ຫອມຊີ ຫຼື ຜັກຊີ ເປັນພືດລົ້ມລຸກຕະກູນດຽວກັນກັບຫອມປ້ອມ (ແຕ່ໃບຈະແຫຼມໆນ້ອຍໆຫຼາຍໃບ ແລະ ເປັນໃບລ້ຽງດ່ຽວ) ເຊິ່ງມີ ຄວາມສູງປະມານ 10-20 ຊັງຕີແມັດແມ່ນພໍດີງາມ ແລະ ເໝາະແກ່ການກິນ ແຕ່ຖ້າປະໃຫ້ສູງກໍຈະສູງປະມານ 40-60 ຊັງຕີແມັດ, ມີປ້ອງໆແບບຊັດເຈນ ແລະ ຈະອອກດອກສີເຫຼືອງ ແລະ ໝາກຈະເປັນເມັດນ້ອຍໆ, ແຫຼມໆ ກິ່ນຫອມທີ່ເປັນເອກະລັກ, ຄົນລາວເຮົານິຍົມເອົາມາໃຊ້ປະກອບໃນການປຸງແຕ່ງອາຫານຄາວ ຫຼື ເອົາມາເປັນຜັກກັບແກ້ມກໍໄດ້.
ດັ່ງນັ້ນມື້ນີ້ຄໍລຳກະສິກຳ ພວກເຮົາຈະມາແນະນຳວິທີປູກຜັກຊີ ແບບງ່າຍໆມານຳສະເໜີ, ສາມາດປູກໄວ້ກິນພາຍໃນຄອບຄົວ ຫຼື ຈະປູກເປັນສິນຄ້າກໍໄດ້. ສາມາດປູກໄດ້ກັບຫຼາຍສະພາບດິນ, ສາມາດປູກເປັນໜານ ຫຼື ປູກໃນຖັງກໍໄດ້.
▶ກະກຽມດິນ: ຂຸດ ຫຼື ໄຖ, ຕີດິນໃຫ້ລະອຽດແລ້ວແປງເປັນໜານ (ຈະປູກໃສ່ຄຸ ແລະ ຖັງ ແມ່ນໃຫ້ໃສ່ດິນປະສົມຝຸ່ນຄອກ ແລະ ຂີ້ແກບ ສາມາດໃຊ້ໄດ້ທັງແກບຈູດ ແລະ ແກບທຳມະດາ) ຈາກນັ້ນໃຫ້ນຳແກ່ນແນວພັນຜັກຊີ ໄປຫໍ່ຜ້າແລ້ວນຳໄປແຊ່ນ້ຳໄວ້ປະມານ 3 ມື້ 2 ຄືນ ກໍເອົາໄປຫວ່ານລົງໜານທີ່ກຽມໄວ້ ແລ້ວເອົາດິນປົກໄວ້ເລັກໜ້ອຍ, ພ້ອມເອົາເຟືອງປົກໜ້າໜານໄວ້ແບບບາງ ຈາກນັ້ນກໍຫົດນໍ້າປົກກະຕິເຊົ້າ-ແລງ.
ຈາກນັ້ນໜຶ່ງເດືອນເຄິ່ງ (50-60 ມື້) ຕົ້ນຜັກຊີ ກໍຈະສູງປະມານ 10-20 ຊັງຕີແມັດ ກໍສາມາດເກັບກ່ຽວໄປຂາຍ ຫຼື ກິນໄດ້. ແຕ່ຖ້າຈະປະເອົາແນວພັນມັນກໍຈົ່ງໄວ້ສ່ວນໃດໜຶ່ງ ຫຼື ໜານໃດໜຶ່ງ ປະໄວ້ຫົດນໍ້າບາມື້ຫົດ ຫຼື ອາທິດລະ 1-2 ຄັ້ງກໍໄດ້ ປະຈົນຕົ້ນຜັກຊີອອກດອກ ຕໍ່ໄປກໍອອກໝາກ ຫຼື ຄົນລາວເຮົາມັກເອີ້ນວ່າ: ແກ່ນ ຖ້າແກ່ນມັນຕື່ງແລ້ວກໍເຊົາຫົດນໍ້າປະໃຫ້ໝາກມັນແກ່ເຕັມທີ ກໍຈະມີສີນໍ້າຕານ ຈາກນັ້ນກໍເກັບກ່ຽວມາຕາກແລ້ວຫູດເອົາແກ່ນເກັບໄວ້ເພື່ອຈະປູກໃນຄັ້ງຕໍ່ໄປ.
