ໝາຍເລກ M18 ນາງສາວ ນັດວິພາ ພົມມະຈັນ ຕົວແທນແຂວງວຽງຈັນ ມາໃນເຜົ່າລາວລຸ່ມ ສາມາດພິຊິດມົງກຸດນາງສາວບັນດາເຜົ່າ ( Miss Ethnic Laos ) ປະຈໍາປີ 2024 ໄປຄອງ ເມື່ອທ້າຍອາທິດທີ່ຜ່ານມາ ທີ່ໂຮງແຮມລາດຊະວົງ ເຊິ່ງນ້ອງເປັນຕົວແທນແຂວງວຽງຈັນ ມາໃນຊຸດເຜົ່າລາວລຸ່ມ ສາມາດເອົາຊະນະສາວງາມທັງໝົດ 50 ນ້ອງໃນເວທີນີ້ໄດ້ສໍາເລັດ.
ເວທີປະກວດ ນາງສາວບັນດາເປົ່າ ແມ່ນໄດ້ເປີດໂອກາດໃຫ້ກັບ 50 ຊົນເຜົ່າໃນລາວເຮົາໄດ້ສະແດງສັກກະຍາພາບຂອງຕົນ ແລະ ສົ່ງເສີມ ເຜີຍແຜ່ວັດທະນາທໍາ ບັນດາເຜົ່າອີກດ້ວຍ ເຊິ່ງກ່ອນໜ້ານີ້ກໍໄດ້ມີການປະກາດ 50 ນາງສາວຕົວແທນ 50 ຊົນເຜົ່າລາວ ເຂົ້າຮ່ວມປະກອບ.
ໂດຍຮອບສຸດທ້າຍຈັດຂຶ້ນໃນວັນທີ 3 ສິງຫາ 2024 ທີ່ໂຮງແຮມລາດຊະວົງ ປາກົດວ່າ: ເປັນ ໝາຍເລກ M18 ນາງສາວ ນັດວິພາ ພົມມະຈັນ ຕົວແທນແຂວງວຽງຈັນ ມາໃນເຜົ່າລາວລຸ່ມ ຄວ້າຕໍາແໜ່ງໄປຄອງ ພ້ອມກັບມົງກຸດ ແລະ ເງິນລາງວັນ 50 ລ້ານກີບ, ສ່ວນຮອງຊະນະເລີດອັນດັບ 1 ເປັນຂອງ ນາງ ປຸກກີ່ ລີ ຈາກແຂວງຊຽງຂວາງ ມາໃນຊຸດເຜົ່າມົ້ງ ແລະ ຮອງຊະນະເລີດອັນດັບ 2 ນາງ ຄໍາຫຼ້າ ກວ້ານຄໍາຈັນ ຈາກແຂວງຫຼວງນໍ້າທາ ມາໃນຊຸດເຜົ່າກຶມມຸ.
M18 ນັດວິພາ ໃຫ້ສໍາພາດວ່າ: ຮູ້ສຶືກດີໃຈຫຼາຍທີ່ສຸດ ເພາະນີ້ເປັນເວທີທໍາອິດທີ່ນ້ອງລົງປະກວດ, ເພື່ອຢາກຫາຄວາມທ້າທາຍໃໝ່ ແລະ ກໍສາມາດຍາດໄດ້ມົງກຸດອັນຊົງກຽດໄປຄອງ ຕ້ອງຂໍຂອບໃຈ ຝ່າຍຈັດງານທີ່ເປີດໂອກາດໃຫ້ທຸກຄົນໄດ້ເຂົ້າມາປະກວດ, ໄດ້ມາແຜ່ເຜີຍຊົນເຜົ່າຂອງຕົວເອງຂອງແຕ່ລະຊົນເຜົ່າລາວຜ່ານເວທີນີ້ ແລະ ຂໍຂອບໃຈທີມງານເອື້ອຍລ້ຽງ, ພໍ່ແມ່ພີ່ນ້ອງ ແລະ ແຟນໆທີ່ຊ່ວຍເຫຼືອທຸກຢ່າງທີ່ຊ່ວຍໄດ້ ຈົນເຮັດໃຫ້ນ້ອງໄດ້ພິຊິດມົງກຸດອັນທີ່ມີຄຸນຄ່ານີ້.
ຂ່າວ: Larh Creators; ຮູບຈາກ: Miss Ethnic Laos
