ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງສະຫວັນນະເຂດ ແລະ ບໍລິສັດ ອາປາ ອິນຄໍໂປເຣດ (APA) ເຊັນສັນຍາ ການສໍາຫລວດ-ອອກແບບໂຄງການກໍ່ສ້າງຫໍພິພິທະພັນຄົບວົງຈອນ ແຂວງສະຫວັນນະເຂດ ໃນວັນທີ 01 ສິງຫາ 2024 ທີ່ພະແນກ ຖວທ ແຂວງສະຫວັນນະເຂດ ຕາງໜ້າລົງນາມຄັ້ງນີ້ ໂດຍທ່ານ ມົງກຸດເພັດ ວົງພະຈັນ ຮອງຫົວໜ້າພະແນກ ຖວທ ແຂວງ ທັງເປັນຫົວໜ້າໂຄງການຈໍາປາສະຫວັນ (AFD) ແລະ ທ່ານ ວົງໄພ ບູນມະນີ ຜູ້ອໍານວຍການບໍລິສັດ APA, ມີທ່ານ ໂພສີສ້ອຍ ກຸທິລາດ ຫົວໜ້າພະແນກ ຖວທ ແຂວງ ພ້ອມດ້ວຍ ທີມງານຊ່ຽວຊານໂຄງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ມົງກຸດເພັດ ວົງພະຈັນ ໄດ້ກ່າວວ່າ: ການເຊັນ ສັນຍາການສໍາຫລວດ-ອອກແບບໂຄງການກໍ່ສ້າງຫໍພິພິທະພັນຄົບວົງຈອນແຂວງສະຫວັນນະເຂດ ຄັ້ງນີ້ ແມ່ນໂຄງການສືບຕໍ່ຈາກໂຄງການບູລະນະຫໍພິພິທະພັນແຂວງ ຊຶ່ງໃນໄລຍະຕົ້ນຂອງໂຄງການແມ່ນມີແຜນພຽງແຕ່ບູລະນະສ້ອມແປງສະເພາະອາຄານຫໍພິພິທະພັນໃຫຍ່ພຽງຫລັງດຽວ, ຊຶ່ງການສຳຫລວດອອກແບບໂຄງການກໍ່ສ້າງຫໍພິພິທະພັນຄົບວົງຈອນໃນຄັ້ງນີ້ ຈະໄດ້ແບ່ງເປັນ 02 ໄລຍະຄື: ໄລຍະທີ 01 ໃຊ້ເວລາ 8-12 ເດືອນ ສຳລັບການສຳຫລວດອອກແບບການກໍ່ສ້າງຈົນເຖິງການຄັດເລືອກເອົາບໍລິສັດກໍ່ສ້າງ ແລະ ໄລຍະທີ 02 ໃຊ້ເວລາ 24 ເດືອນ ເພື່ອຕິດຕາມກວດກາການກໍ່ສ້າງ ຊຶ່ງຈະເລີ່ມແຕ່ມື້ລົງມືການກໍ່ສ້າງ ໂດຍໃຊ້ງົບປະມານ 215.000 ໂດລາສະຫະລັດ.
ໂຄງການສຳຫລວດ-ອອກແບບການກໍ່ສ້າງຫໍພິພິທະພັນຄົບວົງຈອນ ຈະປະກອບສ່ວນເຮັດໃຫ້ເກີດມີຫໍພິພິທະພັນຂະໜາດໃຫຍ່ ສົມບູນແບບໃນອີກບໍ່ພໍເທົ່າເດືອນໃນຕໍ່ໜ້າ ຊຶ່ງຈະກວມເອົາເນື້ອທີ່ອ້ອມຮອບເຂດຫໍພິພິທະພັນໃນປັດຈຸບັນທັງໝົດ ແລະ ຈະເປັນກາຍເປັນຈຸດໝາຍປາຍທາງຂອງນັກທ່ອງທ່ຽວທີ່ເຂົ້າມາແຂວງສະຫວັນນະເຂດ ເວົ້າລວມ, ເວົ້າສະເພາະຄວາມສວຍງາມ ແລະ ຕື່ນຕາຕື່ນໃຈກັບອະລິຍະທຳ ແລະ ສະຖາປັດຕະຍະກຳຂອງອາຄານເກົ່າແກ່ຍຸກອານານິຄົມ. ພວກເຮົາຫວັງວ່າ ກຸ່ມບໍລິສັດ ໂດຍສະເພາະ ບໍລິສັດ APA ທີ່ເປັນບໍລິສັດທີ່ມີປະສົບການໃນວຽກງານນິີ້ສູງ ແລະ ມີຄວາມຮູ້ຄວາມເຂົ້າໃຈສະພາບພື້ນທີ່ຂອງແຂວງສະຫວັນນະເຂດເປັນຢ່າງດີ ຈະຊ່ວຍໃຫ້ເກີດຫໍພິພິທະພັນຄົບວົງຈອນທີ່ສວຍງາມ ແລະ ດຶງດູດຄວາມສົນໃຈໃຫ້ກັບວຽກງານການທ່ອງທ່ຽວໃນເຂດຕົວເມືອງເກົ່າ ກໍຄືຂອງແຂວງສະຫວັນນະເຂດ.
