ສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ(ອຄ) ຈັດກອງປະຊຸມກະກຽມສ້າງແຜນພັດທະນາ ແລະ ແຜນດໍາເນີນງານຂອງ ສູນນະວະຕະກໍາສໍາລັບ ສະຕາດອັບ ແລະ ຈນກ ເຊິ່ງເປັນໜຶ່ງໃນກິດຈະກຳຫຼັກ ພາຍໃຕ້ ໂຄງການພັດທະນາຊັບພະຍາກອນມະນຸດດ້ານນະວັດຕະກຳທາງດ້ານດິຈິຕອນ ສຳລັບ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ຢູ່ ສປປ ລາວ ຂຶ້ນໃນວັນທີ 5 ສິງຫາ 2024 ທີ່ໂຮງແຮມລາວພາຊ້າ ເປັນປະທານຂອງທ່ານ ທ່ານ ປອ ບຸນເພັງ ສີບຸນເຮືອງ ຫົວໜ້າສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ທ່ານ ນາງ Myunjin Kim ຫົວໜ້າອົງການ KOICA ປະຈຳ ສປປ ລາວ. ພ້ອມດ້ວຍຄະນະຊ່ຽວຊານໂຄງການ, ຜູ່ຕາງໜ້າຈາກພາກລັດ ແລະ ພາກທຸລະກິດ ເຂົ້າຮ່ວມ.
ທ່ານ ປອ ບຸນເພັງ ສີບຸນເຮືອງ ກ່າວວ່າ: ກອງປະຊຸມກະກຽມສ້າງແຜນພັດທະນາ ແລະ ແຜນດໍາເນີນງານຂອງ ສູນນະວະຕະກໍາສໍາລັບ ສະຕາດອັບ ແລະ ຈນກ ເປັນໜຶ່ງໃນກິດຈະກຳຫຼັກ ພາຍໃຕ້ ໂຄງການພັດທະນາຊັບພະຍາກອນມະນຸດດ້ານນະວັດຕະກຳທາງດ້ານດິຈິຕອນ ສຳລັບ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ຢູ່ ສປປ ລາວ (THE PROJECT FOR HUMAN RESOURCE DEVELOPMENT FOR DIGITAL INNOVATION MSME IN LAO PDR) ພາຍໃຕ້ການສະ ໜັບສະໜູນຂອງ ອົງການຮ່ວມມືສາກົນ ສ.ເກົາຫຼີ ຫຼື KOICA, ມູນຄ່າ 5 ລ້ານໂດລາສະຫະລັດ.
ໂຄງການດັ່ງກ່າວນັ້ນ ໄດ້ເຊັນບົດບັນທຶກການຮ່ວມມື (Record of Discussion-RD) ໃນວັນທີ 20 ທັນວາ 2022 ລະຫວ່າງ ກະຊວງ ອຄ ແລະ ອົງການ KOICA. ສຳລັບການຈັດຕັ້ງປະຕິບັດ ແມ່ນຕິດພັນກັບສອງພາກສ່ວນຂອງ ກະຊວງ ອຄ ຄື: ສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ສຈນກ) ແລະ ສະຖາບັນອຸດສາຫະກຳ ແລະ ການຄ້າ (ສອຄ).
ຈຸດປະສົງຂອງໂຄງການ ແມ່ນເພື່ອສ້າງຄວາມເຂັ້ມແຂງໃນການແຂ່ງຂັນດ້ານທຸລະກິດໃຫ້ແກ່ ສະຕາດອັບ ແລະ ຈນກ ໄປຄຽງຄູ່ກັບການພັດທະນາຊັບພະຍາກອນມະນຸດ ເຊິ່ງປະກອບມີ 2 ແຜນງານ ດັ່ງນີ້:
ແຜນງານທີ 1 – ສຈນກ: 1) ການສ້າງຕັ້ງສູນນະວັດຕະກໍາສໍາລັບສະຕາດອັບ ແລະ ຈນກ, 2) ພັດທະນາແຜນແມ່ບົດ ແລະ ແຜນດຳເນີນງານຂອງ ສູນນະວັດຕະກຳສຳລັບສະຕາດອັບ ແລະ ຈນກ, 3) ສ້າງຄວາມເຂັ້ມ ແຂງດ້ານວຽກງານນະວັດຕະກຳທາງດ້ານດິຈີຕອນສຳລັບສະຕາດອັບ ແລະ ຈນກ ໃຫ້ແກ່ພະນັກງານລັດ ແລະ 4) ສະໜັບສະໜູນການໃຫ້ຄໍາປຶກສາຢູ່ທີ່ ສູນນະວັດຕະກໍາສໍາລັບສະຕາດອັບ ແລະ ຈນກ;
ແຜນງານທີ 2 – ວິທະຍາໄລການຄ້າ: 1) ການສ້າງ 2 ຫຼັກສູດການຮຽນ-ການສອນໃໝ່ ຄື: ຫຼັກສູດນະວັດ ຕະກຳທາງດ້ານດິຈິຕອນສຳລັບ ຈນກ ແລະ ສະຕາດອັບ ແລະ ການດຳເນີນທຸລະກິດທາງເອເລັກໂຕນິກ, 2) ສ້າງຄວາມເຂັ້ມແຂງດ້ານວຽກງານນະວັດຕະກຳດິຈີຕອນ, ສະຕາດອັບ ແລະ ຈນກ ໃຫ້ແກ່ອາຈານ, 3) ປັບປຸງການສຶກສາດ້ານນະວັດຕະກໍາດິຈິຕອນ ແລະ ສະພາບແວດລ້ອມທີ່ເອື້ອອໍານວຍສໍາລັບການຝຶກອົບຮົມ ຫຼື ພາກປະຕິບັດໂຕຈິງ ແລະ 4) ສ້າງຄວາມອາດສາມາດດ້ານອຸດສາຫະກໍາໃຫ້ແກ່ນັກສຶກສາ ລວມໄປເຖິງການຮ່ວມມືລະຫວ່າງ ລັດຖະບານ, ສະຖາບັນສຶກສາ ແລະ ຂະແໜງການອຸດສາຫະກຳ.
ປະຈຸບັນ ຄະນະ ສຈນກ ໄດ້ຮ່ວມເຮັດວຽກຢ່າງຂຸ້ນຂ້ຽວຮ່ວມກັບ ຄະນະຊ່ຽວຊານ ຈາກ ມະຫາວິທະຍາໄລກຸກມິນ (Kookmin University: KMU) ໄດ້ເດີນທາງມາເຮັດວຽກຢູ່ ສປປ ລາວ ຈໍານວນ 5 ຄັ້ງ ເພື່ອກະກຽມ ສ້າງແຜນພັດທະນາ ແລະ ແຜນດໍາເນີນງານຂອງ ສູນນະວະຕະກໍາສໍາລັບ ສະຕາດອັບ ແລະ ຈນກ ຫຼື MSIC (MSMEs and Startup Innovation Center) ຢູ່ ຊັ້ນ 5 ຂອງ ຕຶກ ສຈນກ ເຊິ່ງມີເປົ້າໝາຍ ເພື່ອໃຫ້ສາມາດເປີດນຳໃຊ້ໄດ້ ພາຍໃນປີ 2025.
ທ່ານກ່າວວ່າ: ໃນກອງປະຊູມຄັ້ງນີ້ ຈິ່ງຖືເປັນໂອກາດອັນດີທີ່ຈະໄດ້ນໍາສະເໜີຄວາມເປັນມາຂອງ ໂຄງການ ພັດທະນາຊັບພະຍາກອນມະນຸດດ້ານນະວັດຕະກຳທາງດ້ານດິຈິຕອນ ສຳລັບ ຈນກ ຢູ່ ສປປ ລາວ ໂດຍສະເພາະ ຈຸດປະ ສົງ ແລະ ເປົ້າໝາຍຂອງ ສູນນະວະຕະກຳສຳລັບສະຕາດອັບ ແລະ ຈນກ ເພື່ອຈະໄດ້ຮ່ວມກັນປຶກສາຫາລື ແລະ ໃຫ້ບັນ ດາທ່ານປະກອບຄຳຄິດຄຳເຫັນ ເພື່ອໃຫ້ຄະນະຈັດຕັ້ງປະຕິບັດ ໄດ້ນຳເອົາໄປປັບປຸງ ການສ້າງແຜນພັດທະນາ ແລະ ແຜນ ດໍາເນີນງານຂອງ ສູນນະວະຕະກໍາສໍາລັບ ສະຕາດອັບ ແລະ ຈນກ ໃຫ້ສົມບູນຂຶ້ນ.
ສຸດທ້າຍນີ້, ຂໍສະແດງຄວາມຂອບໃຈມາຍັງ ອົງການ KOICA ແລະ ຄະນະຊ່ຽວຊານ ທີ່ໃຫ້ການຊ່ວຍເຫຼືອຜ່ານໂຄງການພັດທະນາຊັບພະຍາກອນມະນຸດດ້ານນະວັດຕະກຳທາງດ້ານດິຈິຕອນ ສຳລັບ ຈນກ ຢູ່ ສປປ ລາວ ແລະ ຫວັງຢ່າງຍິ່ງວ່າ ທຶນດັ່ງກ່າວຈະສົ່ງຜົນປະໂຫຍດໃຫ້ແກ່ MSME ແລະ ສະຕາດອັບ ຂອງ ສປປ ລາວ ໃນອະນາຄົດ.
ຂ່າວ – ພາບ: ພຸດຕີ້
