ສຳນັກຂ່າວຕ່າງປະເທດລາຍງານວ່າ: ທະນາຄານກາງ ອັງກິດ (BoE) ໄດ້ປັບຫລຸດ ອັດຕາດອກເບ້ຍຈາກ 5,25% ເປັນ 5%, ຊຶ່ງເປັນການຫລຸດ ອັດຕາດອກເບ້ຍຄັ້ງທຳອິດ ນັບຕັ້ງແຕ່ ການແຜ່ລະບາດ ຂອງພະຍາດ ໂຄວິດ-19 ໃນເດືອນ ມີນາປີ 2020.
ຂະນະທີ່ເລີ່ມແຕ່ເດືອນ ສິງຫາ ປີ 2023, ທະນາຄານກາງອັງກິດ ໄດ້ຮັກສາອັດຕາ ດອກເບ້ຍລະດັບ 5,25% ເປັນສະຖິຕິສູງສຸດ ໃນຮອບ 16 ປີ , ໃນຄວາມພະຍາຍາມ ເພື່ອສະກັດກັ້ນ ອັດຕາເງິນເຟີ້ຂອງ ອັງກິດທີ່ເພີ່ມຂຶ້ນ.
ການປັບຫລຸດອັດຕາດອກເບ້ຍ ດັ່ງກ່າວນີ້ ໄດ້ຮັບການອະນຸມັດ ຈາກຄະນະ ກຳມະການ ນະໂຍບາຍ ເງິນຕາ BoE(MPC) ດ້ວຍຄະແນນສຽງ 5/4. ການຕັດສິນໃຈ ປັບຫລຸດອັດຕາດອກເບ້ຍ ແມ່ນໄດ້ສະເໜີ ໃນທ່າມກາງ ອັດຕາເງິນເຟີ້ ໃນອັງກິດ ຫລຸດລົງ ຈົນເຖິງ 2% ໃນເດືອນພືດສະພາ ແລະ ຍັງຄົງຮັກສາ ລະດັບນີ້ ໃນເດືອນ ມິຖຸນາ.
ພາຍຫລັງທ່ານ ແອນດີວ ໄບເລ(Andrew Bailey) ຜູ້ວ່າການ ທະນາຄານ (BoE) ປະກາດໃຫ້ ທະນາຄານສາມາດ ປັບຫລຸດ ອັດຕາດອກເບ້ຍລົງ ເນື່ອງຈາກຄວາມກົດດັນ ຂອງອັດຕາເງິນເຟີ້ ຫລຸດລົງ ແລະ ຕ້ອງລະມັດລະວັງ ໃນການປັບຫລຸດ ອັດຕາດອກເບ້ຍໄວ ຫລື ຫລາຍເກີນໄປ ເພື່ອຢືນຢັນ ຄວາມຈຳເປັນ ຕ້ອງຮັບປະກັນ ອັດຕາເງິນເຟີ້ ຢູ່ລະດັບຕໍ່າ ແລະ ໝັ້ນຄົງ ເພື່ອສະໜັບສະໜູນ ການເຕີບໂຕ ຂອງເສດຖະກິດ./.
