ໃນວັນທີ 31 ກໍລະກົດ 2024 ໄດ້ຈັດພິທີສັນຍາຮ່ວມຮຸ້ນ ສ້າງຕັ້ງບໍລິສັດ ລາວພັດທະນາອຸດສາຫະກຳ ແລະ ກະສິກໍາ ຄົບວົງຈອນ ຈໍາກັດ ລະຫວ່າງ ລັດຖະບານ ແຫ່ງ ສປປ ລາວ ຕາງໜ້າໂດຍກະຊວງການເງິນ ຮ່ວມກັບ ບໍລິສັດ ລາວເຢວ ມັດສເຕີເນເຊີນແນວ ຈໍາກັດຜູ້ດຽວ.
ໂອກາດດັ່ງກ່າວ, ທ່ານ ໄພທູນ ທ່ຽງລະໄມ ວ່າການແທນຫົວໜ້າກົມ ປະຕິຮູບລັດວິສາຫະກິດ ແລະ ການປະກັນໄພ ໃຫ້ເຫັນໄດ້ຄວາມເປັນມາໃນການຄົ້ນຄວ້າສ້າງຕັ້ງບໍລິສັດ ໂດຍທ່ານໃຫ້ຮູ້ວ່າ: ຈຸດປະສົງໃນການສ້າງຕັ້ງວິສາຫະກິດປະສົມຮ່ວມ ລະຫວ່າງ ລັດຖະບານ ແຫ່ງ ສປປ ລາວ (ຕາງໜ້າໂດຍກະຊວງການເງິນ) ກັບ ບໍລິສັດ YIELD MASTER INERNATIONAL LIMITED ແມ່ນເພື່ອຜັນຂະຫຍາຍເສດຖະກິດ-ສັງຄົມ ແຫ່ງຊາດ ໃຫ້ມີປະສິດທິຜົນ ໃນຂົງເຂດວຽກງານການຜະລິດສິນຄ້າກະສິກຳ ແລະ ຖືເອົາເປັນພື້ນຖານເສດຖະກິດປາຍແຫຼມຂອງປະເທດຊາດ ລວມທັງການຄຸ້ມຄອງ, ການປົກປັກຮັກສາກິດຈະການ ແລະ ຜະລິດຕະພັນກະສິກຳ ຮັບປະກັນການສະໜອງສະບຽງອາຫານ ແລະ ການຜະລິດເປັນສິນຄ້າ, ສ້າງເງື່ອນໄຂໃຫ້ແກ່ການກໍ່ສ້າງ ແລະ ຂະຫຍາຍອຸດສາຫະກຳປຸງແຕ່ງກະສິກຳ ເຮັດໃຫ້ເສດຖະກິດຂອງຊາດ ມີການຂະຫຍາຍຕົວຢ່າງຕໍ່ເນື່ອງ ແລະ ມີສະຖຽນລະພາບເປັນກ້າວໆ, ປະຊາຊົນມີວຽກເຮັດງານທໍາ, ມີຊີວິດການເປັນຢູ່ທີ່ດີຂື້ນ, ປະເທດຊາດ ມີຄວາມເຂັ້ມແຂງ. ເປົ້າໝາຍຫຼັກໃນການຮ່ວມລົງທຶນໃນຄັ້ງນີ້ ແມ່ນເພື່ອດຳເນີນທຸລະກິດການນໍາເຂົ້າ-ສົ່ງອອກ ໂດຍສະເພາະແມ່ນໂຄຕ້າການນໍາເຂົ້າລູກອ່ຽນເອີຣົບ (ໂອນິ) ຈາກປະເທດຝຣັ່ງ ເຂົ້າມາ ສປປ ລາວ ເພື່ອລ້ຽງ ແລະ ຜະລິດເປັນສິນຄ້າສົ່ງອອກ ໂດຍການສ້າງໂຮງງານທີ່ທັນສະໄໝ ເພື່ອແປຮູບເປັນສິນຄ້າສະໜອງພາຍໃນ ແລະ ສົ່ງອອກຕ່າງປະເທດ ເປັນຕົ້ນແມ່ນ: ສປ ຈີນ, ສິງກະໂປ, ຍີ່ປຸ່ນ, ມາເລເຊຍ, ສ.ເກົາຫຼີ, ທະວີບເອີຣົບ ແລະ ປະເທດອື່ນໆ ຕາມຄວາມຕ້ອງການ.
ພາຍຫຼັງຄະນະດັ່ງກ່າວ ໄດ້ສໍາເລັດການຄົ້ນຄວ້າ, ເຈລະຈາຮ່າງສັນຍາຮ່ວມຮຸ້ນ ກະຊວງການເງິນ ສັງລວມລາຍງານ ຫສນຍ ແລະ ຫສນຍ ຈິ່ງໄດ້ມີແຈ້ງການ ສະບັບເລກທີ 1399/ຫສນຍ, ລົງວັນທີ 19 ກໍລະກົດ 2024 ໂດຍເຫັນດີຕາມການສະເໜີຂອງກະຊວງການເງິນຄື: ເຫັນດີອະນຸມັດໃຫ້ກະຊວງການເງິນ ຕາງໜ້າລັດຖະບານ ເຊັນສັນຍາຮ່ວມຮຸ້ນ ເພື່ອສ້າງຕັ້ງບໍລິສັດ ລາວພັດທະນາອຸດສາຫະກຳ ແລະ ກະສິກຳ ຄົບວົງຈອນ ຈໍາກັດ, ເຊິ່ງລັດຖະບານ ຕາງໜ້າໂດຍກະຊວງການເງິນຖືຮຸ້ນ 20% (ຮຸ້ນບໍ່ໄດ້ປະກອບທຶນ) ແລະ ບໍລິສັດ ລາວເຢວ ມັດສເຕີເນເຊີນແນວ ຈໍາກັດຜູ້ດຽວ ຖືຮຸ້ນ 80% (ເປັນຜູ້ລົງທຶນທັງໝົດ 100%) ໂດຍມີທຶນທັງໝົດ 1 ຕື້ ໂດລາ ສຫລ ແລະ ກະຊວງການເງິນ ໄດ້ມອບສິດ ໃຫ້ກົມປະຕິຮູບລັດວິສາຫະກິດ ແລະ ການປະກັນໄພ ລົງນາມເຊັນສັນຍາຮ່ວມຮຸ້ນ ເພື່ອສ້າງຕັ້ງບໍລິສັດ ລາວພັດທະນາອຸດສາຫະກໍາ ແລະ ກະສິກໍາ ຈໍາກັດ.
ການຮ່ວມທຶນໃນຄັ້ງນີ້ເຫັນວ່າມີຄວາມສໍາຄັນຫຼາຍ ຕໍ່ການພັດທະນາຂະແໜງກະສິກຳ ເພື່ອຜະລິດເປັນສິນຄ້າສະໜອງພາຍໃນ ແລະ ສົ່ງອອກຕ່າງປະເທດ. ສະນັ້ນ, ພາຍຫຼັງທີ່ສຳເລັດການເຊັນສັນຍາໃນຄັ້ງນີ້ ຫວັງວ່າທຸກພາກສ່ວນຈົ່ງຊຸກຍູ້-ສົ່ງເສີມ, ໃຫ້ການຮ່ວມມື ແລະ ຕິດຕາມການດຳເນີນງານຂອງບໍລິສັດຮ່ວມທຶນໃນຄັ້ງນີ້ ໃຫ້ບັນລຸໄປຕາມຈຸດປະສົງ ແລະ ເປົ້າໝາຍທີ່ວາງໄວ້.
ລົງນາມລະຫວ່າງທ່ານ ໄພທູນ ທ່ຽງລະໄມ ວ່າການແທນຫົວໜ້າກົມ ປະຕິຮູບລັດວິສາຫະກິດ ແລະ ການປະກັນໄພ ກັບະ ທ່ານ ເສິນ ຈີນສານ ປະທານບໍລິສັດ ລາວ ເຢວມາສເຕີ້ ອິນເຕີເນເຊິນແນລ ຈໍາກັດຜູ້ດຽວ. ໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ພູວົງ ກິດຕະວົງ ຮອງລັດຖະມົນຕີ ກະຊວງການເງິນ, ທ່ານ ສີປະໄພ ໄຊສົງຄາມ ຫົວໜ້າຫ້ອງການກະຊວງກະສິກໍາ ແລະ ປ່າໄມ້, ທ່ານ ສົມຈິດ ຄໍາມຸງຄຸນ ວ່າການຫົວໜ້າຫ້ອງການກະຊວງການເງິນ, ທ່ານ ນາງ ໄຊ້ ປິງ ປິງ ປະທານບໍລິສັດ ລາວ ເຢວມາສເຕີ້ ອິນເຕີເນເຊິນແນລ ຈໍາກັດຜູ້ດຽວ ພ້ອມດ້ວຍແຂກທີ່ຖືກເຊີນເຂົ້າຮ່ວມ.
ທີ່ມາ: ກະຊວງການເງິນ
