສື່ມວນຊົນລາວຕ້ອງໄດ້ເອົາໃຈໃສ່ພັດທະນາຕົນເອງໃນການນຳໃຊ້ສື່ຕ່າງໆ, ພ້ອມຮັບມືຕອບໂຕ້ ຫຼື ຊີ້ແຈງຕໍ່ຂ່າວ ທີ່ບໍ່ແມ່ນຄວາມຈິງ ຫຼື ເປັນຂ່າວທີ່ບິດເບືອນຄວາມຈິງ, ໃສ່ຮ້າຍປ້າຍສີ ຫຼື ໂຈມຕີຕໍ່ແນວທາງນະໂຍບາຍຂອງພັກ ແລະ ລັດຖະບານ ຢ່າງວ່ອງໄວ ແລະ ແໝ້ນຢໍາ.
ເນື່ອງໃນໂອກາດວັນສື່ມວນຊົນ 13 ສິງຫາ ຄົບຮອບ 74 ປີ (13 ສິງຫາ 1950-13 ສິງຫາ 2024) ກໍຝາກເຖິງບັນດາສື່ມວນຊົນລາວເຮົາໃຫ້ມີຄວາມອົດທົນ, ເຮັດໜ້າທີ່ໃຫ້ສຳເລັດໂດຍມີຄຸນນະພາບ, ມາດຕະຖານ, ມີການຍົກລະດັບຄວາມຮູ້ຄວາມສາມາດຂອງຕົນເອງໃຫ້ທັນ, ການຮຽນຮູ້ພາສາຕ່າງປະເທດ ແລະ ຮູ້ໃຊ້ລະບົບທັນສະໄໝເຂົ້າໃນວຽກງານສື່, ກຳໄດ້ນະໂຍບາຍ, ລະບຽບແນວທາງ ໂດຍສະເພາະກົດໝາຍສື່ມວນຊົນ (ດ້ານຄວາມປອດໄພທາງດ້ານຂໍ້ມູນຂ່າວສານ ຫຼື ລະບຽບການໃນການນຳໃຊ້ເຕັກໂນໂລຊີ) ຕ້ອງກຳໃຫ້ແໜ້ນ. ພ້ອມກັນຊົມເຊີຍບັນດາສື່ມວນຊົນທັງໝົດທັງສູນກາງຮອດທ້ອງຖິ່ນທີ່ເອົາໃຈໃສ່ໃນການປະຕິບັດວຽກງານຈົນມີຜົນສຳເລັດຕາມທີ່ໄດ້ຮັບມອບໝາຍ. ໃນນາມປະທານສະມາຄົມນັກຂ່າວ ຂໍສະແດງຄວາມຮູ້ບຸນຄຸນຕໍ່ການນຳພັກ-ລັດທຸກຂັ້ນ ທີ່ຍາມໃດກໍໃຫ້ຄວາມສຳຄັນ ແລະ ບຸລິມະສິດແກ່ວຽກງານສື່ມວນຊົນ ເຊິ່ງສະແດງອອກໃນຜົນສຳເລັດເປັນກ້າວໆ ຄຽງຄູ່ກັບຜົນສຳເລັດດ້ານຕ່າງໆຂອງປະເທດຊາດ ພາຍໃຕ້ການນຳພາຂອງພັກ, ການຄຸ້ມຄອງຂອງລັດ ແລະ ຄວາມເປັນເຈົ້າຂອງປະຊາຊົນບັນດາເຜົ່າ.
