ມາເລເຊຍ ໄດ້ຍື່ນໃບຄຳຮ້ອງຂໍເຂົ້າຮ່ວມກຸ່ມບັນດາພື້ນຖານເສດຖະກິດຫາກໍພົ້ນເດັ່ນແຖວໜ້າໂລກ ຫຼື BRICS.
ວັນທີ 28 ກໍລະກົດ, ສຳນັກຂ່າວສານ Bernama ຂອງ ມາເລເຊຍ ໄດ້ຄັດຄຳສະເໜີຂອງທ່ານນາຍົກລັດຖະມົນຕີ ອັນວາ ອິບຣາຮິມ ໃຫ້ຮູ້ວ່າ: ມາເລເຊຍ ໄດ້ຍື່ນໃບຄຳຮ້ອງຂໍເຂົ້າຮ່ວມກຸ່ມບັນດາພື້ນຖານເສດຖະກິດຫາກໍພົ້ນເດັ່ນແຖວໜ້າໂລກ (BRICS) ເຖິງຣັດເຊຍ ເຊິ່ງເປັນປະເທດປະທານໝູນວຽນຂອງ BRICS. ໃນໃບຄຳຮ້ອງ ມາເລເຊຍ ໄດ້ສະແດງຄວາມພ້ອມເຂົ້າຮ່ວມກຸ່ມ ດ້ວຍຖານະເປັນປະເທດສະມາຊິກ ຫຼື ຄູ່ຮ່ວມມືຍຸດທະສາດ.
ໃນວັນດຽວກັນ, ກະຊວງການຕ່າງປະເທດມາເລເຊຍ ໄດ້ອອກຖະແຫຼງການໂດຍໃຫ້ຮູ້ວ່າ ຣັດເຊຍ ໄດ້ໃຫ້ຄຳໝັ້ນສັນຍາສະໜັບສະໜູນ ມາເລເຊຍ ເຂົ້າຮ່ວມກຸ່ມນີ້. ຕາມຖະແຫຼງການແລ້ວ, ຄຳໝັ້ນສັນຍາດັ່ງກ່າວ ໂດຍທ່ານລັດຖະມົນຕີການຕ່າງປະເທດ ຣັດເຊຍ ເຊີເກ ຣາຟລອບ ຝາກເຖິງທ່ານນາຍົກລັດຖະມົນຕີ ມາເລເຊຍ ອັນວາ ອິບຣາຮິມ ທີ່ການພົບປະກັນໃນການຢ້ຽມຢາມ ອາຊີຕາເວັນອອກສ່ຽງໃຕ້ໃນລະຫວ່າງວັນທີ 27 – 28 ກໍລະກົດ ຂອງທ່ານ ເຊີເກ ຣາຟລອບ.
ທ່ານນາຍົກລັດຖະມົນຕີ ມາເລເຊຍ ກັບ ທ່ານລັດຖະມົນຕີການຕ່າງປະເທດ ຣັດເຊຍ ໄດ້ປຶກສາຫາລືກ່ຽວກັບສາຍພົວພັນສອງຝ່າຍໃນໄລຍະຍາວລະຫວ່າງສອງປະເທດ.
